२ कोरिन्थी 7 - थुलुङ राई1 द्वादीबुङ ङोप्सो़नी, याचे जेम्मा आरेप्माम ल्वामिम गुइनुङ बुमिमका मिरो़मडाम नुङ न-गोडाम मेसेपा ल्वामिमडाम गुइ इकी त्वापलाई सेपा दु़म्बेडी। मेम्मा माम्चु़नीकु ङिम जु़ल्साका छो़म सेपा दु़म्तो लक्सी। कोरिन्थीमिमकु खोर्सेसीका पावल भ्रसिड्डाम 2 गुकुलाई इनीमा न-गोडा बुमु ग्वाक्की। गुकु सु़लाई वो मेजो़पा बेत्तोकोम मिबु। गुकु सु़लाई वो ताङताहेरथो़ लक्तोकोम मिबु। गुकु लिमा-प्वालेम थेसाका सु़काम हाम वो पेत्तोकोम मिबु। 3 गानीलाई मुमा बेन्मु लागि गो आरे र्वाङुमिम मेएँ। गानीलाई ङादोङा र्वाङ्डोम बाइडा, गानीलाई गुकु छो़म रिखाम बोकु, गानीनुङ सिमु वो चाम्कु मा नु़मु वो चाम्कु। 4 गानीडला गो छो़म थो़र लु़ङ्डोम बु। गानीडाम गो छो़म आमा नो़ डोक्पु बेउ। खोत्ले आकीमा दु़खाडा वो आमा सो हन्पा बु मा छो़म भ्रसिक्पा बुङु। 5 गुकु माकेडोनियाडा रोक्तोकोलो वो ङेम्सिमु मेल्वाकुवा। मेसिन्डा बान्तेमेनो गुकु दु़खा ल्वात्तोकोम बाइडा, पाखाडा ने रिबुसी किन्मु बासिक्पा मा न-गोडा ने ङित्तोकोम बाइडा। 6 लावो न-गो जक्पा मु़चु़लाई सो हन्बेट्पा माम्चु़नीका तीतस रोक्तामलामका आकीमा सो हन्बेसाक्तिकिमी। 7 गु रोक्तामका कोङङा मेएँ, लावो गानी उमा सो हन्बेसाट्निमका वो आमा सो हन्डाम बाइडा। गोनुङ आथावो घ्रो़म्मु इनीमा न बु ए र्वाक्साका गुका गुकुनुङ सो़यु़डु़। ङादो गानी ख्लो़ट्निम ल्वाकु दुथाम खोर्सो़ट्नी मा गोलाम बासिट्नीमा जेन्निम ल्वाकु दुथाम वो सो़यु़डु़। गो ओर्मिम खोत्ले ल्वा थो़उतोमा छो़म भ्रङ्सिङ्डो। 8 गो थु़र्तोम सेलाखाजेमका इनीमा न नो़डा लोवो गो मेखोर्सेङी। गो खोर्सेङ्डी लोवो आमा सेलाखाजेमका घरिकोङ इनीमा न नो़बेड्डु़ र्वाक्पा गो चक्पु। 9 इनीमा न नो़बेत्तोमका मेएँ, लावो न नो़पा ल्वाकाङा गानी इनीमा छु़ललामका माम्चु़नीथो़ ख्लोसिट्निमका गो गेर्सी द्वाक्पा बुङु। माम्चु़नीकु न होम्साका इनीमा न नो़डाम सो़, मा मेम्मिमका गुकुलामका गानीलाई हाम वो मेजो़पा मेदु़प्सावा। 10 माम्चु़नीकु न होम्साका न नो़ माला ने ओरामका मु़चु़लाई सेल्सिमु लागि उमा छु़ललाम माम्चु़नीडा ख्लोबेडु़। मेम्मिमका ओरामका सु़लाई वो मेखोर्सेडु़। लावो सु़म्दिसेरडाम ल्वाका न नो़ माला ओरामका सिमुलाम रेडु़। 11 माम्चु़नीकु न होम्साका इनीमा न नो़डाम ल्वाका गानीगोडा हाम बु़डु़म बु र्वाक्पा मिम्नी। ओराम ल्वाका गानीगोडा त्वापलाई आच्छाङा जो़पा बोमु माल्पा हाङकोम इनीमा न, मेम्मा हाङकोम छोक्चो, हाङकोम ङिम, गोनुङ घ्रो़म्मु हाङकोम न, हाङकोम इनी पाउ मेसोक्पा, छु़ल बेपालाई देन्दे ग्वाक्पा हाङकोम न रेड्डु़म बु। खोत्ले ल्वाडा गानी इनी त्वापलाई हाम वो मेख्लो़ट्पा रेम्बेन्निम बु। 12 कोङनिमका मेजो़पा खारी बु़डु़मका मा कोङनिमकु न नो़डामका गो मेराम सेलाखाजेम र्याक्तोम मेएँ, लावो गानी आकीमा दुथाम हाङकोम न सोनिमिम बु मेराम माम्चु़नीकु ङादोडा गानी इनी त्वाकाङा रेम्मु चाम्निनु़ र्वाक्साका र्याक्तोम। 13 ओर्मिम खोत्लेका आकीमा सो हन्डाम बु। आकीमा सो हन्बेट्निमका कोङङा मेएँ, लावो गानी खोत्लेका तीतसकु सो हन्बेसाट्निमा गेर्सी बेट्निमका गुकु वो छो़म भ्रसिट्पा बुक। 14 इनीमा दुथाम गो तीतसनुङ डोक्पु ल्वा बेउतोम बाइडा, मा ओराम ल्वाडा गो ङाली डमु बासिक्पा मेदु़बेट्ङिनिवा। गो गानीनुङ हेल्लो लोवो आच्छाङाकाम ल्वा सो़उतोम बाइडा। मेम्साकाङा गो तीतसनुङ डोक्पु ल्वा बेउतोम वो आच्छाङा रोक्थिड्डा। 15 गानी ङिमका रुत्तो तीतसलाई रन्नी, मा गुका र्वाक्ताम होम्साका गानी खोत्लेका बोमु बिन्सिट्निम मिम्डु़मा गुका गानीलाई बेन्निम रिखाम आथावो हापा बर्तो लस्ताम बु। 16 आच्छाङा गानीडला थो़र लु़मु चापुमिमका गो गेर्सिद्वामु। |
© Wycliffe Bible Translators, Inc. All rights reserved.
Wycliffe Bible Translators, Inc.