२ कोरिन्थी 6 - थुलुङ राई1 माम्चु़नीनुङ खारी बेपा मु़चु़ दु़म्तोकोमका गुकु छो़म र्वाकु, गानी माम्चु़नीलाम दिदाम ल्वापामिमका मेराम दिदाम मेडेङा ब्लाम-ब्लाम दु़म्मु मेग्वाक्नी। 2 माम्चु़नीका र्वामी: “दिदाम बेपा जो़पा थारीका गो इमा सो़म्दी थो़उतो। सेल्पा नेम गो गानालाई ख्लो़न्नी।” रेप्नी, माम्चु़नीका दिदाम बेपा जो़पा थारी ओम्लोङा सो़, सेल्सिक्पा थारी ओम्लोङा सो़। पावलकु दु़खामिम 3 आकीमा खारीडा सु़का वो मेजो़पा मुमा मेबेन्किमिनु़ र्वाक्साका गुकु सु़काम वो लाम्दीडा खेल तुक्पा मेजु़ल्कु। 4 मेम मेबेसाका, खोत्ले खारीडा गुकु आकी त्वापलाई माम्चु़नीकु डु़ल्चो़ र्वाक्साका रेम्बोकु। गुकु दु़खाडा, मेझापाडा नुङ खेमल्यामु वो मेझापा खारीडा वो गुकु छो़म इम्सिसाका बुकु। 5 गुकु याल्ला सो़सित्तोको, चला सो़सित्तोको मा मु़चु़मिमलाम मेजो़पा बेला सो़सित्तोको, ब्राम्दु़ल्वा बेत्तोको, सिन्था अम्मु मेल्वाकुवा मा क्रु़मङा बात्तोको। 6 गुकु मेख्लो़ट्पा दु़म्साका, थेसीथेट्पा नेप्चीका, इम्सी नुङ न-थो़म रेम्बेसीडा, माम्चु़नी-पेलडा, आच्छाङाकाम रिखामका, 7 आच्छाङाकाम सिजेम नुङ माम्चु़नीकु यु़मका उनीमा खारी बेपा मु़चु़ र्वाक्साका रेम्बोकु। गुइलाई बोपा-थार्पा मा क्वाल्बा बेपा इकीमा गिजो-वाजो र्वाक्मा ने माम्चु़नीकु ङादोडा जो़पा दु़म्साका खारी बोमु सो़। 8 मु़चु़मिमका डोक्पु बोकिमी लोवो याक्के बोकिमी लोवो, आकीमा नङ कोमि लोवो डकिमि लोवो गुकु माम्चु़नीकु लाले-पाङके बोकु। मु़चु़का गुकुलाई लु-फेलेचो़ बोकिमी, लावो थो़रलु़इमिम बुकु। 9 मेछेट्मा मु़चु़ होङङा बोकिमी लावो खोत्लेका छेकिमी। सिमुङा खापा लोवो आथावो गुकु नु़पाङा बुकु। याल्तिकिमी लोवो सेत्तिकिमिम मिबु। 10 न-गोडा दु़खा बु लोवो हेल्लो लोवो भ्रसिक्पा बुकु। गुकु हाम वो मेबाट्पा लोवो हापा मु़चु़लाई खाप्चीचो़ दु़म्बेट्पा बुकु। हाम वो मेबाट्पा लोवो खोत्लेम थोक बाट्पा बुकु। 11 कोरिन्थडाम आमा वा-ल्वाकनी, गुकु हाम वो मेथक्साका र्वाक्तोकोम बु, इनीमा लागि आकीमा दाप होर्सिक्पा बु। 12 गानीलाई गुकु रिखाम मेबोकुमिम मेएँ, लावो गानी डे गुकुलाई रिखाम बोमु डित्तो लक्निम बु। 13 आमा त्वाकु चो़च्चो़मिमनुङ होङङा गो र्वाक्तोङा बेउ। गानी वो आकीमा लागि इनी दाप होर्नी। थो़र मेबेपामिमनुङ हेम-खेम मेबोमु 14 थो़र मेबेपा मु़चु़मिमनुङ कोले जुवागोडा मेहुनी। हेङालोने जो़पा नुङ मेजो़पाकाम हेमकेम मेदु़म। तुकुम्चिम नुङ ओल कोदेप दु़म्मु मेचाम्ची। 15 ख्रीष्ट नुङ बेलिआलकु ल्वा हेसाका घ्रो़म्मु चाप्सु़ मा? थो़र लु़पा मु़चु़ नुङ थो़र मेबेपा मु़चु़ हेसाका कोदेप दु़म्मु चाम्सि मा? 16 माम्चु़नीकु सो़रनेम गोडा ङाटामिम हेसाका दु़म मा? हेल्लो वो मेसिपा माम्चु़नी बुमी, मा उनीमा सो़रनेम ने गुइ ङा सो़। गुमीका आरेसाका र्वाम्डिम बु: “गो मेर्मिमकाडा बुङु, मेर्मिम गोडा लाम्दिङु, मा गो मेर्मिमकु माम्चु़नी दु़म्ङु, मेम्मा मेर्मिम आमा मु़चु़ दु़म्मी।” 17 मेम्मिमका मिप्रङमाका आरे र्वामी, “मेर्मिमलामका लुक्नीमा बिक्नी, मा मेर्मिमडाम वाङ बानी। मेसेपा हाम वो मेलु़प्नी, मा गो गानीलाई रनिनी। 18 गो इनीमा पाप दु़म्ङु, मा गानी आमा जाउमो-तारापाचो़मिम दु़म्नी, खोत्लेडाम घ्ल्वापा मिप्रङमाका र्वामी।” |
© Wycliffe Bible Translators, Inc. All rights reserved.
Wycliffe Bible Translators, Inc.