२ कोरिन्थी 5 - थुलुङ राई1 गुइ बुइमिम ओराम क्वाकु मिरो़म पुयु़लु लोवो पाह्रीला हेल्लो वो पुयु़ मेलुक्पा बाखोप माम्चु़नीका इकीमा लागि बनेबेम्डिम बु। गुइ ओराम च, मेराम ने मु़चु़कु ल्वाका बनेबेम्मा मेएँ। 2 ओम्लो गुकु ओराम मिरो़मडा बुकुलो छो़म आकी न नो़। गुकु ने पाह्रीला बाट्पा मिरो़म ये-सेम होम्साका फम्सिमु न बोकु। 3 ये-सेम होङङा गुइ पाह्रीलाम मिरो़म फसिडिलो गुइ मिरो़म मान्थि खालिन्ते मेदु़म्सी। 4 गुइ इकीमा क्वाकु मिरो़मडा बुइमिम थारीका मिम्ताम-सो़र्ताम बेत्तो ओसु़म बिइ। गुइ ओराम मिरो़म डिन्मु न बेसाका मेएँ, लावो पाह्रीलाम त्वारो़मकु ये-सेम फसिनु़ र्वाक्साका सो़, मेम्साका सिपा मिरो़म ने मेसिपा त्वारो़मडा ख्लोसी। 5 आरेप्माम खारी झो़म्सी बेट्पा ने माम्चु़नीङा सो़। गुमीका मेराम खारी आच्छाङा बोम्सोमी र्वाक्पा रेम्बोमु लागि ङादो ग्वाम्जो़ल्मा बैना होङङा माम्चु़नी-पेल गुइलाई ग्वाक्साड्डामिम बु। 6 मेम्मिमका हेल्लो लोवो इकीमा सो हन्होम बु। गुइ ओराम मिरो़मडा बुइमिमसम्म ङाचो़डाम होनोवा दु़म्सी र्वाक्पा ल्वा चडिम बु। 7 गुइ थो़रलामका बुइ-दोसी, मिक्सीका ल्वासिमिम ल्वालामका मेदोसी। 8 इकीमा छो़म सो हन्पा बु मा ओराम मिरो़म डिसाका ङाचो़नुङ बुमु गुइ द्वाकी। 9 मेम्मिमका गुइ मिरो़मडा बुइ लोवो मिरो़मडाम वाङ बुइ लोवो गुमीलाई गेर्सिबेन्मुङा इकीमा न दु़म। 10 गुइ खोत्ले ख्रीष्टका निया बेपा गन्खोपकु ङादोडा येम्सिमु बासी, मा मु़चु़का मिरो़मडा बाइडालो जो़पा डे मेजो़पा हाम बु़डु़म बु मेराम होम्साका निया ल्वासु़। न-थो़म घ्रो़म्बेसीकु खारी 11 ङाचो़काम ङिम जु़ल्मु र्वाक्पा ल्वा गुकु चक्तोकोमका मु़चु़मिमलाई माम्चु़नीडा थो़र लु़बेन्मु माल्कु। आकीमा दुथाम माम्चु़नीका खोत्ले चमी, मा गानी वो आमा दुथाम जो़होमका चनिमिमङा बु र्वाक्पा आमा न बु। 12 आरे र्वाक्साका गुकु आथावो इनीमा ङादोडा आकीमा त्वाकु दुथाम डोक्पुतो ल्वा बोमु माल्तोकोम मेएँ, लावो गुकुडा गानी डोक्पु लिन्सिट्नी र्वाक्साका गानीलाई जो़पा थारी ग्वामु माल्तोकोम बु। मेम्साका न-गोडा बाट्पा ल्वाडा मेएँ, मिक्सीका ल्वासिक्पा ल्वाडा डोक्पु लिसिक्पा मु़चु़लाई गानी सि तुमु चाम्नी। 13 गुकु आकीमा न मान्थिम बुकु माला माम्चु़नीकाम लागि न मान्थिम बुकु, मा गुकु आकीमा ननुङमा बुकु माला इनीमा लागि ननुङमा बुकु। 14 ख्रीष्टकु रिखामका गुकुलाई ओराम खारी बेबेत्तिकिम सो़। खोत्ले मु़चु़मिमकाम लागि गुमी सिम्डी, मेम्मिमका गुइ खोत्ले गुमीनुङ सिइडिम र्वाक्साका गुइ चडिम बु। 15 गुमी खोत्लेकाम लागि सिम्डी। मेम्मिमका लाले त्वारो़म ल्वापामिमका आथाडा आनो त्वाकाम लागि मेएँ, लावो ख्रीष्टकाम लागि नु़मु बासी, गुमी मेर्मिमकाम लागि सिम्डी मा सिमुलाम बम्गेम्डिम। 16 मेम्मिमका सु़म्दिसेरडाम मु़चु़मिमकु रेप्सी होम्साका आथाडा आनो गुकु सु़लाई वो मेरेम्कु। कोबिलि ख्रीष्टलाई आरेसाकाङा रेप्तोको लावो आथाडा आनो गुमीलाई मेम्साका मेरेम्कु। 17 मेम्मिमका कोङनिम मु़चु़ ख्रीष्टडा बु माला मेराम लाले दु़स्ताम मु़चु़ सो़। मेम्मा ङादोम त्वारो़म दाम्स्ताम बु, रेप्नी, लाले त्वारो़म चो़म्सिड्डाम बु। 18 ओर्मिम खोत्ले माम्चु़नीका बेम्डिम सो़। गुमीका ख्रीष्टलामका उनीमा नुङ इकीमा न-थो़म घ्रो़म्बेसाड्डामी मा वाङमिम मु़चु़काम न-थो़म गुमीनुङ घ्रो़म्बेट्पा खारी वो गुइलाई ग्वाक्साड्डामी। 19 मेराम र्वाक्मा ने मु़चु़मिमका बेम्डिम छु़लकु मुमा मेबेसाका माम्चु़नीका खोत्ले मु़चु़मिमलाई ख्रीष्टलामका गुमीनुङ न-थो़म घ्रो़म्बेट्मिडिम बु। मेम्मा वाङमिमलाई जो़पा-सेला थो़बेसाका न-थो़म घ्रो़म्बेट्पा खारी गुकुलाई ग्वाक्तिकिम बु। 20 मेम्मिमका गुकु ख्रीष्टकाम सेलाचो़ सो़, मा माम्चु़नीका गुकुलामका र्वामिमिम-र्वामिमिमङा बुमी। ख्रीष्टलामका गुकु गानीलाई छो़म र्वाकु: माम्चु़नीनुङ इनीमा न-थो़म घ्रो़म्बेट्नी। 21 माम्चु़नीका ख्रीष्टडा गुइलाई उनी त्वाकु ङादोडा जो़पा न-गोकाम दु़म्बेन्मु लागि हेल्लो वो छु़ल मेबेपा ख्रीष्टलाई इकीमा छु़ल कुर्बेट्मिडी। |
© Wycliffe Bible Translators, Inc. All rights reserved.
Wycliffe Bible Translators, Inc.