२ कोरिन्थी 4 - थुलुङ राईक्वाकु सोजामडा हापा थिकाम खाप्ची 1 माम्चु़नीकु उनी दिदामलाम ओराम खारी गुकुलाई ग्वाक्तिकिमिमका आकी पाउ मेसो। 2 गुकु क्रो़म लु़पा नुङ थसिसाका बेपा खारी मेबोकु। गुकु लु-फेले वो मेबोकु, मा माम्चु़नीकु सिजेम वो मेफाल्कु। लावो गुकु आच्छाङाकु सिजेम जो़होमका सीकुमी, मा माम्चु़नीकु ङादोडा गुकु हेप्माम मु़चु़ बुकु रेछा र्वाक्पा ल्वा खोत्ले थो़रलु़इमिम मु़चु़मिमका उनीमा न-गोडा चमु चाम्मी। 3 गुकु थो़बेन्कुमिम जो़पा-सेला कोङनिमलामका थसिक्पा बु माला पुयु़लुक्पामिमकाम लागि कोङङा थसिक्पा बु। 4 मेर्मिमकु दुथाम र्वाकी माला, माम्चु़नीकु ङाली बुमिम ख्रीष्टकु यु़म-झ्वासिक्पा जो़पा-सेलाकु ओल मेर्मिमका मेल्वामिनु़ र्वाक्साका ओराम सु़म्दिसेरडाम नो़पका थो़रमेलु़पा मु़चु़मिमकु न ब्लो़प्साड्डु़मिम बु। 5 गुकु थो़बेन्कुमिम ल्वा आकीमा दुथाममिम मेएँ, लावो येशू ख्रीष्ट ने ङाचो़ र्वाक्पा ल्वा नुङ ख्रीष्टकाम लागि गुकु इनीमा डु़ल्चो़ दु़म्तोकोम बु र्वाक्साका थो़बेन्कु। 6 “तुकुम्चिमलाम ओल झ्वानु़” र्वाक्पा माम्चु़नी ङा आकीमा नडा उनीमा ओल झ्वाबेसाका माम्चु़नीकु यु़म-झ्वाक्सीकाम नेप्ची गुकुलाई थेसिथेन्बेत्तिकी। आच्छाङा ओराम ओल येशू ख्रीष्टकु ङालीडा झ्वा। 7 माम्चु़नीलाम झ्वाक्पा ओराम ओलकु खाप्ची गुकुनुङ बु, लावो क्वाकु सोजाम होप्माम गुकुगोडा मेराम खाप्ची जु़ल्मा बु। ओरामलामका आरे र्वाक्साका थेसिथेडी, आरेप्माम डोक्पु यु़म ने गुकुलाम मेएँ, माम्चु़नीलाम रो। 8 गुकु खोत्लेलामका खाल्सितोकोम बु, लावो गुकु हिल्सिक्तोकोम मिबु। गुकु हाम वो बोमु मेचापा थारी रोहोम बु, लावो आकी न सेत्तोकोम मिबु। 9 मु़चु़मिमका छो़म आकी थो़मतेर्मिडिम बु, लावो माम्चु़नीका गुकुलाई हेल्लो वो डित्तिकिमिम मिबु। मु़चु़मिमका गुकुलाई याल्त्तिकिमिम बु, लावो मेर्मिमका गुकुलाई सेन्मु चाप्त्तिकिमिम मिबु। 10 आकीमा मिरो़मडा येशूकु बासी-दोसी वाङमिमका ल्वामिनु़ र्वाक्साका गुकु आकी त्वाकु मिरो़मडा हेल्लो लोवो येशूकु सिमुलाम कुर्कु। 11 सिपामा लक्पा आकीमा मिरो़मडा येशूकु त्वारो़म रेम्बेसिनु़ र्वाक्साका उनीमा लागि ङा हेल्लो लोवो गुकु र्वाप्डा सिकुम बुकु। 12 मेम्मिमका गुकु राप्डा सित्तो गानीगोडा खारी बोकुलो गानी हेलो वो मेसिपा त्वारो़म ल्वानी। 13 “गो थो़र बेउ, मेम्मिमका गो जेङु” र्वाक्साका माम्चु़नीकु सिजेमडा र्याक्मा बु, गुकुनुङ वो मेरामङा थो़र बु मा गुकु वो जेकु। 14 गुकु चकु, इकीमा ङाचो़ येशूलाई सिमुलाम फक्पा माम्चु़नीकाङा गुइलाई वो येशूनुङ फक्सामी। मेम्मा गानी नुङ गुकुलाई उनी त्वाकाडा लक्सामी। 15 गुकु दु़खा ल्वात्तोकोम ओर्मिम खोत्ले ल्वाका ने गानीलाई जो़पा दु़म्नु़ र्वाक्साका दु़स्ताम सो़। मेम दु़स्तामका हापा मु़चु़मिमका माम्चु़नीकु दिदाम ल्वामी मा मेर्मिम खोत्लेका माम्चु़नीकु नङ डोक्पु बोमु लागि गुमीलाई आलासो़ ग्वामी। थो़रलु़सीलाममिम त्वारो़म 16 मेम्मिमका हेल्लो वो आकीमा पाउ मेसो। आकीमा मिरो़म यु़प्तो ल लोवो आकीमा त्वारो़मकु पेल ने हेल्लो लोवो लाले दु़म्तो ल। 17 गुकुनुङ ओम्लो कति दु़पा थारी नुङ याक्के दु़खा बु, ओरामका हेल्लो वो मेदाम्पा यु़म-झ्वाक्सी गुकुगोडा रेडु़। ओराम दु़खाडाम वो मेराम यु़म झ्वाक्सी ने हापा डोक्पु बु। 18 मिक्सीका ल्वासु़मिम ल्वा मेएँ, मिक्सीका मेल्वासु़मिम ल्वा गुकु रेम्कु। मिक्सीका ल्वासु़मिम ल्वा घरिकोङकाम कोङङा दु़म, लावो मिक्सीका मेल्वासु़मिम ल्वा ने हेल्लो लोवो दु़महोम बु। |
© Wycliffe Bible Translators, Inc. All rights reserved.
Wycliffe Bible Translators, Inc.