२ कोरिन्थी 3 - थुलुङ राईलाले सो़रख्रेप्सीडाम डु़ल्चो़मिम 1 हाम आथावो आकी त्वाकाङा त्वापलाई कोमु खाम्कु मा? हाम कोङ-कोङ मु़चु़मिमका होङङा गानीलाई डे गानीलामका डे छेबेट्पा सेलाखाजेम गुकु वाङमिमलाई रेम्बोमु बासी मा? 2 गानीङा आकीमा न-गोडा र्याक्मा सेलाखाजेम सो़। इनीमा त्वारो़म ने खोत्ले मु़चु़मिमका डान्मु नुङ छेमु चापा मेराम सेलाखाजेम सो़। 3 आच्छाङा गानी ने ख्रीष्टका र्याम्डिम सेलाखाजेम सो़, मा मेराम सेलाखाजेम रेट्पा गुकु ङा। ओराम सेलाखाजेम गेलोङका र्याक्मा मेएँ, लावो नु़पा माम्चु़नीकु पेललामका र्याक्मा सो़। लुङकु र्याखोपडा मेएँ, लावो न-गोडा र्याक्मा सो़। 4 ख्रीष्टलाम न-थो़म ल्वात्तोकोमका गुकु माम्चु़नीडला आरेप्माम थो़र बेसाका र्वाकु। 5 ओराम खारी बोमु घ्रेटपा बुकु र्वाक्साका गुकु र्वामु मेचाम्कु। लावो गुकुलाई ओराम खारी बोमु घ्रेट्पा दु़म्बेट्पा ने माम्चु़नी सो़। 6 गुमीका गुकुलाई लाले सो़रख्रेप्सीकु डु़ल्चो़ दु़म्मु चापा दु़म्बेत्तिकिमिम बु। ओराम लाले सो़रख्रेप्सी ने र्याक्मा डु़म्लामिम मेएँ, लावो माम्चु़नी-पेललाम सो़। र्याक्मा डु़म्लाका सिमुलाम रेडु़, लावो माम्चु़नी-पेलका ने त्वारो़म ग्वाक्सामी। लाले सो़रख्रेप्सीकु यु़म-झ्वाक्सी 7 लुङकु र्याखोपडा डु़म्ला र्याम्डिमा ग्वाम्डिम थारीका माम्चु़नीकु यु़म झ्वाक्सी रेम्बेसिड्डा। मेराम यु़म झ्वाक्सीका मोशाकु कल झ्वाक्ताम बाइडा। मेप्माम झ्वाक्पामा वाखाताम दाम्तो लक्पा ल्वा लोवो इस्राएलीमिमका मोशाकु कल रेम्मुङा मेचाप्मिवा। सिमुलाम रेट्पा डु़म्ला रेड्डु़लो ने मेप्माम यु़म-झ्वाक्सी बाइडा माला, 8 त्वारो़म ग्वाक्पा माम्चु़नी-पेलकु खारी रेडिलो मेरामडाम वो हापा घ्ल्वापा यु़म झ्वाक्सी मेदु़म मा? 9 मु़चु़लाई मुमा बेट्पा डु़म्लाकु खारी ने यु़म झ्वाक्पा बाइडा माला, मु़चु़मिमलाई माम्चु़नीकु ङादोडा जो़पा दु़म्बेट्पा खारी ने मेरामडाम वो हापा यु़म-झ्वाक्पा दु़म। 10 ओराम यु़म-झ्वाक्सी छो़म झ्वाक्पा बाइडामका ङादोम यु़म झ्वाक्सी ने मेकोतिङा दाम्स्तामा लस्ता। 11 दाम्तो लक्पा मेराम डु़म्ला वो यु़म-झ्वाक्सिनुङमा रोक्ताम बाइडा माला, ओराम हेल्लो लोवो दु़म्पाम बाट्पा त्वारो़म ग्वाक्पा खारी ने मेरामडाम वो घ्ल्वापा यु़म-झ्वाक्सिनुङमा दु़म। 12 गुकुनुङ आरेप्माम हाम-हुम ल्वापा न बु़मिमका गुकु छो़म मेङिपा दु़म्तोकोम बु। 13 दाम्तोलक्पा यु़म-झ्वासी इस्राएलीमिमका मेल्वामिनु़ र्वाक्साका मोशाका उ कल ख्रेप्थाल्लु़, लावो गुइ ने गु होप्माम मेएँ, 14 मेराम थारीका इस्राएलडाम मु़चु़मिमकाम थेसीथेट्पा न हुप्मा बाइडा। आथाल-दिका वो माम्चु़नीकु ङादोम सो़रख्रेप्सी डान्मिलो मेर्मिमका थेसिमेथेन्मी। मेर्मिमका ख्रीष्टडा थो़र लु़साका कोङङा उनीमा नडा हुप्मा ल्वा पार्सी मा थेसिथेन्मु चाम्मी। 15 आथामबिलि वो मोशाकु डु़म्ला डान्मिलो मेर्मिमकु न हुप्मा दु़म, मा थेसिथेन्मु मेचाम्मी। 16 लावो ङाचो़थो़ मु़चु़ ख्लोसी माला मेरामकु नडाम हुप्मा ल्वा गुमीका पार्सामी। 17 ङाचो़ ङा पेल बुमी, मा ङाचो़कु पेल बान्ते दु़म मेसिन्डा मेजो़पा ल्वालामका गुइ सेल्सिडी। 18 ङाचो़कु यु़म-झ्वाक्सी गुइलामका रेम्बेसिनु़ र्वाक्साका इकीमा कल हुपा पार्सिड्डाम बु। ङाचो़, गुमी ङा पेल सो़, गुमीलाम रोक्पा यु़म-झ्वाक्सीका गुइलाई वो गुमी होप्माम ङा दु़म्बेसा मा गुइ आथावो हापा यु़म-झ्वासिक्पा दु़म्तो लक्सी। |
© Wycliffe Bible Translators, Inc. All rights reserved.
Wycliffe Bible Translators, Inc.