२ कोरिन्थी 2 - थुलुङ राई1 इनीमा न मेनो़बेट्पुनु़ र्वाक्साका गो इनीमाडा आथावो चक्थो़ मेरोक्पा मुलु़ बेउतो। 2 हेङालोने गो इनीमा न नो़बेत्तो माला गो न नो़बेसाक्निनिम गानीडाम वाङमिम सु़का गोलाई गेर्सिबेन्ङी मा? 3 गो रोङुलो आमा न भ्रसिबेन्मु बासिक्पा मु़चु़मिमका आमा न नो़मेबेन्मिनु़ र्वाक्साका ङादोम सेलाखाजेम गो र्याक्तोम सो़। आमा न भ्रसिलो इनीमा वो न भ्रसी र्वाक्पा गो थो़र लु़ङ्डोम बाइडा। 4 आमा गो छो़म ख्राप्तो आमा न मेभ्रसिक्तो नुङ छो़म प्ल डक्तो गानीलाई मेराम सेलाखाजेम र्याक्तोम बाइडा। गो इनीमा न नो़बेन्मु माल्तोम मेएँ, लावो गो गानीलाई हाङकोम रिखाम बोनिनी मेराम गानीलाई चबेन्मु आमा न बाइडा। छु़ल हेप्सी 5 गानीगोडाम कोङनिमका न नो़बेड्डु़ माला आमा कोङङा मेएँ गानी खोत्लेकाम छो़म न नो़बेड्डु़। 6 गानीगोडाम हापाङा उमा कोर्थो़लाम बनिमिमङा मेरामलाई लिट्पा देन्दे दु़म। 7 मेम्मिमका गानी मेरामकु छु़ल हेम्साट्नी मा मेरामनुङ न-थो़मनुङमा दु़म्साका जेनी-दोनी, मेएँ माला ने छो़म उ दु़खा लुमा उ गो ज। 8 मेम्मिमका गो गानीलाई छो़म र्वाङु, मेराम मु़चु़डला आच्छाङा रिखाम बोनी र्वाक्पा रेम्बेनी। 9 गानीलाई र्वाक्मा होम्साका खोत्ले बोनी डे मेएँ डे र्वाक्साका छाम्मु नुङ रेम्मु लागि गानीलाई सेलाखाजेम र्याक्तोम बाइडा। 10 गानी कोङनिमलाई पाचो ग्वानी माला गो वो मेरामलाई पाचो ग्वाक्पु। कोङनिम मु़चु़लाई कोङनिम ल्वाडा गो पाचो ग्वाक्तोम बु माला येशू ख्रीष्टकु ङादोडा इनीमा लागिङा पाचो ग्वाक्पु। 11 आरेसाका शैतानका गुइलाई फोसो़ आम्मु मेल्वास्नु़, हेङालोने गुइ शैतानकु नडाम मुलु़मिम चडिम बु। त्रोआसडा पावलका मिम्ताम-सो़र्ताम बु़डु़म 12 ख्रीष्टकु दुथाम जो़पा-सेला थो़बेड्डा गो त्रोआस शहरडा रोङडोलो ङाचो़का आमा लागि लाम्चोको होल्साङ्डिमिम बाइडा। 13 लावो आमा ल्वाक तीतस मेसिन्डा मेडारुवामका गो मिम्ताम-सो़र्ताम बेउतो। मेम्मा त्रोआसडाम वा-ल्वाकमिमनुङ ब्र्वासिङ्डोमा गो माकेडोनियाथो़ लङडो। ख्रीष्टलाममिम घ्ल्वासी 14 माम्चु़नीलाई आलासो़ दु़म्नु़, हेङालोने माम्चु़नीका गुइलाई हेल्लो लोवो ख्रीष्टनुङ घ्ल्वासीकु लाम्दीडा लाम्दिबेसामी। गुमीका ख्रीष्ट छेबेट्पा नेप्चीलाई भ्रपा मुरनेम्पा धूप होङङा खोत्लेथो़ फोट्पा खारी गुकुलाई ग्वाकिमी। 15 हेङालोने सेल्सिक्पामिम नुङ पुयु़लुक्पामिम गोडा गुइ माम्चु़नीकाम लागि ख्रीष्टकु भ्रपा मूरनेम्पा धूप सो़। 16 पुयु़लुक्पामिमकाम लागि गुइ साम फ्याक्साक्पा घ्रामलु़पा मुर मा सेल्सिक्पामिमकाम लागि गुइ त्वारो़म ग्वाक्पा भ्रपा मुर सो़। आरेप्माम खारी बोमु चापा सु़ बु मा? 17 वाङमिम हापा मु़चु़मिमका खाप्ची डु़म्मु लागि बेम्डिम होङङा माम्चु़नीकु सिजेम भ्रेट्पा मु़चु़ गुकु मेएँ, लावो गुकु ने माम्चु़नीका थु़र्तिकिम मु़चु़ सो़, मा माम्चु़नीकु ङादोडा गुकु ख्रीष्टकु डु़ल्चो़ दु़म्साका उनीमा सिजेम आच्छाङा जेकु। |
© Wycliffe Bible Translators, Inc. All rights reserved.
Wycliffe Bible Translators, Inc.