२ कोरिन्थी 13 - थुलुङ राईहुम-दडाम सीसिमिम 1 गो गानीलाई क्रो़म्डा ओम्लो रोक्तोङा बेउमिमनुङ सु खेप दु़म। माम्चु़नीकु सिजेमडा आरेसाका र्याक्मा बु, “मुमा बेट्मा ल्वा नले-सुले मु़चु़मिमका ल्वात्तोको र्वाक्साका सो़मिमिम ल्वा कोङङा आच्छाङाकाम दु़म।” 2 गो ङादो नकखेपमिम खेपडा गानीनुङ बाङडोलो गानीलाई ङिम साट्निनिम बाइडा। ओम्लो गानीनुङ मेबुङु लोवो मेरामङा ल्वा र्वाङु: गो आथावो रोङुलो ङादो छु़ल बेपामिम सु़लाई लोवो गो मेडिट्पुमी। 3 मेकोतिलो ख्रीष्ट गोलामका जेमी डे मेएँ र्वाक्साका गानी रेम्मु माल्निम ल्वा डार्नी। गुमीका गानीगोडा खारी बोमिलो गुमी मेचापा मेबुमी, लावो छो़म यु़मनुङमा बुमी। 4 आच्छाङा मेचाप्सीडा गुमी क्रूसडा चेन्ला सो़सिम्डी, लावो माम्चु़नीकु यु़मका गुमी नु़पाङा बुमी। गुकु वो गुमी होङङा मेचापा दु़म्कु, लावो माम्चु़नीकु यु़मका गुकु वो गुमीनुङङा नु़साका गानीगोडा खारी बोकु। 5 गानी आच्छाङा थो़र लु़न्निम बु डे मेएँ र्वाक्साका इनी त्वाका त्वापलाई छाम्नी। येशू ख्रीष्ट गानीगोडा बुमी र्वाक्पा गानी आच्छाङा चनी। गुमी गानीगोडा मेबुमी माला गानी गुमीडा थो़र बोनी र्वाक्पा ल्वा आच्छाङा मेएँ। 6 मेम्मा गो थो़र लु़ङु, गुकु ने थु़र्माकु खारी बेसीडा हाम ना हामकाम दु़म्तोकोम मिबु र्वाक्पा गानी चनी। 7 गानी मेजो़पा मेबेनी र्वाक्साका माम्चु़नीनुङ गुकु सो़म्दी बोकु। गुकु आकी त्वाप जो़पा रेम्बोमु लागि मेएँ, लावो गुकु हाम ना हामकाम होप्माम ल्वासिड्डा लोवो गानी जो़पा खारी बोमु चाप्नी र्वाक्साका सो़म्दी बोकु। 8 गुकु आच्छाङाकाम ल्वाकु कोर्थो़लाममिम खारी हाम वो बोमु मेचाम्कु, लावो आच्छाङाकाम लागि कोङङा खारी बोमु चाम्कु। 9 गुकु हाम वो बोमु मेचापा बुकु, लावो गानी ने हाम लोवो बोमु चापा बुनिमिमका गुकु गेर्सी द्वाकु। गानी छो़म जो़पा दु़म्तो लक्नी र्वाक्साका गुकु सो़म्दी बोकु। 10 इनीमाडा रोमु ङादो गो ओराम ल्वा र्याक्तोङा लेट्पु। गो इनीमाडा रोङुमिम चङडा गानीलाई इम्मु मेझापा देन्दे ग्वामु मेबासिनु़। गानीलाई फाल्मु लागि मेएँ, लावो सोनुङमा दु़म्बेन्मु लागि ङाचो़का गोलाई ग्वाङडिमिम साखाम थो़मु न बेउ। हुम-दडाम पावलकु सेव 11 हुम-दडा, वा-ल्वाकनी, ब्र्वासिडी। छो़म जो़पा दु़म्साका लाम्दिमु न बेनी। गो छो़म र्वाङुमिम ल्वा थो़नी, कोले नकाम दु़म्नी, भ्रसिसाका बानी। मेम्मा रिखाम बेपा मा न-भ्रसी ग्वाक्पा माम्चु़नी गानीनुङ दु़म्मी। 12 गानी सेपा रिखामका त्वाप त्वापगोडा सेव साबेबेनी। 13 माम्चु़नीकु सेपा मु़चु़मिम खोत्लेका गानीलाई सेव र्वाम्डिम बु। 14 ङाचो़ येशू ख्रीष्टकु दिदाम, माम्चु़नीकु रिखाम नुङ माम्चु़नी-पेलकु सामा घ्रो़म्सी गानी खोत्लेनुङ दु़म्नु़। |
© Wycliffe Bible Translators, Inc. All rights reserved.
Wycliffe Bible Translators, Inc.