२ कोरिन्थी 12 - थुलुङ राईपावलका मिक्सीलाम ल्वास्तु़म नुङ उ मिरो़मडाम चु़ 1 आमा लागि हाम वो जो़पा मेबु़ लोवो गो धक्ची डोक्पु बोमुङा बासी। ङाचो़लामका ल्वाउतोम मिक्सीलाममिम नुङ गुमीका रेम्बेट्ङिडिमिम ल्वामिमकु दुथाम गो सो़उ। 2 ख्रीष्टडा थो़रलु़पा कोले मु़चु़लाई गो छेपु, को-ब्ल (१४) थ ङादो गुलाई माम्चु़नीका खोत्लेडाम येप्पा पाह्रीला कोम्डी। गुलाई मिरो़मडा लम्डिम डे पेलडा डे लम्डी मेराम गो मेचक्पु, माम्चु़नीका चमी। 3 पाह्रीला कोम्डिम ओराम मु़चु़लाई गो छेपु, मिरो़मडा डे पेलडा डे लम्डी मेराम गो मेचक्पु, लावो माम्चु़नीका चमी। 4 गुलाई माम्चु़नीका पाह्रीला कोम्डिमा मेसिन्डा मु़चु़कु सिका र्वामुङा मेचापा नुङ मु़चु़का सो़सी मेनु़पा ल्वा गुका थो़स्तु़। 5 गो ओराम मु़चु़कु दुथाम डोक्पु लिसिङु। लावो आमा दुथाम ने गो मेचापा बुङुमिम ल्वाडाम वाङमिम ल्वाडा डोक्पु मेलिसिङु। 6 गो डोक्पु लिसिमु मालु माला वो गो नेप्ची मान्थिम मेदु़म्ङु, हेङालोने गो आच्छाङाकाम ल्वा जेत्तोङा लेट्पु। लावो गो डोक्पु मेलिसिङु, मा गो हाम बेउ, हाम र्वाङु मेरामडाम वो डोक्पु सु़का वो गोलाई मेलु़मिनु़। 7 माम्चु़नीका गोलाई रेम्बेट्ङिडिमिम हेल्लो वो मेल्वाम्मा ल्वाका गो डोक्पु मेलिसिङुनु़ र्वाक्साका माम्चु़नीका आमा मिरो़मडा चु़ ग्वाङ्डिमी। ओराम शैतानकु सेलाचो़ बाइडा, ओरामका छो़म आमा थो़मतेर्सु़ मा गोलाई डोक्पु लिसिमु मेग्वाङी। 8 गो ओराम हेम्सिनु़ र्वाक्साका ङाचो़नुङ सु खेप गो छो़म र्वाङडो। 9 लावो गुमीका गोलाई र्वाम्डी, “इमा लागि आमा दिदाम हापा बु। इमा मेचाप्सीडा आमा यु़मका खारी बु़।” मेम्मिमका ख्रीष्टकु यु़म गोडला दु़म्नु़ र्वाक्साका आमा मेचाप्सीडा गो छो़म गेर्सी द्वाक्तो आमा धक्ची डोक्पु बेउ। 10 मेम्मिमका मेचाप्सीमिमडा, डसिसिमिमडा, दु़खामिमडा, थो़मतेर्सीमिमडा, इम्मु मेझापा ल्वामिमडा ख्रीष्टकाम लागि गो गेर्सी द्वाङु। हेङालोने मेचापा दु़म्ङुलो गो सो नुङमा दु़म्ङु। कोरिन्थीमिमकाम लागि पावलकु मिम्ताम-सो़र्ताम 11 गो आ त्वाकाङा त्वापलाई नेप्ची मान्थिम दु़म्बेत्तोम बु। गानीङा गोलाई आरेप्माम दु़म्बेट्ङिडिनी। गानी आमा नङ कोमु बासिक्पा बाइडा। हेङालोने गो हाम वो मेएँ लोवो “डोक्पु-डोक्पु थु़र्मामिम” डाम गो याक्के मेबुङु। 12 गो गानीगोडा छो़म इम्सिक्साकानुङ हापा छेखोपमिम, हेल्लो वो मेल्वाम्मा नुङ यु़मनुङमा खारीमिम बेसाका गो येशू ख्रीष्टकु थु़र्मा र्वाक्पा ल्वा रेम्बेट्निनिम बु। 13 गोलाई वाङमिम मण्डलीमिमका ख्लो़मु लागि ग्वाङ्डिमिम खउलुङ गो रउतो, लावो गानीनुङ ख्लो़ला मेसो़सिक्ङुवा। खउलुङ मेरउवा। गानीनुङ ओराम ल्वाडाम वाङमिम मेजो़पा बासी-दोसी हाम बेउतो मा? ओराम गो ख्लो़त्तोम ङा र्वाक्पा गानी मिम्नी माला गोलाई पाचो ग्वाङनिनी! 14 ओम्लो गो इनीमाडा रोमु खाप्तोम बु। गो इनीमाडा रोङुमिम ने ओरामनुङ सु-खेप दु़म। लावो गो गानीनुङ हाम-हुम बिसाका दु़खा मेग्वानिनी। गो बिउमिम ल्वा ने इनीमा खाप्ची मेएँ, गानी इनी त्वाप ङा सो़। माम-पापकाम लागि चो़मिमका मेएँ, लावो चो़मिमकाम लागि डे माम-पापका खउलुङ फुसाका जु़ल्मु बासी। 15 गानीलाई जो़पा दु़म्नु़ र्वाक्साका गोनुङ बाट्पा खोलेम थोक गेर्सी द्वाक्तो ग्वानिनी मा गो आ त्वापलाई ङा वो ग्वानिनी। गो गानीलाई ओकोति छो़म रिखाम बोनिनी माला गानी ने गोलाई कि-कि कोङङा रिखाम बोङिनी मा? 16 गो गानीलाम खउलुङ मेबिउवा, मेराम ल्वा गानी वो चनी। लावो गो बाछेन्दा लिसिङ्डोमा गानीलाई वायम डक्निनी र्वाक्साका याङ याङका र्वामी। 17 गो इनीमाडा थु़र्तोमिम कोङनिम मु़चु़लामका गो लिमा थेसाका गानीनुङ हाम हुम रउतो मा? 18 गो तीतसलाई इनीमाडा लमु र्वाक्साका छो़म र्वाङडो मा कोले ल्वाकलाई वो गुनुङ थु़र्तो। तीतसका लिमा थेसाका गानीलाम हाम-हुम रङडु़ मा? गुचुकु कोलेङा न नुङ कोलेङा बेसी-दोसीका मेबेचुकुवा मा? 19 गुकु आकी त्वापलाई बोमु-थार्मु ओर्मिम खोत्ले ल्वा बोकुमिम र्वाक्पा हाम गानी मिम्निम बुनी? द्वादीबुङ ङोप्सो़नी, माम्चु़नीकु ङादोडा ख्रीष्टकु डु़ल्चो़मिम होप्माम दु़म्साका गुकु जेकु। गानीलाई सोनुङमा दु़म्बेन्मु लागि गुकु ओर्मिम खोत्ले खारी बोकु। 20 हेङालोने गो मेसिन्डा गानीलाई क्रो़म्डा रोङुलो गो मिम्तोम होप्माम मेदु़म्मु चाम्नी मा गानी वो गोलाई मिम्ङिनिमिम होप्माम मेदु़म्मु वो चापु र्वाक्पा आमा ङिम लु़डाम बु। मेसिन्डा गानीगोडा रिबुसी, नाचु़र, छोक्चो, त्वाप कोङङा जो़पा दु़म्मु माल्पा, डक्साका जेपा, वाङमिमकु ल्वा बेपा, डोक्पु लिसिट्पा, मा मु़चु़मिमगोडा ल्वा मेघ्रो़म्पा दु़म्मी डे र्वाक्पा ङिम लु़डाम बु। 21 गो आथावो इनीमाडा रोङुलो गानी मेजो़पा खारी बेन्निमका माम्चु़नीडा आमा क्रो़म लु़ र्वाक्पा ङिम लु़। मेम्मा ङादो छु़ल बेपा हापा मु़चु़मिमका आथावो त्वाका बेम्डिम घ्रामलु़पा खारी, नाम्सु़रु़ नुङ वाङमिम मेसेमनुङ अमअम द्वाक्पा नलाम मेख्लोसिप्मिवामका गो ख्राम्मु बासी डे र्वाक्पा गोलाई ङिम लु़डाम बु। |
© Wycliffe Bible Translators, Inc. All rights reserved.
Wycliffe Bible Translators, Inc.