२ कोरिन्थी 10 - थुलुङ राईपावलकु साखाम ङाचो़लाम रोक्ताम सो़ 1 गो पावल, ख्रीष्टकु याक्के दु़म्सीलाम नुङ मेक्रोक्पा दु़म्सीलाम गो गानीलाई छो़म र्वाङु। गानीनुङ बुङुलो याक्के दु़म्ङु ए, लावो गानीडाम होनोवा बुङुलो मेङिपा दु़म्ङु ए र्वाक्पा ल्वा गानीगोडा बोमी ए। 2 गो गानीलाई छो़म र्वाङु, गो इनीमाडा रोङुलो मेङिसाका भुर्मु बासिक्पा ल्वा बोमु मेबासिनु़। मेराम मेङिसाका भुर्मु बासिक्पा ल्वा ने गुकुलाई ओराम सु़म्दिसेरडाम मेजो़पा नका खारी बेत्तोङा लेनी र्वाक्पा मु़चु़मिमनुङ गो बेपा मुलु़ बेउतोम बु। 3 गुइ सु़म्दिसेरडा बुइ लोवो सु़म्दिसेरडाम मु़चु़मिमका होङङा गुइ क्वाल्बा बिइहोम मेबुइ। 4 गुइ क्वाल्बा बिइमिम गिजो-वाजो ने सु़म्दिसेरडाम मु़चु़मिमका मोक्पा गिजो-वाजो मेएँ। गुइ मोक्थालिमिम माम्चु़नीकु यु़मनुङमा गिजो-वाजोका ने खिर्मा खोम वो छो़रो़प बु़। ओराम गिजो-वाजोका हाम ना हामकु रिबुसी ल्वा दाम्बेडु़। 5 मु़चु़मिमका माम्चु़नीलाई छेमुडाम वाङ बेपा खोत्ले डोक्पु लिसिक्पा ल्वालाई गुकु ओराम गिजो-वाजोका पुयु़लुकु़। मेर्मिमकु नगोडा बाट्पा खोत्ले मेजो़पा ल्वामिम ओराम गिजो-वाजोलामका गुकु आकीमा साखामगोडा जु़ल्कु मा ख्रीष्टका र्वामिमिम होङङा मेर्मिमलाई बेबेन्कुमी। 6 गानी माम्चु़नीका र्वामिमिम होङङा बेपा दु़न्निमिम चङडा गुमीका र्वामिमिम होङङा मेबेपा खोत्लेलाई गुकु देन्दे ग्वाकु। 7 गानी ने इनी मिक्सीलामडा बाट्पा कोङङा रेम्नी। कोङनिम मु़चु़का गो ने ख्रीष्टकाम र्वाक्साका जो़होमका थो़रलु़डाम बु माला, गुकु वो गु होप्माम ङा ख्रीष्टकाम सो़ र्वाक्पा ल्वा गुका मिम्नु़। 8 ङाचो़का गुकुलाई ग्वाक्तिकिमिम ओराम साखाम गानीलाई पुयु़लुबेन्मु मेएँ, लावो जो़पा बोमु लागि सो़। ओराम साखामकु दुथाम गो छो़म डोक्पु लिसिङडो लोवो आमा क्रो़म मेलु़। 9 गो गानीलाई र्याक्तोम सेलाखाजेममिमका गानीलाई ङिमसान्मु माल्निनिम मेएँ। 10 “पावलकु सेलाखाजेममिम ङिम लु़पा नुङ आच्छाङा नडा लक्पा बु, लावो गु उ त्वाप रोलो ने हाम वो बोमु मेचापा मा मेरामकु सिजेम हाम ना हामकाम दु़म” र्वाक्साका कोङ-कोङका र्वामी। 11 आरेप्माम मु़चु़मिमका ओराम ल्वा चमिनु़, गुकु मेसिन्डा मेबुकुलो सेलाखाजेमडा हाम र्वाकु, गुकु मेसिन्डा बुकुलो वो मेरामङा खारी बोकु। 12 त्वाकु नङ त्वाकाङा कोक्पा याङ मु़चु़मिमनुङ गुकु आकी त्वापलाई कोलेङा र्वाक्पा मिम्मु नुङ थो़म्मु सामाका मेफारु़। मेर्मिम उनी त्वाका बनेबेम्डिम थो़प्सी होम्साकाङा उनी त्वाका त्वापलाई छाम्साका जु़ल्मी मा त्वाकाङा त्वापलाई थो़प्मी माला मेर्मिम मु़चु़ नेप्ची मान्थिम दु़म्मी। 13 माम्चु़नीका बेबेतिकिमिमडाम होनोवाम ल्वाडा गुकु डोक्पु मेलिसिन्कु। माम्चु़नीका गुकुलाई इनीमाडा रोक्साका ओराम खारी बेबेतिकिमिम बु, गुकु ओराम खारीकु दुथाम कोङङा डोक्पु लिसिन्कु। 14 इनीमाडा रोमुङा मेरोक्कुवाम होङङा बेसाका गुकु आकी त्वापलाई गेले कोक्साका डोक्पु लिसिन्त्तोकोम मिबु। खोत्लेडाम ङादो इनीमाडा ख्रीष्टकु जो़पा-सेला रेट्पा गुकु ङा सो़। 15 वाङमिमका बेम्डिम खारीडा गुकु आकी त्वाका बेत्तोकोम र्वाक्साका डोक्पु मेलिसिन्कु। लावो इनीमा थो़र बर्तो ललो गानीगोडा दु़म्पा आकीमा खारी वाङमिम खोमथो़ वो बर्तो लनु़ र्वाक्पा आकीमा न बु। 16 मेम्साका गुकु इनीमाडाम होनोवाम खोममिमडा जो़पा-सेला थो़बेन्मु चाम्कु। हेङालोने वाङमिम मु़चु़मिमका ङादोङा बोम्सोमु दु़म्मिडिम खारीडा डोक्पु लिम्सिमु आकीमा न मिबु। 17 माम्चु़नीकु सिजेमडा वो र्याक्मा बु, “डोक्पु लिसिक्पाका मिप्रङमाडाङा डोक्पु लिसिनु़।” 18 हेङालोने त्वाका त्वाकु नङ कोक्पा मु़चु़लाई सु़का वो जो़पा मेमिम्डु़, लावो ङाचो़का नङ कोम्साप्मिमिम मु़चु़ङा जो़पा दु़म। |
© Wycliffe Bible Translators, Inc. All rights reserved.
Wycliffe Bible Translators, Inc.