१ तिमोथी 6 - थुलुङ राई1 डु़ल्चो़ दु़म्बेट्पाकु जुवाडा बाट्पामिम खोत्लेका उनीमा नेमहपमिमलाई छो़म डोक्पु मिम्मिनु़, मेम्साका माम्चु़नीकु नङ नुङ इकीमा सीसिकु दुथाम मु़चु़मिमका मेजो़पा मेजेमी। 2 थो़रलु़सीडा वा-ल्वाक दु़म्निमका थो़र लु़पा डु़ल्चो़मिमका नेमहपमिमलाई कि-कि वो याक्के मेबोमिनु़। मेम मेबेसाका, मेर्मिमका नेमहपमिमकाम छो़म जो़होमका खारी बोमिनु़, हेङालोने नेमहपमिमलाई जो़पा दु़म्मु ने त्वाकु द्वादीबुङ थो़र लु़पामिमलाई जो़पा दु़म्मु सो़। आरे बेबेडामिमा मेर्मिमलाई सीडामी। लिमा सीसि नुङ खउलुङ द्वाम 3 कोङनिमका लिमा ल्वा सीमिमा इकीमा ङाचो़ येशू ख्रीष्टकु आच्छाङाकाम सिजेम नुङ माम्चु़नीकु सो़रलोले दु़म्पा सीसि होम्साका बोमु मेबिसी माला, 4 मेराम मु़चु़ डोक्पु लिसिक्पा दु़ममा मेरामका हाम वो मेथेडु़। मेरामका हाम ना हामकु ल्वाडा खाल्मुमा क्वाल्बा बोमु मालु़मिम दु़म। ओर्मिम ल्वाका नाचु़र, रिबुसी, वाङमिमकु दुथाम मेजो़पा जेपा, मा वाङमिमलाई मुर्पा ल्वामिम दु़म्बेडु़। 5 आरेप्माम मु़चु़मिमका हेल्लो लोवो रिबुसी कमिम बुमी। मेर्मिमकु न मेजो़पा बु मा आच्छाङाकाम ल्वा दाम्सोमु दु़म्मिडिम बु। मेर्मिमका माम्चु़नीकु सो़रलोले बोमु ने खउलुङ डु़पा लाम्दी र्वाक्पा मिम्मी। 6 लावो गो-तिम्सिक्साका बिइमिम सो़रलोलेङा छो़म डोक्पु थिकाम सो़। 7 हेङालोने ओराम सु़म्दिसेरडा गुइ हाम वो मेरेडिवा, मा ओलामका गुइ हाम वो लमु मेचाप्सी। 8 मेम्मिमका पोमु नुङ फम्सिमु बु माला मेकोतिडाङा गुइ इकीमा गो-तिम्सिमु बासी। 9 लावो खाप्चीचो़ दु़म्मु न बेपामिम ने मेजो़पा खारी बोमु न बेपा दु़म्मी, पेरडा हुमी, मा हाम ना हामकाम नुङ छो़म थो़मतेर्पा ननुङमा दु़म्मी। मेम्मा मेप्माम नका मु़चु़मिम फालु़मिमा पुयु़लुकु़मी। 10 हेङालोने खउलुङ द्वामसिमुङा खोत्ले मेजो़पा ल्वामिमकु सक्फार सो़। खउलुङकु रारी बेसाका कोङ-कोङ मु़चु़मिम थो़र लु़मु डिसाका मेजो़पा लाम्दीथो़ लम्डिम बु, मा दु़खा ल्वामिमका मेर्मिमकु थो़मबोक छो़म ख्वाक्थाडु़मिम बु। पावलका तिमोथीलाई बेबेड्डु़म ल्वा 11 लावो गाना माम्चु़नीकु लाम्दीडा लाम्दिपा मु़चु़, ओर्मिम खोत्ले ल्वामिम ङेडा, मा माम्चु़नीकु न होङङा बे, उनीमा सो़रलोले बे, थो़र, रिखाम, इम्सी नुङ याक्के दु़म्सीडा लाम्दिमु चापा दु़प्सा। 12 त्वाकु थो़र बोमु-थार्मु र्वाक्मा ओन्सीडा ओन्मु होप्मामङा सो़। मेम बोमु गाना चाप्तो-मेचाप्तो ओन्डा। हेल्लो वो मेसिपा त्वारो़म झेथडा। मेराम त्वारो़म गाना हापा मु़चु़मिमकु ङादोडा थो़र लु़ङु र्वाक्नालो माम्चु़नीका ग्वाक्नामिम बाइडा। 13 खोत्लेलाई साम ग्वाक्पा माम्चु़नी, नुङ पन्तियस पिलातसका हिलाबु़डु़लो लिमा मेथेसाका सो़पा मेराम ख्रीष्ट येशूकु ङादोडा गो गानालाई छो़म र्वाङु, 14 ङाचो़ येशू ख्रीष्ट आथावो योमिमिम थारीसम्म गो बेबेट्निम ल्वा जो़होमका बे मा सु़का वो मेजो़पा ल्वा इमा बुइडला उन्मु मेल्वामिनु़। 15 माम्चु़नीका जो़पा थारीका ख्रीष्टलाई थु़र्मी। आलाकाम नुङ खोत्लेडाम घ्ल्वापा, हपमिमकु हप, ङाचो़मिमकु ङाचो़ माम्चु़नी। 16 माम्चु़नी कोङङा हाम्सी वो मेसिमी, सु़ वो फार्डा लमु मेझापा ओलडा बाट्पा गुमी, सु़का वो मेल्वामिवाम गुमी, ल्वामु मेचाम्मिमिम। खोत्लेका उनीमा नङ कोमिनु़, हेल्लो लोवो उनीमा यु़म दु़महोम बु। आमेन। 17 ओराम सु़म्दिसेरडाम खाप्चीचो़मिमलाई डोक्पु मेलिम्सिमु बेमी, घरिकोङ ल्वापा खाप्चीडा मेएँ, लावो गुइलाई लिट्पा बेसाका खोत्ले मोमु ग्वाक्पा माम्चु़नीलाम ल्वापा न मेर्मिमका बोमिनु़। 18 मेर्मिमका जो़पा खारी बोमिनु़, मा जो़पा खारीलाम खाप्चीचो़, खेरेला दु़म्पामिमडला न-थो़मनुङमा दु़म्साका छो़म ग्वा-ग्वा द्वाक्पा दु़म्मिनु़। 19 आरे बेसाका मेर्मिमका पाह्रीला खाप्ची जु़ल्जो़ल्मिनु़। मेराम ने रोक्पा थारीका मेर्मिमकाम लागि जो़पा जग गट्मा होप्मामङा सो़, मा मेर्मिमका आच्छाङाकाम त्वारो़म ल्वामी। 20 तिमोथी, माम्चु़नीका गानालाई हाम बेबेट्नामिम बु मेराम चङचङया दु़म्साका बे। माम्चु़नीकु सीसिकु कोर्थो़लाम बक्साका सीसिपामिमका माम्चु़नीकु नेप्चीलामका सीपा लिम्सिमी, लावो मेराम ने आच्छाङाकाम सीसि मेएँ सो़। आरेप्माम मु़चु़मिमडाम वाङ बाया। 21 आरेप्माम लिमा ल्वाडा थो़र लु़साका याङका उनी थो़र वो दाम्सोम्डिम बु। माम्चु़नीकु दिदाम गानानुङ दु़म्नु़। |
© Wycliffe Bible Translators, Inc. All rights reserved.
Wycliffe Bible Translators, Inc.