१ तिमोथी 5 - थुलुङ राईअर्दोमे, एल्डर, नुङ डु़ल्चो़मिमकु दुथाम सीसि 1 ङावा मु़चु़लाई मेभुरा, लावो गुलाई पाप होङ्ङा मिम्डामा उमा सो हन्बेसाडा। त्वापडाम याक्के मु़चु़मिमलाई त्वाकु वोस्चो़ ल्वाक होङ्ङा बेमी। 2 ङामी मेसेममिमलाई त्वाकु माम होङ्ङा नुङ स्वालामेमिमलाई जो़पा नका त्वाकु मेसेम ल्वाक होङ्ङा बेमी। 3 उनी त्वापलाई रेपा सु़ वो मेबाट्पा अर्दोमेमिमलाई जो़होमका रेप्डामी। 4 कोङ अर्दोमेकाम चो़मिम, चु़सु़मिम बुमी माला मेर्मिमका ङादो उनी त्वाकु नेमगोडाम मु़चु़मिमलाई माम्चु़नीकु सो़रलोले बेसी होम्साका जो़होमका रेप्साका उनी जेर सोम्सामिनु़। मेर्मिमका आरे बोमिमिम माम्चु़नीका द्वामी। 5 उहेम आच्छाङा अर्दोमे बु, मा मेरामकाम सु़ वो मेबुमी माला, मेरामका माम्चु़नीलाम हाम-हुम ल्वापा नका नेम्फु सिन्था याक्के दु़म्साका ख्लो़ला सो़म्सिमु सो़म्दी बु़। 6 लावो उमा नसीहोम बोम्बाल्मु लागि बु माला गु नु़सीङा सिडाम कोतिमङा दु़म। 7 ओर्मिम खोत्ले सीसि थो़र लु़पामिमलाई सीडामी, मा मेर्मिम मुमा बेन्ला मेसो़म्सिमी। 8 थो़र लु़पामिमका ने त्वाकु मु़चु़मिमलाई मा मेरामडाम वो हापा त्वाकु नेमगोडामलाई जो़होमका मेरेप्डु़मी माला मेरामका थो़र नाप्छु़डु़, मा थो़र मेलु़पामिमडाम वो मेजो़पा दु़म। 9 कोलेनुङ कोङङा लालीकुन्दा दु़स्ताम मा रु धु़म (६०) थ रोक्थिट्पा अर्दोमेकाम कोङङा अर्दोमेकु नङ र्याखोपडा र्याका। 10 मेकोतिमा गुका जो़पा खारी बेसीडा उमा नङ दोस्ताम दु़म्मु बासी। चो़मिम बर्बेड्डु़मिम, वाङथो़लाम रोक्पामिमकाम चापे-डुपे बु़साड्डु़मिम, माम्चु़नीकु चो़मिमकाम खेल सो़ल्साड्डु़मिम, दु़खा ल्वापामिमलाई ख्लो़यु़डु़मिम, मा आरेप्मामङा जो़पा खारी बोमु छो़म द्वाक्पा दु़म्मु बासी। 11 लावो स्वालामे अर्दोमेमिमकु नङ मेराम र्याखोपडा मेर्याका, हेङालोने मेर्मिमका याङ्लो लालीकुन्दा बेपा न बेसाका ख्रीष्टलाई डिन्मिमा वाङथो़ लमु वो चाम्मी। 12 आरेसाका ङादो हाम बेउ र्वाम्डिम मेराम मेबोमी मा मेर्मिमका देन्दे ल्वामी। 13 मेम कोङङा मेबोमी, मेर्मिम भ्रेपा दु़म्मिमा मु़चु़कु नेम-नेम लमी। मेम्मा मु़चु़कु ल्वा बेपा, वाङमिमकु खारीडा ल्वा फिक्पा, जेसी मेनु़पा ल्वा जेसाका नेमतापा दु़म्मी। 14 मेम्मिमका स्वालामे अर्दोमेमिमलाई आथावो लालीकुन्दा बोमु ग्वाक्साका, चो़मिम कमु, उनी नेम जो़होमका रेम्मु सीडामी। मेम्साका इकीमा कोर्थो़लाम बक्पामिमका इकीमा दुथाम मेजो़पा जेमुलाम मेल्वामिनु़ र्वाक्पा आमा न बु। 15 हेङालोने कोङ-कोङ ने ङादोङा शैतानथो़ लम्डिम बु। 16 थो़र लु़पा मेसेमकाम कोङनिम त्वाकु मु़चु़ अर्दोमे बुमी माला मेरामका मेर्मिमलाई ख्लो़यु़नु़, मा मण्डलीलाई दु़खा मेग्वाकु़मिनु़। मेम्साका मण्डलीका ने आच्छाङा ख्लो़मु बासिट्पा अर्दोमेमिमलाई ख्लो़मु चाप्सु़नु़। 17 जो़होमका मण्डली क्रिपा एल्डरमिमलाई खोत्लेका छो़म डोक्पु मिम्मी। जो़पा-सेला थो़बेट्पामिम नुङ सीपामिमलाई ने मेरामडाम वो हापा डोक्पु मिम्मी। 18 हेङालोने माम्चु़नीकु सिजेमका आरे र्वा: “पराल नाट्पा बेनोकु सि मेड्याक्नी” मा “खारी बेपाका खारी बु़डु़म खउलुङ ल्वामु बासी।” 19 एल्डरका मेजो़पा खारी बु़डु़म ल्वा नले सुलेका ल्वात्तोको मेर्वाक्थु़म मेरामलाई मुमा बेट्मा ल्वा मेथो़सा। 20 छु़ल बेपामबाट्पामिमलाई थो़रलु़पामिम खोत्लेकु ङादोडा भुरामी, मा आरे बोनामिमका वाङमिम वो ङिमी। 21 गो गानालाई माम्चु़नी, ख्रीष्ट येशू नुङ माम्चु़नीकु पाह्रीचो़मिमकु ङादोडा चङचङया बाबेनी, चोमिक्सी मेबेसाका गाना खोत्लेनुङ दिदाम, न-थो़म रेम्बेसाका ओर्मिम खारी बे। 22 कोङनिमडला ल्वा जु़ल्साका थुमु छु़रु़प-छु़रु़प मेदु़प्सा। कोङनिम मु़चु़कु छु़लडा मेङोल्सा। छु़ल बोमुडाम गाना वाङ बाया। 23 ङादोम होम्साका कु कोङङा मेडुङा, इमा ख्वाचेप नुङ नो़नाम बुनामिमका कि-कि अङ्गूरकु बिलाम वो डुङा। 24 कोङ-कोङ मु़चु़मिमकाम छु़लमिम ने निया दु़म्मु ङादोङा जो़होमका ल्वासिमिम दु़म, लावो कोङनिमकु छु़लमिम ने दिफु कोङङा ल्वासी। 25 मेम्साकाङा जो़पा खारी वो खोत्लेका जो़होमका ल्वासिमिम दु़म, मेम्साका मेल्वासी लोवो चङडा खोत्लेका ल्वासी। |
© Wycliffe Bible Translators, Inc. All rights reserved.
Wycliffe Bible Translators, Inc.