१ तिमोथी 4 - थुलुङ राईलिमा ल्वा सीपामिमडाम चङचङया बानी 1 दिफुम थारीबिलि कोङनिम मु़चु़मिम उनी थो़र लु़सीलामका ख्लोम्सिट्मी, मा मेर्मिम लु-फेले बेपा पेल नुङ मुनाङ-कुर्चाङमिमकु सीसिथो़ लमी र्वाक्साका माम्चु़नी-पेलका जो़होमका र्वामी। 2 लिमा थेट्पा मु़चु़मिमकु न घ्रु़पा सेलका घ्रु़डामा मिनी मिक्सीलामडा जो़पा लिसिक्पा रेम्बेसाका वायम डमी। 3 मेर्मिमका लालीकुन्दा मेबेनी र्वामी। मेकोतिमा थो़र लु़पामिम नुङ आच्छाङाकाम ल्वा चक्पामिमका आला-तोमानुङ पोमु बासिक्पा माम्चु़नीका प्रङ्मिडिम याङ-याङ पोमु-डुमुडाम वाङ बानी र्वामी। 4 माम्चु़नीका प्रङ्मिडिम खोत्ले जो़पाङा बु, मा ओर्मिम खोत्लेकाम लागि गुमीलाई आलासो़ ग्वाक्साका पिइ-डुङी माला नु़, 5 हेङालोने मेराम माम्चु़नीकु सिजेम नुङ सो़म्दीका सेपा दु़म। 6 थो़र लु़पामिमलाई ओर्मिम ल्वा सीनामी माला गाना ख्रीष्ट येशूकु कोले जो़पा डु़ल्चो़ दु़म्ना। मेम्मा गाना लाम्दित्तोङा बोनामिम इकीमा थो़रकु दुथाममिम सीसिडा नुङ जो़पा सीसिडा गाना बर्नाम रेम्बोना। 7 माम्चु़नीकु सो़रलोले मेदु़म्पा नुङ हाम ना हामकु ल्वामिमडाम वाङ बाया, मा माम्चु़नीकाम कोङङा सो़रलोले बोमु सीसा-चेसा। 8 मिरो़मका सीसि-चेसीमिम कि-किवा थिकाम कोङङा दु़म, लावो माम्चु़नीकु न होङ्ङा बोमु ने हापा थिकाम दु़म। हेङालोने माम्चु़नीकु न होङ्ङा बेसीडा ओम्लोम नुङ दिफुम त्वारो़म ग्वानिनी र्वाक्साका माम्चु़नीका याचे जेम्डिम ल्वा बु सो़। 9 ओराम ल्वा आच्छाङा नुङ खोत्लेका रमुका घ्रेट्पा बु सो़, 10 गुइ हेल्लो लोवो बुमिमिम माम्चु़नीलाम हाम-हुम ल्वापा न बिइमिम बु, गुमी ने खोत्लेकाम सेल्पा मा मेरामडाम वो थो़र लु़पामिमलाई सेल्पा सो़। मेम्मिमका गुइ ब्राम्दु़ल्वा नुङ मेझापातो खारी बिइमिम बु। 11 ओर्मिम ल्वा मेर्मिमलाई सीडामिमा बेबेडामी। 12 स्वाला र्वाक्साका गानालाई सु़का वो याक्के मेमिम्नामिनु़, लावो थो़रलु़पामिमकु ङादोडा सिजेमडा, खारी बेसी नुङ रिखामडा, थो़रडा नुङ नडा जो़पा दु़म्साका रेम्बेसा। 13 गो मेरोक्थु़सम्म माम्चु़नीकु सिजेम डासाका थो़बेन्मुडा, जो़पा-सेला थो़बेन्मुडा, मा सीमुडा न सोकाम बाया। 14 एल्डरमिमका उनी ल्वा गानाडला जु़ल्मिडिलो माम्चु़नीलाममिम-जेसीलामका गाना ल्वान्नाम राप्लावा हाम ना हामकाम मेमिम्डा। 15 गाना बोमु बासिक्पा ओर्मिम खारीमिम बेहोम बाया, मा गाना बोनामिम खारी जो़पा दु़म्तो लस्ताम खोत्लेका ल्वामिनु़। 16 त्वाकु दुथाम नुङ त्वाकु सीसिकु दुथाम चङचङया बाया। ओर्मिम ल्वा बोनाम बुना माला गाना इ त्वाप नुङ इमा ल्वा थो़पामिम खोत्लेङा सेल्सिनी। |
© Wycliffe Bible Translators, Inc. All rights reserved.
Wycliffe Bible Translators, Inc.