१ तिमोथी 3 - थुलुङ राईबिशप नुङ डिकन 1 ओराम र्वाक्मा आच्छाङा सो़, कोङनिम मु़चु़का बिशप दु़म्साका खारी बोमु माल्लु़ माला मेरामका छो़मङा जो़पा खारी बोमु मालु़मिम दु़म सो़। 2 मेम्मिमका बिशप दु़म्मु माल्पा ने सु़का वो मुमा बेन्मु मेचापा, कोलेङा नाइमे बाट्पा, इम्सिक्पा, मा त्वापलाई जो़होमका जु़ल्पा, खोत्लेका जो़पा मिम्मिमिम, बोच्चो़कु चापे-डुपे बेपा मा जो़होमका सीमु चापा दु़म्मिनु़। 3 डु़का मेसेट्पा, छोक्चो मेबेपा, याक्के दु़म्पा, क्वाल्बा मेबेपा, मा खाप्चीकु रारी मेबेपा, 4 त्वाकु नेमडाममिमलाई जो़होमका डु़ल्मु चापा, त्वाकु चो़च्चो़मिमलाई र्वाकिमिम थो़पा दु़म्बेन्मिनु़। 5 हेङालोने कोङ मु़चु़का उमा नेमडाममिमलाई जो़होमका रेमु मेचाप्सु़ माला मेरामका हेसाका माम्चु़नीकु मण्डली रेमु चाप्सु़ मा? 6 मालो थो़र लु़पा दु़म्पा मु़चु़ बिशप मेदु़म्नु़, मेएँ माला ने गु छो़म डोक्पु लिसिमा माम्चु़नीका शैतानलाई ग्वाम्डिम होङङा मेराम देन्दे गुलाई ग्वामी। 7 बिशप थो़र मेलु़पामिमका वो जो़पा मिम्मिमिम दु़म्मु बासी, मेम्साका मु़चु़मिमका उमा दुथाम मेजो़पा जेमु मेल्वामी मा शैतानकु पेरडा मेहु। 8 मेम्साकाङा डिकनमिम वो खोत्लेका जो़पा मिम्मु घ्रेट्पा दु़म्मु बासी। नले ल्वा मेबेपा, डु़का मेसेट्पा, मा खाप्चीकु रारी मेबेपा दु़म्मु बासी। 9 लावो माम्चु़नीका गुइलाई रेम्बेसाड्डामिम आच्छाङाकाम मेराम थो़र नुङ जो़पा न-गोका मेर्मिम लाम्दिमु चाम्मिनु़। 10 मेर्मिमलाई वो ङादो छाम्मु बासी, मा मेर्मिमलाई मुमा बेन्मु बासिक्पा ल्वा मेलुकावा माला डिकनकु खारी बोमु चाम्मी। 11 मेम्साकाङा मेसेममिम वो खोत्लेका जो़पा मिम्मु घ्रेट्पा, ओन्चो़मा मेबेट्पा, खोत्लेडा इम्सिक्पा, मा वाङमिमका गुडला थो़र लु़मिमिम दु़म्मु बासी। 12 डिकन कोलेङा नाइमे बाट्पा, त्वाकु चो़च्चो़मिमलाई र्वाकिमिम थो़पा दु़म्बेट्पा, त्वाकु नेमडाममिमलाई जो़होमका डु़ल्मु चापा दु़म्मिनु़। 13 हेङालोने डिकनका बोमु बासिक्पा खारी उहेमका जो़होमका बोमी मेर्मिम जो़पा नङ फोन्सिक्पा दु़म्मी, मा ख्रीष्ट येशूडा बेम्डिम उनीमा थो़र छो़म बर्तो ल। 14 गो इमाडा दालाङा रोङु र्वाक्पा आमा न बु, लावो गो गानालाई सेलाखाजेम र्याक्तोङा लेट्पु, 15 गो रोमु छु़ङ्डो माला माम्चु़नीकु नेमडा गाना हा-हाम बोमु बासी ओरामलामका थेना। ओराम नेम र्वाक्मा हेल्लो लोवो बुमिमिम माम्चु़नीकु मण्डली, माम्चु़नीलाम रोक्पा आच्छाङाकु सिजेम झेथाक्पा नुङ बाट्पाम बाट्पा थो़र लु़पामिम सो़। 16 सो़रलोले बेपा मिरो़म-त्वारो़मकु थक्मा ल्वा ने हाङको डोक्पु बु: ख्रीष्ट उनी त्वापङा मिरो़मडा ल्वाला सो़म्सिम्डी, माम्चु़नी-पेलका गुमीलाई माम्चु़नीकु ङादोडा जो़पा दु़म्मिडिम रेम्बेम्डी, पाह्रीचो़मिमलाम ल्वाला सो़म्सिम्डी, मिनी सामामिमका उनीमा दुथाम थो़म्डी, सु़म्दिसेरडा मु़चु़मिमका गुमीडा थो़र बेम्डी, यु़म-झ्वाक्सीडा गुमी गेले कोम्सिम्डी। |
© Wycliffe Bible Translators, Inc. All rights reserved.
Wycliffe Bible Translators, Inc.