१ तिमोथी 1 - थुलुङ राईतिमोथीलाई पावलकु सेव 1-2 थो़रलु़सीडा आमा आच्छाङाकाम तारापाचो़ होप्माम तिमोथी, गो पावलका गानालाई ओराम सेलाखाजेम र्याक्तोङा बेउ। गुइ ख्रीष्ट येशूलाम हाम हुम ल्वापा न बिइमिम नुङ गुइलाई सेल्पा इकीमा माम्चु़नीका बेबेट्ङिडिमिम होम्साका गो ख्रीष्ट येशूकु थु़र्मा सो़। माम्चु़नी नुङ इकीमा ङाचो़ ख्रीष्ट येशूलामका गाना दिदाम, न-थो़म, नुङ न-भ्रसी ल्वानानु़! लिमा ल्वा सीपा मु़चु़मिमडाम चङचङया बुमु 3 गो माकेडोनियाडा लङ्डोलो गानानुङ छो़म र्वाङ्जो़ल्ङोडोम होम्साका गाना एफिससडाङा बाया, मा लिमा ल्वा सीपा मु़चु़मिमलाई मेम मेबेनी बेमी, 4 मा माके-माकेम हाम ना हामकु सो़म्दीमिमडा नुङ पाइमाखामिमडा नेम मेतानी र्वाक्साका मेर्मिमलाई चङचङया बाबेडामी। मेर्मिमका ने खालबेपा ल्वामिम कोङङा कक्सु़। मेर्मिम ल्वाका माम्चु़नीकु खारी बोमु हाम वो मेख्लो़यु़, माम्चु़नीकु खारी थो़र लु़साका दु़म। 5 गो बेबेट्निम ल्वाका र्वामु मालु़मिम ने रिखाम बेबोमु सो़। मेराम रिखाम ने जो़पा गो, जो़पा ल्वा माल्पा न नुङ आच्छाङा थो़र लु़साका रो। 6 कोङ-कोङ मु़चु़मिम ने ओर्मिम खोत्ले ल्वा डिसाका हाम ना हामकु ल्वाडा थाम्बाल्मिमिम बु। 7 मेर्मिम मोशाकु डु़म्ला सीपा मु़चु़ दु़म्मु न बोमी, लावो त्वाका जेमिमिम ल्वा नुङ आच्छाङा र्वाक्साका जेमिमिम ल्वाकु दुथाम हाम वो थेसिमेथेन्मी। 8 गुइ ओराम चडिम बु, डु़म्ला जो़होमका थो़डी माला डु़म्ला जो़पा बु। 9 डु़म्ला जो़पा मु़चु़मिमकाम लागि मेएँ र्वाक्पा वो गुइ च, लावो डु़म्ला होम्साका मेदोपामिम, लु़म्ला मेबेडिचो़मिम, माम्चु़नीकु सो़रलोले मेबेपामिम, मा छु़लचो़मिम, मेसेपा नुङ माम्चु़नीलाई डोक्पु मेबेपा, माम-पाप नुङ मु़चु़ सेट्पामिमकाम लागि, 10 नाम्सु़रु़ बेपामिम, वोस्चो़का वोस्चो़नुङ अम्पामिम, मु़चु़ भ्रेट्पामिम, लिमाचो़मिम, कसम पेपामा मेराम होम्साका मेबेपामिम, माम्चु़नीकु दुथाममिम आच्छाङाकाम सीसिकु कोर्थो़लाम बक्पामिमकाम लागि, मा आच्छाङाकाम सिजेमकु कोर्थो़लाम बक्पा वाङमिमकाम लागि। 11 ओराम सीसि आलाकाम इकीमा माम्चु़नीलामका योक्ताम बु। गुमीका गोलाई ओराम यु़मनुङमा सीसि सीमु ग्वाङडिमी। पावलडला माम्चु़नीकु दिदाम 12 इकीमा ङाचो़ येशू ख्रीष्टलाई आलासो़ र्वाङु, हेङालोने गुमीका गोलाई थो़र लु़इमिम मिम्ङिडिमिमा उनी लाले-पाङकेकु खारी बोमु थुट्ङिडिमिमा यु़म वो ग्वाङ्डिमी। 13 ङादो गो गुमीलाई डक्साका जेङ्डो, उनी मु़चु़मिमकाम थो़मतेर्साक्तोमी, मा उनीमा न नो़बेत्तो लोवो, गो मेथेसाका नुङ थो़र मेलु़साका मेम बेउतोमका माम्चु़नीलामका न-थो़म ल्वाउतो। 14 इकीमा ङाचो़ ने हाङकोम न-थो़मनुङमा नुङ दिदामचो़! गुमीका ख्रीष्ट येशूलामका रोक्पा थो़र नुङ रिखाम छो़म ग्वाङ्डिमी। 15 छु़लचो़मिम सेल्ला ख्रीष्ट येशू सु़म्दिसेरडा योम्डी र्वाक्पा ल्वा आच्छाङा र्वाक्साका रमु बासी सो़, मा छु़लचो़मिमगोडाम गो छो़म डोक्पु छु़लचो़। 16 लावो छु़लचो़मिमगोडाम छो़म डोक्पु छु़लचो़ दु़म्साका वो गोलामका येशू ख्रीष्टका खोत्ले इम्सिक्साका रेम्बोमु चाम्मिनु़, मा गुमीडला थो़र लु़साका हेल्लो वो मेसिपा त्वारो़म ल्वापामिमकाम लागि गो कोले रेम्बेपा मु़चु़ दु़म्मु चापुनु़ र्वाक्साका न-थो़म ल्वाउतो। 17 हेल्लो लोवो साखाम थो़पाम बाट्पा हप, हाम्सी वो मेसिपा, मा मिक्सीका ल्वामु मेझापा कोले कोङङा माम्चु़नीकाम हेल्लो लोवो उनीमा नङ कोसिनु़, मा उनीमा यु़म-झ्वानु़! आमेन। 18 आमा तारापाचो़ होप्माम तिमोथी, इमा दुथाम ङादो माम्चु़नीलाम जेम्मा होङङा गो गानालाई बेबेनी। जो़पा क्वाल्बा बोमु मेर्मिम ल्वा होङङा बे। 19 हेल्लो लोवो थो़रनुङमा दु़म्सामा जो़पा हाम थेट्नाम मेराम बे। कोङ-कोङका आरे मेबेमिवामा मेर्मिमकु थो़र पुयु़लुस्ताम बु। 20 मेर्मिमगोडाम हुमेनियस नुङ अलेक्जेन्डर सो़, मेर्चिपका माम्चु़नीलाई डक्साका मेजेचिनु़ र्वाक्पा सीसिन्चिनु़ र्वाक्साका गो मेर्चिपलाई शैतानकु ल्वाडा ग्वाक्तोचिम बु। |
© Wycliffe Bible Translators, Inc. All rights reserved.
Wycliffe Bible Translators, Inc.