१ थेसलोनिकी 5 - थुलुङ राईङाचो़ येशू योमिमिम नेमकाम लागि झो़म्जो़ल्सिट्नी 1 वा-ल्वाकनी, ओर्मिम खोत्ले हाम्सी दु़म, मेरामकु दुथाम गानीलाई गुकु र्यामुम बुमु मेबासी। 2 हेङालोने खुचु़वा सिन्था रोमिम होङङा चमवो मेलु़मिमनेम ङाचो़ येशू योमी र्वाक्पा गानी जो़होमका चनी। 3 “आकी न भ्रसिक्पा बु, हामकाम वो ङिम मिबु” र्वाक्साका मु़चु़मिमका र्वामिम बुमी। मेराम थारीकाङा गोजु़मे मेसेमका चो़च्चो़ कमु लागि उ थो़म नो़पा थारी रोथामिम होङङा स्वामु मेल्वासाका मेर्मिम कोचोत्ति पुयु़लुमी। 4 लावो वा-ल्वाकनी, गानी तुकुम्चिम होप्माम ओराम सु़म्दिसेरडाम मु़चु़ मेएँ। मेम्मिमका खुचु़वा रोलो होङङा ङाचो़ येशू योमिलो ङाङाया मेदु़म्नी। 5 हेङालोने गानी खोत्ले ओलडाम नुङ नेम्फुम मु़चु़ सो़। सिन्थाम नुङ तुकुम्चिमडाम मु़चु़ गुइ मेएँ। 6 मेम्मिमका वाङमिम मु़चु़ होङङा मेअम्सी, चङचङया बुइ, मा त्वापलाई जो़होमका जु़ल्पा दु़प्सी। 7 अम्पा मु़चु़मिम सिन्था अम्मी, डु़का सेट्पामिमलाई वो सिन्थाङा डु़का सेडु़मी। 8 लावो गुइ ने नेम्फुम मु़चु़ सो़, मेम्मिमका त्वापलाई जो़होमका जु़ली, येशूडा थो़रलु़मुम बुमु मा वाङमिमलाई रिखाम बोमुम बुमु लागि बोपा-थार्पा धक्चीख्रेम फम्सिमु बासी। मेम्मा येशूका सेल्सामी र्वाक्पा नाका बोपा-थार्पा खुचु़खुम खुम्सिमु बासी। 9 माम्चु़नीका उनी छोक्चो गुइडला हान्मु लागि मेएँ, लावो इकी ङाचो़ येशू ख्रीष्टलामका गुइलाई सेल्मु लागि थुसाड्डामी। 10 ख्रीष्ट योमिलो सिपा बुइ लोवो नु़पा बुइ लोवो गुमीनुङङा गुइ हेल्लो लोवो दु़म्सिनु़ र्वाक्साका इकीमा लागि ख्रीष्ट सिम्डी। 11 मेम्मिमका गानी बेत्तोङा बोनिमिम होम्साकाङा इनीमा सो हन्बेबोमु नुङ माम्चु़नीडा हापा थो़रलु़मु लागि ख्लो़बेबेनी। हुम-दडाम मुलु़दुङकु 12 वा-ल्वाकनी, इनीमा थेतेडा छो़म ब्राम्दु़ल्वा बेपा, सीपा मा ङाचो़ येशूडा क्रिपा मु़चु़लाई डोक्पु बेनी र्वाक्साका गानीलाई गुकु छो़म र्वाकु। 13 मेर्मिमका खारी बेम्डिमका रिखाम बेसाका मेर्मिमलाई छो़म डोक्पु बेनी। खोत्ले मु़चु़नुङ दु़साका बानी। 14 वा-ल्वाकनी, भ्रेपा मु़चु़लाई ङिमसाट्नी, ङिपामिमकाम उनी न बन्साट्नी। ख्लो़मु बासिक्पामिमलाई ख्लो़नी। खोत्लेनुङ इम्सिक्साका बानी। 15 रेप्नी, सु़का वो मेजो़पा बेपालाई मेजो़पा मेबु़नु़, लावो त्वाप-त्वापडा नुङ खोत्ले मु़चु़लाई हेल्लो लोवो जो़पा बोमु माल्पा दु़म्नी र्वाक्साका ओराम ल्वा इनीमा नडा जु़ल्नी। 16 हेल्लो लोवो इनीमा नगोडा भ्रन्सिट्नी। 17 हेल्लो लोवो सो़म्दी बेनिम बानी। 18 गानीडला हा-हाम दु़म, मेर्मिम खोत्लेकाम लागि माम्चु़नीलाई आलासो़ ग्वाक्नी। येशू ख्रीष्टकु मु़चु़ दु़म्साका गानी ओरामङा बेनिम बानी र्वाक्पा माम्चु़नीकु न बु। 19 गानीगोडा खारी बोमुडाम माम्चु़नी-पेललाई मेभोप्नी। 20 माम्चु़नीलाममिम-जेसीलाई सेम्ला मेबेट्नी। 21 गानी हाम थो़न्नी मेराम छाम्नी। मेम्मा जो़पा हाम बु मेराम रनी। 22 मेजो़पा खोत्ले ल्वाडाम वाङ बानी। 23 न-गो भ्रसिबेट्पा माम्चु़नीका खोत्लेडा गानीलाई सेपा दु़म्बेन्मिनु़। मेम्मा खोत्ले इनीमा मिरो़म, न-गो, साम ङाचो़ येशू ख्रीष्ट योमिलोसम्म हाम वो मेख्लो़ट्पा दु़म्बेन्मिनु़। 24 गानीलाई येट्पा माम्चु़नी थो़रलु़इमिम बुमी, मेम्मिमका गुमीका आरे बोमिङा सो़। 25 वा-ल्वाकनी, सो़म्दी बेसाट्किनी। 26 खोत्ले वा-ल्वाकमिमलाई ख्रीष्टियनकु रिखामका सेव साट्नी। 27 ङाचो़ येशूकु ङादोडा गो गानीलाई र्वाङु, ओराम सेलाखाजेम डाट्नीमा खोत्ले वा-ल्वाकमिमलाई थो़बेट्नी। 28 इकीमा ङाचो़ येशू ख्रीष्टकु दिदाम गानी खोत्लेनुङ दु़म्नु़। |
© Wycliffe Bible Translators, Inc. All rights reserved.
Wycliffe Bible Translators, Inc.