१ थेसलोनिकी 4 - थुलुङ राईमाम्चु़नीलाई गेर्सिबेत्तो बुमु 1 हुम-दडा, वा-ल्वाकनी, गुकुलाम गानी सीन्सिट्निम होङङा माम्चु़नीलाई गेर्सिबेसाका बानी र्वाक्साका ङाचो़ येशूकु नङडा छो़म र्वाकु। ङादो वो गानी आरेङा बेन्निम बु, मा आथावो छो़म मेमङा बेनी र्वाक्साका इनीमा सो हन्बेन्कु। 2 हेङालोने ङाचो़ येशूकु साखामका गानीलाई गुकु हा-हाम सीत्तोको, मेराम गानी चनी। 3 गानी सेपा दु़म्नी र्वाक्पा माम्चु़नीकु न बु। मेम्मिमका खोत्ले नाम्सु़रु़ बोमुडाम वाङ बानी। 4 इनीमा मिरो़मडा सेपा दु़म्साका नुङ डोक्पु मिम्साका बानी-दोनी। 5 माम्चु़नीलाई मेछेपा थो़रमेलु़पामिम होङङा मेसेमनुङ छो़म अम-अम द्वाक्पा ननुङमा मेदु़म्नी। 6 सु़का वो आरेसाका लु-फेले बेसाका थो़रलु़पा वा-ल्वाकलाई मेजो़पा मेबु़नु़। गानीलाई गुकु ङादोङा र्वाक्तोकोम नुङ ङिमसाट्मा होम्साकाङा आरेप्माम खारी बेपालाई ङाचो़ येशूका देन्दे ग्वामी 7 सेपा मु़चु़ दु़म्मुमा बुमु लागि माम्चु़नीका येसाड्डामिम, मेसेपा दु़म्साका बुमु लागि ने मेएँ। 8 मेम्मिमका सु़का ओर्मिम सीसि मेद्वाकु़, मेरामका मु़चु़लाई मेएँ, माम्चु़नी-पेल ग्वाक्पा माम्चु़नीलाई मेद्वाकु़। 9 लावो थो़रलु़पामिमलाई रिखाम बोमुकु दुथाम गानीलाई गुकु र्यामुम बुमु मेबासी। हेङालोने रिखाम बेबेनी र्वाक्साका माम्चु़नीलाम इनी त्वाकाङा सीन्सिट्निम बु। 10 खोत्ले माकेडोनियाडाम थो़रलु़पामिम खोत्लेलाई गानी आच्छाङा रिखाम बोनी। वा-ल्वाकनी, मेमकाङा आथावो हापा रिखाम बेत्तो लनी र्वाकु। 11 ङादो गुकु गानीलाई र्वाक्तोकोम होङङा लिवा बानी, त्वाकु खारी मिम्पा दु़म्नी, त्वाकाम लागि त्वाकाङा खारी बेनी। 12 मेम्साका थो़रमेलु़पा मु़चु़मिमका इनीमा बेसी-पेसी जो़पा मिम्मी, मा गानी वाङमिमनुङ बिमु वो मेबासी। मु़चु़मिम सिमुलामका बम्गेमी 13 वा-ल्वाकनी, ङादोङा अम्पामिमकु दुथाम चन्जो़ल्नी र्वाक्पा आकीमा न बु। मेम्मा सिइमिम चङडा आथावो नु़इ र्वाक्पा गानी मिम्निमिम ल्वा मेचक्पा मु़चु़मिम होङङा मेयेनि-मेख्राप्नी। 14 येशू सिम्डी मा आथावो बम्गेम्डी र्वाक्पा गुइ थो़रलु़इ। मेम्मिमका येशूडा थो़रलु़साका सिपा मु़चु़लाई माम्चु़नीका फमिमा येशूनुङ रेन्मी र्वाक्पा थो़रलु़इमिम बु। 15 ङाचो़ येशूका गुकुलाई र्वाम्डिम ल्वा गानीनुङ र्वाकु। ङाचो़ ख्रीष्ट ख्लोम्सिमिमिमनेम गुइ सामनुङमाका सिप्ल्याक्पामिमडाम ङादो गुमीलाई मेक्रो़म्डी। 16 डोक्पु-पाह्रीचो़कु लो़लाम नुङ पाह्रीचो़मिमका माम्चु़नीकु भुम डु़प्मिमिमकु लो़लामका ङाचो़ येशू उनी त्वापङा डोक्पु लो़लामका साखामनुङ येत्तो पाह्रीलामका योमी। मेम्मा ख्रीष्टडला थो़रलु़साका सिपामिम ङादोङा बम्गेमी। 17 मेकोतिमा गुइ सामबाट्पा ने ङाचो़ येशूलाई धामुला क्रो़म्डा मेर्मिमनुङङा खासेडलामका माम्चु़नीका कोक्सामी। मेम्लो आथाम हेल्लो लोवो गुइ ङाचो़ येशूनुङ दु़म्सिमिम बुइ। 18 मेम्मिमका ओर्मिम ल्वाका खोत्लेकाम सो हन्बेबेनी। |
© Wycliffe Bible Translators, Inc. All rights reserved.
Wycliffe Bible Translators, Inc.