१ थेसलोनिकी 3 - थुलुङ राई1 गुकु हापासम्म लम्थामुमबुमु मेचाप्कुवा। मेम्मा आकी त्वाप ने एथेन्स शहरडाङा बाट्पा मुलु़ बेत्तोको, 2 लावो आकी ल्वाक तिमोथीलाई इनीमाडा थु़र्तोको। गु माम्चु़नीकु डु़ल्चो़ दु़म्साका खारी बेपा नुङ ख्रीष्टकु दुथाम जो़पा-सेला गुकुनुङ थो़बेट्पा मु़चु़ सो़। गानी माम्चु़नीडा छो़म थो़रलु़पा दु़म्मु गुका ख्लो़नी मा इनी सो हन्बेन्सानी र्वाक्पा आकी न बु। 3 मेम्मा ओर्मिम दु़खाका गानीगोडाम सु़ वो उनी गो मेभ्रसिक्पा मेदु़म्मिनु़। गुकु आरेप्माम दु़खा ल्वामु लागिङा थुसिक्तोकोम र्वाक्पा गानी त्वाकाङा चनी। 4 गुकु गानीनुङ बात्तोकोलो इकीमा थो़मतेर्साक्सामी र्वाक्थाल्तोको। आच्छाङा मेमङा दु़स्ता, मेराम गानी जो़होमका चनी। 5 मेम्मिमका गो इम्मुम बुमु मेचापुवालो इनीमा थो़रकु दुथाम चमु लागि तिमोथीलाई गो इनीमाडा थु़र्तो। याङलो शैतानका इनीमा न छाम्मु चाप्सु़, मा गुकु बेत्तोकोम खारी ब्लाम-ब्लाम बु़ र्वाक्पा आमा ङिम लु़डाम बाइडा। तिमोथीका सो हन्बेट्पा सेला रेड्डु़म 6 लावो इनीमालामका तिमोथी ओम्लो आकीमाडा रोक्ताम बु, मा इनीमा थो़र नुङ रिखामकु दुथाममिम भ्रपा ल्वा रेड्डु़म बु। गानी हेल्लो लोवो गेर्सिद्वाक्तो गुकुलाई मिम्किनी ए, मा गुकुनुङ घ्रो़म्मु न बोनी ए र्वाक्साका गुका सो़यु़डु़। मेम्साकाङा गुकु वो गानीलाई क्रो़म्मु न बोकुमिम बु। 7 मेम्मिमका वा-ल्वाकनी, इनीमा थो़रका खोत्ले आकीमा दु़खाडा नुङ थो़मतेर्सीडा वो आकीमा सो हन्डाम बु। 8 ङाचो़ येशूडा गानी छो़म थो़रलु़पा दु़म्निम बुनी माला आकी साम रोक्पा होङङा दु़म्कु। 9 इकीमा माम्चु़नीकु ङादोडा गानी गेर्सी बेत्तिकिमिमकाम लागि माम्चु़नीलाई गुकु हाङको आलासो़ ग्वाकु लोवो मेलिडु़! 10 गानीनुङ आथावो घ्रो़म्मु मा गानीलाई छो़म थो़रलु़मुडा ख्लो़मु लागि नेम्फु सिन्था सो़म्दी बोकुम बुकु। 11 माम्चु़नी इकी पाप नुङ इकी ङाचो़ येशूका गुकुलाई गानीनुङ क्रो़म्बेन्किमिनु़। 12 गानीलाई गुकु रिखाम बोकुमिम होङङा इनी त्वाप-त्वापडा बेबोनिमिम रिखाम ङाचो़ येशूका बर्बेन्सानिमिनु़ मा वाङमिम मु़चु़मिमलाई छो़म रिखाम बेपा दु़म्बेनिमिनु़। 13 माम्चु़नीका गानीलाई छो़म थो़रनुङमा दु़म्बेनिमिनु़, मेम्साका इकी ङाचो़ येशू खोत्ले सेपा उनी मु़चु़मिमनुङ योमिलो माम्चु़नी पापकु ङादोडा गानी मेख्लो़ट्पा नुङ सेपा दु़म्नी। |
© Wycliffe Bible Translators, Inc. All rights reserved.
Wycliffe Bible Translators, Inc.