१ थेसलोनिकी 2 - थुलुङ राईथेसलोनिकेडा पावलका बु़डु़म खारी सो़यु़डु़म 1 वा-ल्वाकनी, इनीमाडा गुकु रोक्तोकोम हाम ना हाम मेदु़प्सावा र्वाक्पा गानी त्वाकाङा चनी। 2 गुकु इनीमाडा रोमु ङादोङा फिलिप्पी शहरडा हाङको छो़म मेजो़पा बेत्तिकिमी, मा दु़खा ग्वाक्तिकिमी, मेराम गानी चनी। मु़चु़मिम छो़म आकी कोर्थो़लाम बम्डिङा लोवो माम्चु़नीका ख्लो़त्तिकिमका मेङिसाका गुकु उनीमा जो़पा-सेला गानीलाई थो़बेत्तोको। 3 गानीलाई गुकु थो़बेत्तोकोम ल्वा ने लिमा ल्वा मेबायावा। मेजो़पा ननुङमा वो मेबायावा मा सु़लाई लु-फेले बेपा आकीमा न मिबु। 4 लावो जो़पा-सेला थो़बेट्पा दु़म्बेन्मु लागि माम्चु़नीका घ्रेट्पा दु़म्बेत्तिकिम होम्साका गुकु सीकु। मु़चु़मिमलाई ने गर्सिबेट्पा मेएँ, लावो इकीमा न-गो छाम्पा गेर्सिबेट्पा आकी न बु। 5 ओराम ने गानी वो जो़होमका चनी, गुकु हेल्लो वो गानीनुङ लोमालेपा ल्वा मेबेकुवा, गानीलाम खउलुङ ल्वामु लागि गुकु हेल्लो वो इनीमा ङोप्सो़ मेलिसिट्कुवा। आकीमा दुथाम खोत्ले ल्वापा माम्चु़नी बुमी। 6 मु़चु़मिमलाम गुकु कोला मेसो़सिट्कुवा मा गानीलाम वो मेएँ, वाङमिमलाम वो मेएँ। 7 गुकु ख्रीष्टकु थु़र्मा दु़म्साका वो गानीलाम डोक्पु बेला मेसो़सिट्कुवा। लावो त्वाकु चो़च्चो़मिमलाई डु़ल्पा माम होङङा गानीगोडा गुकु याक्के दु़म्तोको। 8 गानीलाई गुकु छो़म रिखाम बेत्तोकोमका माम्चु़नीकु जो़पा-सेला गानीनुङ सो़मु कोङङा मेएँ, लावो इनीमा लागि आकीमा साम फ्यामु वो गेर्सिद्वाक्पा बात्तोको। हेङालोने गानी छो़म आकी द्वादीबुङ दु़म्निम बाइडा। 9 वा-ल्वाकनी, गुकु मेचाप्तो खारी नुङ ब्राम्दु़ल्वा बेत्तोकोम ने गानी चनिमिमङा बु। माम्चु़नीकु जो़पा-सेला गानीलाई थो़बेत्तोकोलो पोमु-डुमुडा भुक्ता मेग्वामुमि र्वाक्साका नेम्फु सिन्था खारी बेत्तोको। 10 गानी थो़रलु़पामिमनुङ बात्तोकोलो गुकु सेपा मु़चु़, माम्चु़नीकु ङादोडा जो़पा दु़म्पा, मा हाम वो मेख्लो़ट्पा बात्तोको। मेराम ल्वापा गानी बुनी मा माम्चु़नी वो बुमी। 11 कोले पापका उ चो़मिमलाई बु़मिमिम होङङा गुकु इनीमा सो हन्बेत्तोको, लु़म्ला बेत्तोको, छो़म र्वाक्तोको, मेराम गानी चनिमिम बु। 12 हेङालोने माम्चु़नीका घ्रेट्पा मिम्मिमिम लाम्दीडा गानी बानी-दोनी। गुमीका उनीमा किब्दी नुङ यु़म-झ्वाक्सी ग्वामु लागि गानीलाई येनिमी। 13 माम्चु़नीलाई गुकु हेल्लो लोवो आलासो़ ग्वाकु, हेङालोने उनीमा सिजेम गुकुलाम गानी थो़न्निलो मु़चु़मिमकु ल्वा होङङा मेएँ, माम्चु़नीकु सिजेमङा र्वाक्साका रन्नी। मेराम आच्छाङा माम्चु़नीकु सिजेम सो़, उहेमका गानी थो़रलु़पामिम गोडा खारी बु़। 14 हेङालोने वा-ल्वाकनी, ख्रीष्ट येशूडा बाट्पा यहूदियाडाम माम्चु़नीकु मण्डलीमिमकु बेसी गानी बेन्निम बु। मे थो़रलु़पामिमलाई त्वाकु मु़चु़ यहूदीमिमकाङा दु़खा ग्वाम्डिम होङङा गानीलाई वो इनीमा नेब्दीडाम मु़चु़मिमका दु़खा ग्वानिमिम बु। 15 मेर्मिम यहूदीका ङाचो़ येशू नुङ माम्चु़नीलाम-जेपामिमलाई सेट्मिडी, मा गुकुलाई वो खासोक्तिकी। मेर्मिमका माम्चु़नीलाई गेर्सी मेबेन्मी, मा खोत्ले मु़चु़कु कोर्थो़लाम बमी। 16 मेर्मिमका गुकुलाई वाङसामामिम सेल्सिक्पा जो़पा-सेला थो़बेन्मुडाम भोप्तिकी। आरे बेसाका मेर्मिमका हापा छु़लमिम बेत्तो लम्डी। मेर्मिमडाम छो़म माम्चु़नीकु छोक्चो बक्ताम बु, मा हुम-दडा मेर्मिमलाई देन्दे ग्वामी। थेसलोनिकीमिमलाई पावलका क्रो़म्मु छो़म न बु़डु़म 17 वा-ल्वाकनी, गुकु घरिकोङ गानीडाम फ्वासिक्तोको लोवो आकीमा न-गोका गानीलाई हेल्लो वो मेडिट्कुवा। गुकु इनीमाडा ख्लोम्सिमु छो़म माल्तोको हेङालोने गानीनुङ आथावो घ्रो़म्मु छो़म न बेत्तोकोम बाइडा। 18 गुकु इनीमाडा रोमु छो़म माल्तोको, मा गो पावल ने हापा खेपङा रोमु माल्तो, लावो शैतानका भोप्तिकी। 19 इकी ङाचो़ येशू योमिलो उनी ङादोडा हाम-हुम ल्वापा आकी न लोवो, आकी न-भ्रसी लोवो, आकी पुरस्कार लोवो, गानीङा मेएँ मा? 20 आकी न-भ्रसी नुङ आकी यु़म-झ्वाक्सी आच्छाङा गानीङा सो़। |
© Wycliffe Bible Translators, Inc. All rights reserved.
Wycliffe Bible Translators, Inc.