१ थेसलोनिकी 1 - थुलुङ राईपावलकु सेव 1 गो पावल, सिलास नुङ तिमोथीका गानी थेसलोनिकीडाम मण्डलीलाई ओराम सेलाखाजेम र्याक्तोङा बोकु। माम्चु़नी पाप नुङ ङाचो़ येशू ख्रीष्टडा गानी बुनी। माम्चु़नीलाम दिदाम नुङ न-भ्रसी ल्वानी। थेसलोनिकीडाम थो़रलु़पामिमकु थो़र 2 गानी खोत्लेकाम लागि गुकु हेल्लो लोवो माम्चु़नीलाई आलासो़ ग्वाकु, मा इनीमा लागि सो़म्दी बोकुम बुकु। 3 थो़रका बेबेट्निम इनीमा खारी, रिखामका बेबेट्निम ब्राम्दु़ल्वा नुङ इकीमा ङाचो़ येशू ख्रीष्टडाम हाम हुम ल्वापा नका बेबेट्निम इनीमा इम्सी माम्चु़नी पापनुङ सो़म्दी बोकुलो मिम्कुम बुकु। 4 वा-ल्वाकनी, माम्चु़नीका गानीलाई रिखाम बेन्निमी, मा उनीमा मु़चु़ दु़म्मु लागि छेट्निमी र्वाक्पा गुकु चकु। 5 हेङालोने गानीलाई गुकु थो़बेत्तोकोम जो़पा-सेला ने ल्वा कोङङा मेएँ। लावो ओराम ने यु़मनुङमा नुङ माम्चु़नी-पेललामका छो़म थो़रबिइमिम बाइडा। गानीनुङ गुकु बात्तोकोलो इनीमा लागि हेसाका बात्तोको मेराम गानी चनिमिम बु। 6 ङाचो़ येशू नुङ आकीमा बेसी बेपा गानी दु़म्नी। छो़म इम्मु मेझापा दु़खाडा लोवो माम्चु़नी-पेलका गेर्सी बेट्निमका गानी सिजेम रन्नी। 7 मेम्मिमका माकेडोनिया नुङ अखैयाडाम थो़रलु़पा खोत्लेका इनीमा बेसी बोमी। 8 हेङालोने गानीलामका ङाचो़ येशूकु सिजेम खोत्ले माकेडोनिया नुङ अखैयाडा कोङङा थो़म्डिम मेएँ, लावो माम्चु़नीडा बेन्निम इनी थो़रकु दुथाम खोत्लेथो़ फोन्सिड्डाम बु। मेम्मा गानीलाई गुकु र्वामुम बुमु बासिक्पा वाङमिम ल्वा हाम वो मिबु। 9 गुकु इनीमाडा रोक्तोकोम थारीका गानी गुकुलाई जो़होमका हुनाखाना बेत्तिकी। मेम्मा ङाटामिमलाई सेव सान्मु डिसाका आच्छाङाकाम नुङ हाम्सी वो मेसिपा माम्चु़नीकु लाले-पाङके बोमु ख्लोन्सिट्नी। ओर्मिम खोत्ले ल्वाकु दुथाम मेर्मिमका सो़मी। 10 मेर्मिमका आरे वो र्वामी, माम्चु़नीका सिमुलाम फम्डिम पाह्रीलाम योक्पा उनीमा तारापाचो़ येशूलाई गानी लन्थानिमिम बु ए। रोमुखापा ङिमलु़पा माम्चु़नीकु नियाडाम येशूका गुइलाई वाङ बेसामी। |
© Wycliffe Bible Translators, Inc. All rights reserved.
Wycliffe Bible Translators, Inc.