१ पत्रुस 5 - थुलुङ राईमण्डली रेपामिम नुङ स्वालामिमलाई मुलु़दुङकु 1 गानीगोडाम मण्डली रेपा ङाउमिमलाई गो छो़म र्वाङु, हेङालोने गो वो मण्डली रेपा कोले ङाउङा सो़। ख्रीष्टका दु़खा ल्वाम्डिम ल्वापा गो वो सो़, मा दिफु झ्वामिम उनीमा यु़म-झ्वाक्सी गो वो ल्वाउ। 2 माम्चु़नीका गानीलाई रेम्बेबेट्निमिम उनी थो़र लु़पामिमलाई रेप्नी। न मेबिसिक्साका मेएँ लावो माम्चु़नीका न बोमिमिम होङङा त्वाकु नकाङा बेनी। रारी बेसाका मेएँ लावो चापे-डुपे छो़म बेबेद्वाक्पा नका रेपा मु़चु़ दु़म्नी। 3 गानीलाई रेम्बेबेट्मा मु़चु़मिमडला साखाम थो़साका मेएँ लावो मेर्मिमकाम लागि कोले रेम्बेपा मु़चु़ दु़म्साका रेप्नी। 4 मेम्मा भेन्दा रेपा-क्रिपा खोत्लेडाम डोक्पु रोमी। मेम्मा उ जो़प्सी हेल्लो वो मेदाम्पा यु़म-झ्वाक्सीकु मुकुट गानी ल्वानी। 5 मेम्साकाङा स्वालानी, गानी ङावामिमकु साखामगोयु़ बानी। गानी खोत्ले त्वाप-त्वापडा ख्लो़या-बाया बेबोमु छो़म याक्के दु़म्नी। “डोक्पु लिसिक्पा मु़चु़कु कोर्थो़लाम माम्चु़नी बमी, लावो याक्के दु़म्पामिमडला न-थो़म रेम्बोमी।” 6 मेम्मिमका माम्चु़नीकु यु़मनुङमा गोजु़डा याक्के दु़म्साका बानी। मेम्मा गुमीका गानीलाई जो़पा थारीका खोत्लेडाम डोक्पु दु़म्बेनी। 7 खोत्ले इनी मिम्ताम-सो़र्ताम गुमीलाई ग्वाक्नी, हेङालोने गुमीका गानीलाई रेम्निमी। 8 इनी त्वापलाई जो़होमका जु़ल्नी, मा चङचङया बानी। इनी स्वाक्चिमो शैतानका सु़लाई डारुमा क्लिडोक्पु र्वाक्साका क्रुक्बाल्पा धेन्द्रा होङङा लाम्दिबाल। 9 छो़म थो़रलु़पा दु़म्निम बानिमा शैतानकु कोर्थो़लाम बक्नी, हेङालोने खोत्ले सु़म्दिसेरडा बाट्पा थो़रलु़पा वा-ल्वाकमिमका वो आरेप्मामङा दु़खा ल्वामिम बुमी। 10 खोत्ले दिदाम ग्वाक्पा माम्चु़नीका गानीलाई ख्रीष्टनुङ कोले दु़म्सीडा हेल्लो लोवो दु़म्पाम बाट्पा उनी यु़म-झ्वाक्सीकु दो़दो़वा ल्वामु येट्निम बु। घरिकोङ गानी दु़खा ल्वानिमिम चङडा गुमीका गानीलाई आथावो लाले दु़म्बेनी, थो़रलु़पाम बाट्पा दु़म्बेनी मा सोनुङमा दु़म्बेनी। 11 खोत्ले यु़म हेल्लो लोवो उनीमाङा दु़म्नु़म बुनु़। आमेन। हुम-दडाम पत्रुसकु सेव 12 थो़रलु़इमिम लु़ङडोम ल्वाक सिलासलामका ओराम कति दु़पा सेलाखाजेम गानीलाई र्याक्तोङा लेट्पु। इनीमा सो हन्बेन्मु नुङ ओराम माम्चु़नीकु आच्छाङाम दिदाम सो़ र्वाक्पा गानीनुङ सो़मु र्याक्तोङा बेउ। ओरामडा गानी दु़म्निम बानी। 13 बेबिलोनडा बाट्पा मण्डलीका गानीलाई सेव र्वाक्ताम बु, मा आमा तारापाचो़ होप्माम मर्कूसका वो गानीलाई सेव र्वाक्ताम बु। 14 इनी त्वाप-त्वापगोडा थो़र लु़पाकु रिखामका सेव सान्बेनी। ख्रीष्टडा बाट्पा गानी खोत्लेनुङ न-गो भ्रसी दु़म्नु़। |
© Wycliffe Bible Translators, Inc. All rights reserved.
Wycliffe Bible Translators, Inc.