१ पत्रुस 4 - थुलुङ राईमाम्चु़नीकाम लागि नु़नी-बानी 1 मेम्मिमका ख्रीष्टका उनी मिरो़मडा दु़खा ल्वाम्डी, गानी वो गुमी होप्मामङा दु़खा इम्मु नडा झो़म्जो़ल्सिट्नी। हेङालोने उहेमका मिरो़मडा दु़खा ल्वास्तु़म बु मेरामका छु़ल बोमु डिड्डु़म बु। 2 मेम्मा आथाडा आनो गु सु़म्दिसेरडाम मेजो़पा उ न होम्साका मेदो, लावो माम्चु़नीकु न होम्साका दो। 3 वाङसामामिमका बोमु न बेम्डिम होङङा नाम्सु़रु़, वाङमिम मेसेमनुङ अम्पा न, डु़सेवा, एलेङगी बेसाका पेपा ग्रुलाडा नुङ घ्राम्लु़पा ङाटा सेव सासीडा गानी छो़म नेम ताबेट्नी। 4 मेर्मिमका बोमिमिम होप्माम मेजो़पा गानी मेबोनिमिम ल्वासाका मेर्मिम ङाङाया दु़म्मी। मेम्मा मेर्मिमका गानीलाई डक्साका जेमी। 5 लावो सिपा नुङ नु़पामिमकु निया बेपा माम्चु़नीकु ङादोडा मेर्मिमका सो़मु बासी। 6 मेम्मिमका हेल्लो वो मेसिपा त्वारो़म मेल्वापामिमलाई जो़पा-सेला थो़बेट्मिडी, मा खोत्ले मु़चु़ होङङा मेर्मिम सिमुङा बासावा लोवो आथा ने मेर्मिम पेलडा माम्चु़नीनुङ हेल्लो लोवो नु़मिम बुमिनु़। 7 सु़म्दिसेरकु हुक्पा थारी रोक्फाड्डाम बु। मेम्मिमका चङचङया बानी मा इनी त्वापलाई जो़होमका जु़ल्नी, मेम्मा गानी सो़म्दी बोमु चापा दु़म्नी। 8 खोत्लेडाम डोक्पु ल्वा, छो़म रिखाम बेबेनी। हेङालोने हापा सेर्पा छु़लमिमलाई रिखामका ङ्याकु़। 9 सु़म्बुर्मा मेकिसाका कोलेका कोलेकाम चापे-डुपे बेबेनी। 10 गानी खोत्लेका वाङमिमकु चापे-डुपे बोमु लागि राप्लावा ल्वान्निम बु। दिदामकु खाल-खालकाम राप्लावामिमडा माम्चु़नीकु जो़पा डु़ल्चो़मिम दु़म्नी। 11 कोङनिम मु़चु़ जे माला माम्चु़नीकु सिजेम जेमिम होङङा मेरामका जेनु़। चापे-डुपे बु़ माला माम्चु़नीका ग्वामिमिम सोका बु़नु़। मेम्साका खोत्ले ल्वाडा येशू ख्रीष्टलामका माम्चु़नीकु नङ कोसिनु़। उनीमाङा हेल्लो लोवो यु़म नुङ यु़म झ्वानु़म बुनु़। आमेन। थो़रलु़पा दु़म्निमका दु़खा ल्वानी 12 ङोप्सो़नी, हेल्लो वो मेल्वाम्मा हाम हुम गानीडला दु़म्मिम होङङा गानीलाई छाम्पा इनीमा थो़म्बोक ख्वाक्पा दु़खा ल्वानिलो ङाङाया मेदु़म्नी। 13 लावो ख्रीष्टका होङङा गानी वो दु़खा ल्वानिलो इनी न भ्रसिनु़। मेम्मा उनी यु़म-झ्वाक्सीडा गुमी रेम्बेम्सिमिलो गानी छो़म गेर्सी द्वाक्नी। 14 ख्रीष्टडा थो़र बेन्निमका छेम-छेम दुला सो़न्सिट्नी माला गानी आलाकाम सो़। हेङालोने माम्चु़नीकु यु़मनुङमा पेल गानीगोडा दु़म। 15 गानी दु़खा ल्वानी माला मु़चु़ सेट्पा, खुपा, मेजो़पा खारी बेपा, वाङमिमकु खारीडा थेट्पा लिसिक्पा होङङा दु़खा मेल्वानी। 16 लावो गानी थो़रलु़पा दु़म्निमका दु़खा ल्वानी माला ने इनी क्रो़म मेलु़नु़। मु़चु़मिमका गानीलाई थो़रलु़पा र्वामिमिमकाम लागि माम्चु़नीलाई आलासो़ ग्वाक्नी। 17 हेङालोने माम्चु़नीकु मु़चु़मिमलामकाङा निया दु़म्मु चो़म्सिक्पा थारी रोक्ताम बु। निया दु़म्मु गुइलामकाङा चो़म्सी माला ने माम्चु़नीकु जो़पा-सेला होम्साका दोमु मेद्वाक्पामिमलाई ने हाम दु़म? 18 मेम्मा, “माम्चु़नीकु नहोङङा खारी बेपामिम ने मेझामहोमका सेल्सिमी माला माम्चु़नीकु लाम्दीडा मेलाम्दिपामिम नुङ छु़लचो़मिम ने हे दु़म्मी?” 19 मेम्मिमका माम्चु़नीकु न होम्साका दु़खा ल्वापामिमका थो़रलु़इमिम प्रङपा माम्चु़नीकाडा उनी त्वापलाई ग्वामिनु़ मा जो़पा खारी बोमिनु़म बुमिनु़। |
© Wycliffe Bible Translators, Inc. All rights reserved.
Wycliffe Bible Translators, Inc.