१ पत्रुस 3 - थुलुङ राईवोचु़ नुङ नाइमे 1 गानी नाइमेमिम वो मेम्साकाङा इनी त्वाकु वोचु़कु साखामगोडा बानी, मा मेर्मिमका माम्चु़नीकु सिजेमडा थो़र मेबोमी माला वो हाम वो मेसो़साका उनी नाइमेमिमकु बासी-पेसीलामका, 2 इनीमा जो़पा बासी-पेसी नुङ माम्चु़नीकु ङिम जु़ल्निमिम ल्वामिमा वोचु़मिमलाई थो़रलु़पा दु़म्बेनी। 3 सेम बनेबेसाका, सो़नाकु ल्वालाङ बासाका नुङ हापा थिकाम ये-सेमका उ डडलाममिम इनी जो़प्सी मेदु़म्नु़। 4 इनीमा जो़प्सी ने न-गोलाममिम दु़म्मु बासी। मेराम हेल्लो वो मेदाम्पा याक्के दु़म्सी नुङ लिबा बासी सो़। माम्चु़नीकु ङादोडा मेराम हापा थिकाम दु़म। 5 आरेसाकाङा माम्चु़नीकु नङका सान्सिक्पा माकेम मेसेममिमका वो माम्चु़नीलाम हाम-हुम ल्वापा न बेसाका उनी त्वापलाई जो़प्सीमा बनेबेम्डी। मेम्मा उनी वोचु़कु साखामगोडा बाम्डी। 6 सारा मेप्माम मेसेम बाइडा, उमा वोचु़ अब्राहामका र्वाक्ताम गुका थो़स्तु़, मा अब्राहामलाई उ हप र्वाक्ता। जो़पा खारी बेन्निमा हामडा वो मेङिनिवा माला गानी साराकु जाउमोचो़मिम सो़। 7 वोचु़नी, मेम्साकाङा गानी इनीमा नाइमेनुङ दु़साका मा ख्लो़या-बाया बेबेसाका बानी। गानी इनी नाइमेलाई डोक्पु मिम्मु बासी। गानीडाम मेर्मिम मेचापा बुमी। लावो माम्चु़नीका गानीलाई निफिलाई कोलेङा आच्छाङाकाम त्वारो़म ग्वाक्निम बु। आरे बोनिमा गानी सो़म्दी बोनिलो भोपा हाम वो मेदु़म। जो़पा खारी बिइलो दु़म्पा दु़खा 8 हुम-दडा, गानी खोत्ले कोले नकाम दु़म्साका बानी। कोलेका कोङमीकु दु़खाडा रेम्बेबेपा दु़म्नी, वा-ल्वाकलाई होङङा रिखाम बेबेनी, न-थो़मनुङमा दु़म्नी, मा याक्के दु़म्नी। 9 मेजो़पा बेपालाई मेजो़पा मेबेनी मा डक्साका जेपालाई डक्साका मेजेनी, लावो मेर्मिमलाई जि-वा ग्वाक्नी। हेङालोने माम्चु़नीका गानीलाई जि-वा ग्वामु लागिङा येट्निम सो़, मेम्साका गानी जि-वा ल्वानी। 10 हेङालोने माम्चु़नीकु सिजेमका आरे र्वा, “गानी गेर्सिक्साका बुमु द्वानी मा गेर्सिमु नेममिम रेम्नी माला मेजो़पा जेमुडाम इनी लेम वाङ जु़ल्नी, मा लिमा थेन्मुडाम इनी सि वाङ जु़ल्नी। 11 मेजो़पा खारी बोमुलामका ख्लोन्सिट्नी मा जो़पा खारी बेनी। न-भ्रसिक्साका बुमु छो़म माल्नी मा मेराम माल्निम बानी। 12 माम्चु़नीकु मिक्सी जो़पा खारी बेपा मु़चु़मिमडला दु़म, मा उनी नोफ्ला मेर्मिमकु सो़म्दीथो़ ह्वासिक्पा दु़म। लावो माम्चु़नीकु ङाली मेजो़पा खारी बेपामिमकु कोर्थो़लाम दु़म।” 13 गानी जो़पा खारी बोमु छो़म न बोनी माला सु़का गानीलाई मेजो़पा बोनी मा? 14 लावो माम्चु़नीकु न-गो होम्साका खारी बोनिलो वो दु़खा ल्वानी माला ने गानी आलाकाम सो़। मेर्मिमकु ङिमसासीडाम मेङिनी, मा इनी लो़ मेदाम्नु़। 15 मेम मेदु़म्साका, ख्रीष्ट इनी ङाचो़ होङङा उनीमा सो़रलोले बेनी। गानी थो़र लु़निमिमकु दुथाम कोङनिमका हिलाहिसी बेम्डी माला मेर्मिमनुङ सो़मु लागि हेल्लो लोवो झो़म्जो़ल्सिट्नी। याक्के दु़म्साका नुङ माम्चु़नीकु ङिम जु़ल्साका आरे बेनी। 16 गानी इनी ननुङमा दु़म्नी, मा मेम्साका ख्रीष्टडा बाट्पा जो़पा इनी बासी-दोसीका इनीमा कोर्थो़लाम मेजो़पा जेपामिमकु उनी मेजो़पा जेसीडा उनी क्रो़म लु़नु़। 17 मेजो़पा खारी बेसाका दु़खा ल्वामुडाम जो़पा खारी बेसाका दु़खा ल्वामुङा माम्चु़नीका न बोमिमिम माला ओराम जो़पाङा सो़। 18 इकीमा छु़लमिमकाम लागि ख्रीष्ट सिम्डी। कोखेप गुमी सिम्डिम बाइडा, आथा ने सिमु मेबासी। गुमीका हेल्लो वो छु़ल मेबेमिवा लावो गानीलाई माम्चु़नीकाडा रेन्मु छु़लचो़मिमकाम लागि गुमी सिम्डी। मिरो़मडा सिसाका गुमीका दु़खा ल्वाम्डी, लावो पेलडा गुमी नु़साका बम्गेम्डी। 19 ओराम पेलडाङा गुमी बन्थाट्मा पेलमिमकायु़ लम्डिमा गुमी घ्वाम्डिमकु दुथाम र्वाम्डी। 20 मेर्मिमका माके माम्चु़नीका र्वाम्डिम होम्साका मेबेमिवा। नोआका कुबी-बोक्सा बनेबु़डु़लोसम्म माम्चु़नीका इम्साका लम्थाट्मिडिम बाइडा। मेराम कुबी-बोक्सागोनो खोत्ले लेत्ले मु़चु़मिम कोङङा कुड्डा प्लु़म्सिमुडाम सेल्सिम्डिम बाइडा। 21 मेराम कुका कु-रु़दु़म रेम्बु़, उहेमका गानीलाई सेल्नी। ओरामका मिरो़मडाम घ्राम्लु़पा तु़ पार्मा होप्माम मेएँ, लावो ननुङमाका माम्चु़नीडा याचे जेम्मा ल्वा सो़। ओरामका येशू ख्रीष्टकु सिमुलाम बग्गेसीलामका गानीलाई सेल्नी। 22 ख्रीष्ट पाह्रीला लम्डी मा माम्चु़नीका खोत्ले पाह्रीचो़मिम, साखाम नुङ यु़म बाट्पा धामुलाम पेलमिमलाई येशू ख्रीष्टकु साखामगोडा बेसाका गुमीलाई उनीमा जो़प ल्वालाम गन्बेट्मिडिम बु। |
© Wycliffe Bible Translators, Inc. All rights reserved.
Wycliffe Bible Translators, Inc.