१ पत्रुस 2 - थुलुङ राईनु़बेट्पा लुङ नुङ सेपा मु़चु़मिम 1 मेम्मिमका खोत्ले मेजो़पा ल्वा, लिमा जेसी, मिनी मिक्सीलामडा जो़पा बेपा लिसिसी, नाचु़र नुङ डक्साका जेपा जेसीमिम पार्नी। 2 मालो गक्पा चो़च्चो़का उमा मामकु दु़दु़ डुमु मालु़मिम होङङा गानी वो माम्चु़नीकु सिजेम थो़पा छो़म न बेनी। मेम्साका माम्चु़नीडलाम इनी थो़र बर्तो ल, मा गानी सेल्सिनी। 3 ङाचो़ न-थो़मनुङमा बुमी र्वाक्पा गानी ल्वामु दु़म्निम बु। 4 ङाचो़ येशूडा रोक्नी, गुमी नु़बेट्पा लुङ सो़। गुमीलाई मु़चु़मिमका पार्मिडिम लुङ लावो माम्चु़नीका छेट्मिडिम मा छो़म डोक्पु मिम्मुका घ्रेट्पा बुमी। 5 गानीलाई वो माम्चु़नीका नु़पा लुङ होप्माम दु़म्बेसाका सो़रलोले दु़म्पा नेम बनेबोनिमी। गानी येशू ख्रीष्टलाम माम्चु़नीलाई गेर्सीबेट्पा उनीमा सेपा डु़म्लाचो़ बुनी। 6 हेङालोने माम्चु़नीकु सिजेमका आरे र्वा, “डोक्पु दु़म्मुकाम लागि थुट्मा नेमकु फारगोयु़म कोले डोक्पु लुङ गो यरूशलेमडा जु़लु, मा उहेमका गुमीडला थो़र बु़ मेरामकु नो़-कल हेल्लो वो मेल।” 7 मेम्मिमका गानी उहेमका थो़रलु़नी, इनीमा लागि गुमी ने इनी डोक्पु दु़म्सी सो़, लावो थो़रमेलु़पामिमकाम लागि ने, “उहेम लुङ नेम चिर्पामिमका पार्मिडी, मेरामङा नेमकु फारगोयु़म डोक्पु लुङ दु़स्ता।” 8 मेम्मा, “मु़चु़मिमलाई दुबेट्पा कोले लुङ नुङ मेर्मिमलाई चार्पा भ्र्वा।” मेर्मिमका माम्चु़नीकु सिजेम होम्साका मेबोमी मा दुम्सिमी। मेर्मिमडला आरे दु़म्मुङा माम्चु़नीका मुलु़ बेम्डिम बाइडा। 9 लावो गानी ने माम्चु़नीका थुट्निम पाइमाखा, हपकु डु़म्लाचो़मिम, माम्चु़नीकु नङका साट्पा सामा, गानीलाई तुकुम्चिमलामका हेल्लो वो मेल्वाम्मा ओलडा रेट्निमिम माम्चु़नीकाम उनी त्वाकु मु़चु़मिम सो़। गुमीका मु़चु़मिमलाई छो़म जो़पा खारी थो़बेन्मु लागि गानी थुट्निम बु। 10 कोबिलि गानी माम्चु़नीकु मु़चु़ मेबानिवा, लावो ओम्लो गानी माम्चु़नीकु मु़चु़ दु़म्निम बु। कोबिलि गानी माम्चु़नीलाम न-थो़म ल्वान्निम मेबायावा, ओम्लो गानी गुमीलाम न-थो़म ल्वान्निम बु। 11 द्वादीबुङ ङोप्सो़नी, गो गानीलाई छो़म र्वाङु, ओराम सु़म्दिसेरडा गानी कोलेम-नलेम बाट्पा नुङ वाङथो़लाम रोक्पा मु़चु़ होप्माम सो़। थेसिथेट्निमा इनी गोनो क्वाल्बा बेपा मिरो़मडाम मेजो़पा ल्वामिमडाम वाङ बानी। 12 थो़रमेबेपा इनी साउखोरेमिमकु थेतेडा चङको-चङको दु़म्साका जो़होमका बानी। गानी मेजो़पा खारी बेन्नी र्वाक्साका मेर्मिमका मेजो़पा ल्वा इनी बुइडला बुम्डिङा लोवो मेर्मिमका जो़पा इनी खारी ल्वामिनु़, मा सु़म्दिसेरकु निया बेप्डा योमिमिमनेम मेर्मिमका माम्चु़नीलाई डोक्पु मिम्मिनु़। ङाचो़काम लागि साखामचो़मिमकु साखामगोडा बुमु 13 ङाचो़काम लागि मु़चु़कु खोत्ले साखाम गोडा बानी, छो़म डोक्पु साखामनुङमा हप दु़म्नु़का 14 किब्दी साखामचो़ दु़म्नु़, मेर्मिम ने मेजो़पा खारी बेपालाई देन्दे ग्वामु, मा जो़पा खारी बेपालाई डोक्पु बोमु लागि थुम्सिम्डिम दु़म। 15 हेङालोने गानी जो़पा खारी बेसाकाङा नेप्ची मान्थिम मु़चु़का थेसिमेथेट्मिवाम जेसी लिवा बाबेन्मु बासी र्वाक्पा माम्चु़नीकु न बु। 16 गानी फ्वाक्मा बुनी मा वो माम्चु़नीकु डु़ल्चो़ गानी बुनी। मेम्मिमका फ्वासिङ्डोम बु र्वाक्साका मेजो़पा खारी मेबेनी। 17 खोत्ले मु़चु़मिमलाई डोक्पु मिम्नी। थो़रलु़पा वा-ल्वाकमिमलाई रिखाम बेनी। माम्चु़नीकु ङिम जु़ल्नी, हपलाई डोक्पु मिम्नी। 18 डु़ल्चो़नी, इनी नेमहपमिमलाई छो़म डोक्पु मिम्साका मेर्मिमकु साखामगोडा बानी। जो़पा नुङ न-थो़मनुङमाकाडा कोङङा मेएँ, न-थो़म मान्थिमकु साखामगोडा वो बानी। 19 कोङनिम मु़चु़का माम्चु़नीलाई मिम्साका मेडेङा दु़खा इम्डु़ माला माम्चु़नी गेर्सिप्मी। 20 गानी मेजो़पा खारी बेसाका डेम्ला सो़न्सिनिमा इम्नी माला गानी हाम ल्वानिमा? लावो गानी जो़पा खारी बेसाका वो दु़खा ल्वानिमा इम्नी माला माम्चु़नी गानीडाम गेर्सिप्मी। 21 आरेप्मामङा दु़खा इम्मुकाम लागि माम्चु़नीका गानीलाई येट्निमिम सो़। हेङालोने गानी उनी सु़ल-सु़ल लाम्दिनी र्वाक्साका ख्रीष्टका वो इनीमा लागि इम्मिडिमा रेम्बेट्निमी। 22 “गुमीका हेल्लो वो छु़ल मेबेमिवा, मा सु़लाई वो लु-फेले मेबेमिवा।” 23 मु़चु़मिमका गुमीलाई डक्साका जेम्डिलो गुमीका मेर्मिमडला उनी छोक्चो मेहाट्मिवा। गुमीका दु़खा इम्मिडिलो सु़लाई वो ङिम मेसाट्मिवा। लावो जो़होमका निया बेपाकु ल्वाड्डा उनी त्वाप जु़ल्मिडी। 24 गुमीका इकी छु़लमिम उनीमा मिरो़मडा क्रूसडला कुर्मिडी। उनीमा पारमिमका गानी सन्निम बु। मेम्साका छु़ल मेबिइनु़ मा माम्चु़नीकु न-गो होम्साका नु़इनु़। 25 ताङताहेरथो़ लक्पा भेन्दा होप्माम गानी बान्नी। लावो ओम्लो गानीलाई बोपा-थार्पा नुङ इनी रेपा-क्रिपाथो़ गानी ख्लोन्सिट्निम बु। |
© Wycliffe Bible Translators, Inc. All rights reserved.
Wycliffe Bible Translators, Inc.