१ पत्रुस 1 - थुलुङ राई1 येशू ख्रीष्टकु थु़र्मा पत्रुसका, पोन्टस, गलातिया, कापाडोकिया, एशिया नुङ बिथिनिया क्षेत्रडा फोन्सिक्साका वाङथो़लाम रोक्पामिम होङङा बाट्पा माम्चु़नीका छेट्मिडिम मु़चु़मिमलाई ओराम सेलाखाजेम र्याक्तोङा लेट्पु। 2 ङादो आथाममिम उनी मुलु़ होम्साका माम्चु़नी पापका गानीलाई उनी त्वाकु मु़चु़ दु़म्मु छेट्निमी। येशू ख्रीष्टकु सिसिका कोसाका सेपा दु़म्साका गुमीका र्वामिमिम गानी थो़नी र्वाक्साका गुमीका गानीलाई उनी पेलका उनीमा बनेबेन्नी। माम्चु़नीका गानीलाई दिदाम नुङ न-भ्रसी छो़म हापा ग्वानिमिनु़। मेसिपा न 3 माम्चु़नी नुङ इकी ङाचो़ येशू ख्रीष्टकु पापकाम नङ कोसिनु़। छो़म उनी न-थो़मका येशू ख्रीष्टकु सिमुलाममिम बग्गेसीलामका मेसिपा नकाम लागि गुइ लाले दु़म्साका गस्तिम बुइ। 4 पाह्रीला जु़ल्थाट्मा इनीमा लागि जि-वा मेचेम्पा, मेफाल्सिक्पा, मेचु़र्पा बु। 5 मेर्मिम हुक्पा थारीका सेल्सिमु मेरोक्थु़मसम्म इनी थो़रलामका माम्चु़नीकु यु़मका गानीलाई बोनी-थार्नी। 6 घरिकोङकाम लागि हापा दु़खामिम गानी इम्मु बासी, लावो ओरामकाम लागि छो़म भ्रसी द्वाक्नी। 7 मुका खारेबु़मिम लावो हुक्पामा लक्पा सो़नाडाम वो इनीमा थो़र हापा थिकाम बु। आरेप्माम दु़खाका इनीमा थो़र आच्छाङा र्वाक्पा रेम्बु़। मेराम हापा दु़खामिमलामका इनीमा थो़र भाल-आथो़ मेदु़म्पामा येशू ख्रीष्ट सु़म्दिसेरडा रेम्बेम्सिप्मिमिम नेम ओराम थो़रका इनीमा नङ कोक्सु़, यु़म झ्वाबेडु़ मा डोक्पु दु़म्बेनी। 8 गुमीलाई गानी ल्वान्निम मिबु लोवो गुमीलाई रिखाम बोनी। ओम्लो गुमीलाई गानी मेल्वानी लावो गुमीडा थो़रलु़नी, मा सो़मु मेझापा छो़म डोक्पु न-भ्रसी ल्वानी। 9 हेङालोने गुमीडा बोनिमिम थो़रकु पुरस्कार गानी सेल्सिनिमिम सो़। 10 गानी ल्वामु खाम्निमिम दिदामकु दुथाम जेपा माम्चु़नीलाम-जेपामिमका ओराम सेल्सीलाई जो़होमका माल्मिडी-ख्लोम्डी मा थेसिथेन्मु माल्मिडी। 11 ख्रीष्टकु पेल मेर्मिमडला बाइडा मा ख्रीष्टका हेसाका दु़खा ल्वामी मेम्मा यु़म-झ्वाक्सी ल्वामी र्वाक्पा मेर्मिमलाई सो़त्तोङा लेट्मिडी। मेर्मिमका ओराम ल्वा हाम्सी दु़म मा हेसाका दु़म र्वाक्साका माल्मु चो़म्मिडी। 12 माम्चु़नीका गुमीलाम-जेपामिमका जेम्डिम ल्वा मेर्मिमलाई जो़पा दु़म्पा मेएँ, लावो इनीमा लागि सो़ र्वाक्पा मेर्मिमनुङ रेम्बेम्डी। पाह्रीलामका माम्चु़नीका थु़र्मिडिम माम्चु़नी-पेलकु यु़मलामका मेर्मिमका गानीलाई थेसिथेन्बेट्निम बाइडा। ओराम ल्वा थेसिथेन्मु पाह्रीचो़मिमकाम वो छो़म उनी न बु। सेपा दु़म्नी 13 मेम्मिमका इनीमा न-गोडा झो़म्सिट्नी, त्वाका त्वापलाई जो़होमका जु़ल्नी, येशू ख्रीष्ट रेम्बेम्सिप्मिलो गानी ल्वामु खाम्निमिम दिदाम छो़म ल्वापा न बेनी। 14 माम्चु़नीका र्वामिमिम थो़पा चो़च्चो़मिम होङङा गानी बोमु-दोमु बासी। ङादो बिलि आच्छाङाकाम ल्वा मेचक्साका इनी नकु कोकोक्सीका मेजो़पा बेन्निम होङङा मेबेनी। 15 लावो गानीलाई येट्पा माम्चु़नी सेपा बुमिमिम होप्माङा गानी वो खोत्ले इनी खारी बेसीडा मेजो़पा ल्वाडाम वाङ दु़म्नी। 16 हेङालोने माम्चु़नीकु सिजेमका र्वा, “मेजो़पा ल्वाडाम गो वाङ बुङुमिम होङङा गानी मेजो़पा ल्वाडाम वाङ बानी।” 17 माम्चु़नीडा गानी सो़म्दी बोनिलो गुमीलाई पाप र्वानी, गुमीका निया वो बोमी। गुमीका चोमिक्सी मेबेसाका मेर्मिमका बेम्डिम खारी होम्साका खोत्ले मु़चु़मिमकु निया बोमी। मेम्मिमका ओराम सुबुडा वाङथो़लाम रोक्पा होङङा बुनिलो माम्चु़नीलाई डोक्पु मिम्साका उनीमा ङिम जु़ल्निमा बानी। 18 इनी बेप-पापलाम रोक्पा हाम ना हामकु ल्वाडाम सो़ना, मत्तो होप्माम म्वापामा लक्पाका गानीलाई भ्रेसाका फ्वाक्मा मेएँ र्वाक्पा गानी चनिमिम बु। 19 लावो हाम वो मेख्लो़ट्पा नुङ मेजो़पा हाम वो मेबाट्पा भेन्दाचो़ होप्माम ख्रीष्टकु हापा थिकाम सिसिका भ्रेसाका माम्चु़नीका गानीलाई फ्वाक्निमिम सो़। 20 माम्चु़नीका सु़म्दिमोडाम वो ङादोङा इनीमा थि सोक्साक्पा गुमीलाई थुट्मिडिम बाइडा। लावो ओ हुक्पा थारीका इनीमाडा गुमी रेम्बेम्सिम्डी। 21 ख्रीष्टलामका माम्चु़नीलाई थो़र लु़न्निम बु, गुमीका ख्रीष्टलाई सिमुलाम फक्मिडिमा खोत्लेडाम डोक्पु दु़म्बेट्मिडी। मेम्मिमका इनी थो़र नुङ हाम-हुम ल्वापा इनीमा न माम्चु़नीडला बु। 22 आच्छाङाकाम ल्वा होङङा बेसाका गानी इनी त्वापलाई छेको-छेको दु़म्बेट्निम बु। मेम्मिमका थो़र लु़पा इनीमा वा-ल्वाकलाई आच्छाङाका रिखाम बेनी, मा इनी त्वाप-त्वापडा न-गोलामकाङा छो़म रिखाम बेबेनी। 23 सिपा भ्रल मेएँ लावो मेसिपा भ्रल, हेल्लो वो मेसिपा मा हेल्लो लोवो दु़म्पाम बाट्पा माम्चु़नीकु सिजेमलामका गानी आथावो गक्निम बु। 24 माम्चु़नीकु सिजेमका आरे र्वा, “मु़चु़मिम ने जेम होप्मामङा, मेर्मिमकु जो़प्सी ने सो़ब्दी बुङमा होप्मामङा, जेम सा, मा बुङमा आल्ल्या। 25 लावो ङाचो़कु सिजेम ने हेल्लो लोवो दु़महोम बु।” गानीलाई थो़बेट्मा जो़पा-सेलाकु सिजेम ओरामङा सो़। |
© Wycliffe Bible Translators, Inc. All rights reserved.
Wycliffe Bible Translators, Inc.