१ यूहन्ना 5 - थुलुङ राईमाम्चु़नीकु तारापाचो़डला थो़र 1 उहेम मु़चु़का येशूङा ख्रीष्ट र्वाक्पा थो़र बु़, मेराम मु़चु़ माम्चु़नीकु चो़च्चो़ सो़। मेम्मा उहेम मु़चु़का पापलाई रिखाम बु़ उनीमा चो़मिमलाई वो मेरामका रिखाम बु़। 2 माम्चु़नीलाई गुइ रिखाम बि मा गुमीका बेबेसाड्डामिम होङङा बिडी माला माम्चु़नीकु चो़च्चो़मिमलाई गुइ रिखाम बि र्वाक्पा च। 3 माम्चु़नीलाई रिखाम बोमु र्वाक्मा गुमीका बेबेसाड्डामिम होङङा बोमु मा गुमीका बेबेसाड्डामिम ल्वा बोमु मेझापा मिबु। 4 माम्चु़नीलाम गक्पा खोत्ले मु़चु़ सु़म्दिसेरडला घ्ल्वा। गुइलाई सु़म्दिसेरडला घ्ल्वाबेट्पा इकीमा थो़र सो़। 5 सु़म्दिसेरडला घ्ल्वापा मु़चु़ सु़? मेरामङा मु़चु़ उहेमका येशू माम्चु़नीकु तारापाचो़ र्वाक्साका थो़र लु़। 6 येशू ख्रीष्टका उनीमा कु-रु़दु़मका नुङ क्रूसडला सिसि हासाका मु़चु़ दु़म्साका रेम्बेम्डी। कुका कोङङा मेएँ, कुका नुङ सिसिका। मेम्मा ओराम आच्छाङा र्वाक्साका माम्चु़नी-पेलका गुइनुङ सो़मी। 7 येशूकु दुथाम गुइनुङ सो़पा सुले बुमी: 8 माम्चु़नी-पेल, कु नुङ सिसि। ओर्मिम सुलेका कोलेङा सो़मी। 9 मु़चु़का सो़यु़मिम ल्वाडा ने थो़र लु़इ लावो माम्चु़नीका सो़मिमिम ने मेरामडाम वो डोक्पु बु। हेङालोने माम्चु़नीका सो़मिमिम ल्वा ने ओराम सो़, मेराम गुमीका उनीमा तारापाचो़कु दुथाम र्वाम्डिम बु। 10 उहेम मु़चु़का माम्चु़नीकु तारापाचो़डला थो़र बु़ मेरामका ओराम आच्छाङा र्वाक्पा च। उहेमका थो़र मेबु़ मेरामका माम्चु़नीलाई लिमाचो़ दु़म्बेडु़, हेङालोने माम्चु़नीका उनीमा तारापाचो़कु दुथाम सो़म्डिम ल्वा मेराम मु़चु़का थो़र मेबु़। 11 गुमीका सो़म्डिम ल्वा ओरामङा: माम्चु़नीका गुइलाई हेल्लो वो मेसिपा त्वारो़म ग्वाक्साड्डामी मा ओराम त्वारो़म उनीमा तारापाचो़डा बु। 12 उहेम मु़चु़नुङ तारापाचो़ बुमी मेराम मु़चु़डा त्वारो़म बु, मा उहेम मु़चु़नुङ माम्चु़नीकु तारापाचो़ मेबुमी मेराम मु़चु़डा त्वारो़म मिबु। मुलु़दुङकु 13 गानी हेल्लो वो मेसिपा त्वारो़म ल्वान्निम बु र्वाक्पा चक्नी र्वाक्साका माम्चु़नीकु तारापाचो़कु नङडा थो़र बेपा गानीलाई ओराम ल्वा र्याक्तोङा बेउ। 14 माम्चु़नी फार्डा इकीमा ओराम थो़र बु, उनीमा न होङङा गुइ हाम-हुम बिइडी माला गुइ र्वाकिमिम ल्वा गुमीका थो़मी। 15 गुइ गुमीनुङ बिइलो गुमीका थो़मी र्वाक्पा गुइ च माला गुइ हाम बिइ मेराम गुमीका ग्वाक्सामी र्वाक्पा ल्वाडा आच्छाङा लु़मु बासी। 16 थो़र लु़पा वा-ल्वाकका छु़ल बु़मिम कोङनिम मु़चु़का ल्वासु़, मा मेराम छु़लका ने त्वारो़म मेसेडु़ माला गुका मेराम थो़र लु़पा वा-ल्वाककाम लागि सो़म्दी बु़साट्नु़। मेम्मा माम्चु़नीका मेराम वा-ल्वाकलाई त्वारो़म ग्वामी। उहेम छु़लका त्वारो़म मेसेडु़ मेरामकाम लागि आरे बोमु बासी र्वाङुमिम। आरेप्माम वो छु़ल बु, उहेम छु़लका त्वारो़म सेडु़। मेरामकाम लागि गुका सो़म्दी बु़साट्नु़ र्वाक्साका गो मेर्वाङु। 17 खोत्ले मेजो़पा बेसी ने छु़ल सो़, लावो आरेप्माम छु़ल वो बु मेराम छु़लका त्वारो़म मेसेडु़। 18 उहेम मु़चु़ माम्चु़नीलाम गस्ताम बु मेरामका हेल्लो लोवो छु़ल बु़होम मेबु। माम्चु़नीकु तारापाचो़का मेराम मु़चु़लाई बोमी-थार्मी मा शैतानका मेराम मु़चु़लाई लु़म्मु मेचाप्सु़ र्वाक्पा गुइ च। 19 गुइ माम्चु़नीकु चो़च्चो़मिम मा ओराम खोत्ले सु़म्दिसेर शैतानकु ल्वाडा बु र्वाक्पा च। 20 माम्चु़नीकु तारापाचो़ योम्डिम बुमी, मा आच्छाङाकाम माम्चु़नीलाई गुइ छेडिनु़ र्वाक्साका गुमीका गुइलाई न ग्वाक्साड्डामिम बु र्वाक्पा गुइ चडिम बु। गुइ माम्चु़नीडा बुइ हेङालोने उनीमा तारापाचो़ येशू ख्रीष्टडा गुइ बुइमिम बु। गुमी कोङङा आच्छाङाकाम माम्चु़नी मा हेल्लो वो मेसिपा त्वारो़म गुमीङा। 21 द्वादीबुङ चो़च्चो़नी, त्वा-त्वापलाई ङाटामिमलामका वाङ बेनी। |
© Wycliffe Bible Translators, Inc. All rights reserved.
Wycliffe Bible Translators, Inc.