१ यूहन्ना 4 - थुलुङ राईमाम्चु़नीलाम-जेपा लिसिक्पा मु़चु़मिमलाई थेसिथेन्मु 1 द्वादीबुङ ङोप्सो़नी, पेललामका जेङुमिम र्वाक्पा खोत्ले मु़चु़लाई थो़र मेलु़नी। मेर्मिमनुङ बाट्पा पेल माम्चु़नीलाममिम डे मेएँ डे र्वाक्पा रेम्मु मेर्मिमलाई छाम्निमी। हेङालोने माम्चु़नीलाम-जेपा लिसिक्पा हापा मु़चु़मिम ओराम सु़म्दिसेरडा लुम्डिम बु। 2 आरेसाका माम्चु़नी-पेललाई गानी छेमु चाम्नी: मु़चु़ होङङा येशू ख्रीष्ट ओराम सु़म्दिसेरडा योम्डी र्वाक्साका उहेम मु़चु़का र्वा मेराम मु़चु़काडा बाट्पा माम्चु़नी-पेल सो़। 3 लावो येशू मु़चु़ होङङा ओराम सु़म्दिसेरडा योम्डिम मेएँ र्वाक्पा पेल उहेम मु़चु़काडा बु, मेराम पेल माम्चु़नीलाममिम मेएँ। “मेराम रो” र्वाक्पा गानी थो़न्निम ख्रीष्टकु कोर्थो़लाम बक्पाकु ओराम पेलङा सो़। सु़म्दिसेरडा ओम्लो वो ओराम रोक्ल्याड्डाम बु। 4 आमा चो़च्चो़नी, गानी ने माम्चु़नीकाम सो़। माम्चु़नीलाम-जेपा लिसिक्पा ओर्मिम मु़चु़डला गानी घ्ल्वान्निम बु, हेङालोने सु़म्दिसेरडा बाट्पा पेलडाम ने गानीगोडा बुमिमिम पेल छो़म डोक्पु बुमी। 5 ओर्मिम मु़चु़ सु़म्दिसेरकाम सो़। मेम्मिमका ओर्मिम मु़चु़का सु़म्दिसेरडामङा ल्वा बोमी। मेम्मा सु़म्दिसेरडाम मु़चु़का मेर्मिमकु ल्वा थो़मी। 6 लावो गुइ ने माम्चु़नीकाम सो़। मेम्मिमका उहेम मु़चु़का माम्चु़नी छेडु़ मेरामका इकीमा ल्वा थो़सु़। उहेम मु़चु़ माम्चु़नीकाम मेएँ मेरामका इकीमा ल्वा मेथो़सु़। ओरामलामकाङा आच्छाङाकाम पेल नुङ लिमा पेल छेडी। रिखाम माम्चु़नीलाम रो 7 द्वादीबुङ ङोप्सो़नी, गुइ कोलेका कोलेलाई रिखाम बेबी, हेङालोने रिखाम माम्चु़नीलाम रो। सु़का रिखाम बु़ गु माम्चु़नीकु चो़ मा गुका माम्चु़नीलाई छेडु़। 8 सु़का रिखाम मेबु़ मेराम मु़चु़का माम्चु़नी मेछेडु़, हेङालोने माम्चु़नीका खोत्ले मु़चु़लाई रिखाम बोमी। 9 माम्चु़नीका गुइगोडा आरेसाका उनीमा रिखाम रेम्बेम्डी: येशूलाम गुइ नु़मु चाप्सिनु़ र्वाक्साका कोले कोङङा बाट्पा उनीमा तारापाचो़ गुमीका सु़म्दिसेरडा थु़र्मिडी। 10 रिखाम ओरामङा सो़: माम्चु़नीलाई गुइ रिखाम बिडिम मेएँ, लावो गुमीका गुइलाई रिखाम बेसाड्डामी, मा इकीमा छु़लमिम हेम्सामु सासेन्सिप्डा उनीमा तारापाचो़ थु़र्मिडी। 11 द्वादीबुङ ङोप्सो़नी, माम्चु़नीका गुइलाई छो़म रिखाम बेसाड्डामिमका गुइ वो कोलेका कोलेलाई रिखाम बेबोमु बासी। 12 सु़का वो हेल्लो वो माम्चु़नी ल्वाम्डिम मिबु, लावो गुइ रिखाम बेबिइडी माला माम्चु़नी गुइगोडा बुमी, मा गुमीका गुइगोडा बोमु न बोमिमिम होङङा उनीमा रिखाम दु़म। 13 माम्चु़नीडा गुइ बुइ मा गुमी गुइगोडा बुमी र्वाक्पा रेम्बोमु माम्चु़नीका माम्चु़नी-पेल गुइलाई ग्वाक्साड्डामिम बु। 14 गुकु ल्वात्तोकोम बु मा मेराम सो़कु, सु़म्दिसेरलाई सेल्मु लागि पापका उनीमा तारापाचो़ थु़र्मिडी। 15 कोङ मु़चु़का येशू माम्चु़नीकु तारापाचो़ र्वाक्साका थो़र बु़ माला माम्चु़नी मेराम मु़चु़नुङ दु़म्मी मा मेराम मु़चु़ माम्चु़नीडा दु़म। 16 माम्चु़नीका हाङको छो़म रिखाम बेसाड्डामी, मेराम गुइ च, मा गुमीडा थो़र लु़इ। माम्चु़नीका खोत्ले मु़चु़लाई खोत्लेडा रिखाम बोमी, मा उहेम मु़चु़ रिखामडा बु मेराम मु़चु़ माम्चु़नीडा बु मा माम्चु़नी मेरामकाडा बुमी। 17 निया दु़म्मिम नेम गुइ मेङिसाका बुइनु़ र्वाक्साका गुइगोडा रिखाम माम्चु़नीकु न होङङा दु़म। हेङालोने ओराम सु़म्दिसेरडा गुइ वो ख्रीष्ट होप्मामङा बुइ। 18 रिखामडा ङिम मेदु़म, लावो माम्चु़नीकु न होङङा दु़म्पा गुइगोडाम रिखामका ङिम कोलु़। देन्देका मु़चु़लाई ङिबेडु़ मा उहेम मु़चु़ ङि मेराम मु़चु़ माम्चु़नीकु न होङङा दु़म्पा रिखामडा मेदु़म। 19 गुइ रिखाम बेबी, हेङालोने ङादो माम्चु़नीका गुइलाई रिखाम बेसाड्डामी। 20 कोङनिम मु़चु़का “माम्चु़नीलाई गो रिखाम बेउ” र्वा लावो थो़र लु़पा वा-ल्वाकलाई मेद्वाकु़मी माला मेराम मु़चु़ लिमाचो़। हेङालोने मिक्सीका ल्वासिमिम मु़चु़मिमलाई रिखाम मेबी माला मिक्सीका मेल्वासिमिम माम्चु़नीलाई हेसाका रिखाम बि मा? 21 मेम्मा माम्चु़नीका ओराम बेबेसाड्डामिम बु: उहेम मु़चु़का माम्चु़नीलाई रिखाम बु़, मेराम मु़चु़का थो़रलु़पा वा-ल्वाकलाई रिखाम बोमु बासी। |
© Wycliffe Bible Translators, Inc. All rights reserved.
Wycliffe Bible Translators, Inc.