१ यूहन्ना 3 - थुलुङ राईमाम्चु़नीकु चो़मिम 1 रेप्नी, पाह्रीलाम इकीमा पापका गुइलाई हाङको छो़म रिखाम बेसामी, गुइलाई माम्चु़नीकु चो़मिम र्वामी, मा आच्छाङा गुइ उनीमा चो़च्चो़मिमङा सो़। सु़म्दिसेरडाम मु़चु़मिमका माम्चु़नी मेछेमिवा, मेम्मिमका गुइलाई मेछेसामी। 2 द्वादीबुङ ङोप्सो़नी, ओम्लो गुइ माम्चु़नीकु चो़च्चो़मिम बुइ, मा दिफु गुइ हाम दु़म्सी मेराम मेच। लावो गुइ ओराम च, ख्रीष्ट आथावो योमिलो गुइ गुमी होप्मामङा दु़म्सी हेङालोने गुमी हेप्माम बुमी मेप्मामङा गुमीलाई ल्वासी। 3 मेम्मा आरे दु़म्मु लथाक्पा मु़चु़ खोत्लेका येशू ख्रीष्ट छु़ल मान्थिम बुमिमिम होङङा त्वापलाई छु़ल मान्थिम दु़म्बेन्मी। 4 उहेम मु़चु़का छु़ल बु़, मेरामका माम्चु़नीकु डु़म्ला होम्साका मेबु़। माम्चु़नीकु डु़म्लाकु कोर्थो़लाम बक्साका बुमुङा छु़ल सो़। 5 लावो इकीमा छु़लमिम हेम्सामु येशू ख्रीष्ट रेम्बेम्सिम्डी। गुमीडा हाम वो छु़ल मिबु। 6 ख्रीष्टडा बाट्पा सु़का वो छु़ल बु़होम मेबु। छु़ल बेपाम बाट्पा मु़चु़का गुमीलाई ल्वास्तु़म बु ना गुमीलाई छेड्डु़म बु। 7 द्वादीबुङ चो़च्चो़नी, सु़का वो गानीलाई ताङताहेरथो़ मेलनिमिनु़। उहेम मु़चु़का जो़पा जेसी-दोसी बु़ मेरामका माम्चु़नीकु न होप्माम जो़पा बेपा ख्रीष्ट होङङा जो़पा खारी बु़। 8 उहेम मु़चु़का छु़ल बु़ मेराम शैतान सो़, हेङालोने शैतानका सु़म्दिमोलोमङा छु़ल बेत्तो गेड्डाम सो़। शैतानकु ओराम खारी छो़रो़प बोमु लागि माम्चु़नीकु तारापाचो़ रेम्बेम्सिम्डिम सो़। 9 माम्चु़नीलाम गक्पा उहेम मु़चु़का वो छु़ल बु़होम मेबु, हेङालोने माम्चु़नीकु त्वारो़म मेराम मु़चु़ गोनो दु़म। मेराम मु़चु़का छु़ल बु़होम मेबु, हेङालोने मेराम मु़चु़ माम्चु़नीलाम गस्ताम सो़। 10 ओलामकाङा माम्चु़नीकु चो़मिम सु़ मा शैतानकु चो़मिम सु़ र्वाक्पा छेडी: उहेम मु़चु़का हाम जो़पा बु मेराम मेबु़, मेराम मु़चु़ माम्चु़नीकु चो़ मेएँ, मा उमा वा-ल्वाकलाई रिखाम मेबेपा मु़चु़ वो माम्चु़नीकु चो़ मेएँ। रिखाम बेबोमु 11 गुइ ङादो आथाम थो़स्तिम सिजेम ओरामङा सो़: गुइ रिखाम बेबोमु बासी। 12 कयिन होप्माम मेदु़म्नी, गु शैतानकाम बाइडा, मा उमा ल्वाक सेड्डु़। गुका हेङा उमा ल्वाक सेड्डु़? हेङालोने कयिनका हाम बु़डु़ मेराम रु़चो़काम बाइडा मा उमा ल्वाकका बु़डु़म ने जो़पा न-गोनुङमाकाम बाइडा। 13 आमा वा-ल्वाकनी, सु़म्दिसेरका गानीलाई मेद्वानिमी माला ङाङाया मेदु़म्नी। 14 येशूडा थो़रलु़पा इकीमा वा-ल्वाकमिमलाई गुइ रिखाम बिइडी माला सिमुलामका हेल्लो वो मेसिपा त्वारो़मडा रोक्तिम बु र्वाक्पा छे। लावो उहेम मु़चु़का रिखाम मेबु़ मेराम आथावो सिमुलामगोडाङा बु। 15 उहेम मु़चु़का थो़र लु़पा उमा वा-ल्वाकलाई मेद्वाकु़, मेराम मु़चु़ ने मु़चु़ सेट्पा होप्माम सो़। मेम्मा मु़चु़ सेट्पा सु़नुङ वो हेल्लो वो मेसिपा त्वारो़म मेदु़म र्वाक्पा गानी चनिमिम बु। 16 ख्रीष्टका उनीमा साम इकीमा लागि फ्याम्डी, मेराम गुइ मिम्डिलो रिखाम र्वाक्मा हाम मेराम थेसिथेडी। गुइ थो़रलु़पा वाङमिम वा-ल्वाकमिमकाम लागि इकीमा साम फ्यामु बासी। 17 कोङनिम मु़चु़नुङ सु़म्दिसेरडाम खाप्चीमिम बु मा थो़र लु़पा वा-ल्वाक खेरेला दु़म्पा ल्वासु़, मा वो मे वा-ल्वाकडला उ थो़म मेभ्रो़ माला माम्चु़नीकु रिखाम हेसाका गुगोडा दु़म मा? 18 द्वादीबुङ चो़च्चो़नी, जेसी पेसीलाम कोङङा रिखाम बे बि। इकीमा बेसी-पेसीका आच्छाङा रिखाम बेबिमिम रेम्बी। 19 ओ इकीमा बेसी-पेसीलामका गुइ च, गुइ आच्छाङाकाम ल्वाडा बुइ। मेम्मिमका माम्चु़नीकु ङादोडा गुइ येम्सिडिलो इकीमा ङिम मेलु़। 20 हाङकोलो इकीमा नका गुइलाई मुमा बेसा, गुइ ओराम च, इकीमा न-गोडाम वो माम्चु़नी डोक्पु बुमी मा गुमीका खोत्ले चमी। 21 द्वादीबुङ ङोप्सो़नी, इकीमा नका गुइलाई मुमा मेबेसा माला माम्चु़नीकु ङादोडा गुइ मेङिसी। 22 मेम्मा गुइ हाम बिइ मेराम माम्चु़नीका ग्वाक्सामी हेङालोने गुमीका र्वामिमिम होङङा गुइ बि, मा गुमीलाई गेर्सी बेट्पा खारी बि। 23 गुमीका गुइलाई बेबेसाड्डामिम ल्वा ओरामङा सो़: उनीमा तारापाचो़ येशू ख्रीष्टडा गुइ थो़र लु़मु बासी, मा गुमीका बेबेसाड्डामिम होङङा कोलेका कोलेलाई रिखाम बोमु बासी। 24 माम्चु़नीका र्वामिमिम थो़पा मु़चु़मिम गुमीडा दु़म्मी मा गुमी मेर्मिम मु़चु़काडा दु़म्मी। गुमीका ग्वाक्साड्डामिम माम्चु़नी-पेललामका गुइ च, माम्चु़नी गुइनुङ बुमी। |
© Wycliffe Bible Translators, Inc. All rights reserved.
Wycliffe Bible Translators, Inc.