१ यूहन्ना 2 - थुलुङ राईगुइलाई ख्लो़पा ख्रीष्ट 1 आमा याक्के चो़च्चो़नी, गानी छु़ल मेबेनी र्वाक्साका गो ओराम सेलाखाजेम र्याक्तोङा बेउ। लावो कोङनिमका छु़ल बु़ माला इकीमालाम पापनुङ जेप्साक्पा कोले येशू ख्रीष्ट बुमी। गुमीका माम्चु़नीलाई गेर्सिबेन्मी। 2 इकीमा छु़लकाम लागि गुमी सासेन्सिम्डी, इकीमा छु़लकाम लागि कोङङा मेएँ खोत्ले सु़म्दिसेरकु छु़लकाम लागि गुमी सासेन्सिम्डी। 3 गुमीका बेबेसाड्डामिम होङङा बिइ माला ख्रीष्टलाई गुइ छेडिमी रेछा र्वाक्पा च। 4 उहेम मु़चु़का “गो गुमीलाई छेपु” र्वा लावो गुमीका हाम बेबेट्मिडिम मेराम मेबु़ माला गु ने लिमाचो़ सो़। गुनुङ आच्छाङाकाम ल्वा मेदु़म। 5 लावो कोङनिमका माम्चु़नीकु सिजेम होम्साका बु़ माला मेरामकाडा माम्चु़नीकु रिखाम होङङा दु़म। गुइ गुमीडा बुइमिम ओरामलामका छेडी: 6 उहेमका गुमीडा बुङु र्वा गु येशू बाम्डिम-दोम्डिम होम्साका बुमु-दोमु बासी। 7 द्वादीबुङ ङोप्सो़नी, गानी बोमु बासी र्वाक्साका र्याक्तोङा बेउमिम ओराम ल्वा लाम्दी सिपा लाले सीसि ने मेएँ, माके आथामङा गानीनुङ बाट्पा ल्वा सो़। माकेम ओराम ल्वा ने ङादो गानी थो़न्निम सिजेम सो़। 8 मेम मावो गानी बोमु बासिक्पा कोले नले ल्वा गानीलाई र्याक्तोङा बेउ। ओराम आच्छाङा ख्रीष्टडा बु मा गानीडा वो बु। हेङालोने तुकुम्चिम दाम्तोङा लेडु़ मा आच्छाङाकाम ओल ङादो आथामङा झ्वाहोम बु। 9 उहेमका गु ओलडा बुङु र्वा लावो उमा वा-ल्वाकलाई घ्राम्डु़ माला गु आथावो तुकुम्चिमडाङा बु। 10 उहेमका उ वा-ल्वाकलाई रिखाम बु़, गु ओलडा बु मा गुलाई छु़ल बेबेट्पा उमाडा हाम वो मेदु़म। 11 लावो उहेमका उमा वा-ल्वाकलाई मेद्वाकु़ मेराम मु़चु़ तुकुम्चिम गोनो दु़म मा तुकुम्चिम गोनो लाम्दी। गु बान्थो़ लक्तोङा बु़ मेराम मेचकु़, तुकुम्चिमका उमा मिक्सी ड्याक्साड्डु़म बु। 12 द्वादीबुङ चो़च्चो़नी, गो गानीलाई ओराम र्याक्तोङा बेउ, हेङालोने ख्रीष्टकु नङका माम्चु़नीका इनीमा छु़ल हेम्साट्निम बु। 13 ङावानी, गो गानीलाई ओराम र्याक्तोङा बेउ, हेङालोने खोत्ले प्रङ्सिमु ङादो आथामङा बाट्पा येशू ख्रीष्टलाई गानी छेनी। स्वालानी, गो गानीलाई ओराम र्याक्तोङा बेउ, हेङालोने शैतानडला गानी घ्ल्वान्निम बु। द्वादीबुङ चो़च्चो़नी, गो गानीलाई ओराम र्याक्तोङा बेउ, हेङालोने इकीमा माम्चु़नी पापलाई गानी छेट्निम बु। 14 ङावानी, गो गानीलाई ओराम र्याक्तोङा बेउ, हेङालोने खोत्ले प्रङ्सिमु ङादो आथामङा बाट्पा येशू ख्रीष्टलाई गानी छेनी। स्वालानी, गो गानीलाई ओराम र्याक्तोङा बेउ, हेङालोने गानी इनी न-गोडा सोनुङमा बुनी, मा माम्चु़नीकु सिजेम इनीमा नडा बु। मेम्मा शैतानडला गानी घ्ल्वान्निम बु। सु़म्दिसेरडा बाट्पामिमलाई रिखाम मेबोमु 15 सु़म्दिसेरलाई लोवो सु़म्दिसेरडा बाट्पामिमलाई लोवो रिखाम मेबेनी। कोङनिमका सु़म्दिसेरलाई रिखाम बु़ माला माम्चु़नी पापलाई गुका रिखाम मेबु़। 16 हेङालोने छु़लचो़ मु़चु़का गेर्सिबेन्मु बु़मिम न, मिक्सीका ल्वासु़मिम ल्वामु माल्पा न नुङ गुनुङ हाम बु मेरामडला उ नो़ ल्वाक्थाक्पा न, सु़म्दिसेरडाम ओर्मिम खोत्ले माम्चु़नी पापलाम रोक्पा मेएँ लावो सु़म्दिसेरलाम रो। 17 सु़म्दिसेर दाम मा ल मा मु़चु़कु मेजो़पा न वो दाम्मा ल। लावो माम्चु़नीकु न होङङा बेपा मु़चु़ हेल्लो वो मेसि। ख्रीष्टकु कोर्थो़लाम बक्पा मु़चु़ 18 आमा चो़च्चो़मिम होप्माम मु़चु़नी, हुक्पा थारी ओरामङा सो़। ख्रीष्टकु कोर्थो़लाम बक्पा मु़चु़ रोक्तोङा लेडु़ र्वाक्पा गानी थो़न्निम होङङा ओम्लो वो ख्रीष्टकु कोर्थो़लाम बक्पा हापा मु़चु़मिम रोम्डिम बु। मेम्मिमका ओराम थारी हुक्पा थारी र्वाक्पा गुइ च। 19 ख्रीष्टकु कोर्थो़लाम बक्पा ओ मु़चु़मिम गुइनुङ लाम्दिपा थो़र लु़पामिम मेएँ, मेम्मिमका गुइलाई डिसाड्डामी। मेर्मिम मु़चु़ गुइनुङ लाम्दिपा थो़रलु़पामिम माला ने गुइनुङ बामिवा। लावो मेर्मिम सु़ वो गुइनुङ लाम्दिपा थो़र लु़पा मेएँ रेछा र्वाक्पा मेर्मिमका डिसाड्डामिमलामका रेम्बेम्डी। 20 लावो ख्रीष्टका गानीडला माम्चु़नी-पेल अम्डिम बु मा गानी खोत्लेका आच्छाङाकाम ल्वा चनी। 21 आच्छाङाकाम ल्वा गानी थेसिमेथेनी र्वाक्साका गानीलाई ओराम ल्वा र्याक्पुमिम मेएँ, लावो आच्छाङाकाम थेसिथेनिमिमका र्याक्पुमिम। आच्छाङालामका ल्वा लिमा मेरो र्वाक्पा गानी चनी। 22 लिमाचो़ सु़? लिमाचो़ मेरामङा, उहेमका येशूङा ख्रीष्ट र्वाक्साका मेछेपु र्वा। आरेप्माम मु़चु़ ख्रीष्टकु कोर्थो़लाम बक्पा सो़, गुका माम्चु़नी पाप नुङ उनी तारापाचो़ येशू ख्रीष्टलाई मेछेपु र्वा। 23 सु़का येशूलाई माम्चु़नीकु तारापाचो़ मेर्वा गु माम्चु़नीनुङ मेलाम्दी। लावो सु़का येशूलाई माम्चु़नीकु तारापाचो़ र्वा गु माम्चु़नीनुङ लाम्दी। 24 ङादो गानी हाम सीन्सिट्निम मेरामडा गानी थो़र लु़इमिम दु़म्मुम बुमु बासी। गानी मेम बेन्नी माला इनीमा हेमकेम माम्चु़नी पाप नुङ उनीमा तारापाचो़नुङ दु़महोम बु। 25 येशू ख्रीष्टका गुइलाई हेल्लो वो मेसिपा त्वारो़म ग्वानिनी र्वाम्डिम बु। 26 गानीलाई ताङताहेरथो़ लमु माल्पा मेर्मिम मु़चु़कु दुथाम गो गानीलाई ओराम र्याक्तोङा बेउ। 27 ख्रीष्टका ग्वाक्निमिम माम्चु़नी-पेल गानीगोडा दु़म्मिहोम बुमी, मा गानीलाई सु़का वो सीमु मेबासी। गुमीका ग्वाक्निमिम माम्चु़नी-पेलका आच्छाङाकाम खोत्ले ल्वाडा सीनिमी, लिमा ल्वाडा मेएँ। माम्चु़नी-पेलका सीनिमिमिम होम्साका ख्रीष्टडा गानी दु़म्निहोम बानी। 28 आमा चो़च्चो़ होप्माम मु़चु़नी, ख्रीष्टडा बानिम बानी, मेम्साका गुमी रेम्बेम्सिप्मिलो मेङिसिनु़ मा गुमी योमिलो उनी ङादोडा इकीमा क्रो़म मेलु़नु़। 29 ख्रीष्ट माम्चु़नीकु न होप्माम जो़पा खारी बेपा र्वाक्पा गानी चनी माला हाम जो़पा बु मेराम खारी बेपा खोत्ले मु़चु़ माम्चु़नीलाम गम्डिम र्वाक्पा चक्नी। |
© Wycliffe Bible Translators, Inc. All rights reserved.
Wycliffe Bible Translators, Inc.