१ यूहन्ना 1 - थुलुङ राईत्वारो़म ग्वाक्पा सिजेम 1 सु़म्दिमोलो आथामङा बाट्पा कोले, गुमीलाई गुकु ल्वात्तोकोम थो़त्तोकोम बु। गुकु आकी मिक्सीकाङा गुमीलाई ल्वात्तोकोम बु, मा आकी ल्वाकाङा गुमीलाई लु़प्तोकोम बु। गुमी येशू ख्रीष्ट, त्वारो़म ग्वाक्पा सिजेम। 2 माम्चु़नीका गुमीलाई रेम्बेम्डी, मा गुकु ल्वात्तोको मा गुकु उनीमा दुथाम सो़कु। मेम्मा हेल्लो वो मेसिपा मेराम त्वारो़मकु दुथाम गानीनुङ सो़कु। गुमी पापनुङ बाम्डी, मा माम्चु़नीका गुकुनुङ रेम्बेम्डी। 3 गुकु हाम ल्वात्तोको थो़त्तोको मेराम गानीनुङ सो़कु, मेम्साका गुकुनुङ इनीमा हेमकेम दु़म्नु़। आकीमा वो हेमकेम माम्चु़नी पाप नुङ उनीमा तारापाचो़ येशू ख्रीष्टडा बु। 4 गानी छो़म भ्रसी द्वाक्नी र्वाक्साका गानीलाई गुकु ओराम र्याकुम बुकु। ओलडा बुमु-दोमु 5 ओराम सिजेम येशू ख्रीष्टलामका गुकु थो़त्तोको मा गानीनुङ सो़कुमिम। माम्चु़नी ओल बुमी मा गुमीडा तुकुम्चिम बुमुङा मिबु। 6 इकीमा हेमकेम माम्चु़नीनुङ बु र्वाकी मा तुकुम्चिमडाङा लाम्दिइ माला गुइ लिमा थेडी, मा आच्छाङाकाम ल्वा होम्साका मेबुइ-मेदोसी। 7 माम्चु़नी ओलडा बुमिमिम होङङा गुइ वो ओलडा बुइ-दोसी माला कोलेकाम कोङमीडला इकीमा हेमकेम दु़म। मेम्मा उनीमा तारापाचो़ येशूकु सिसिका खोत्ले इकीमा छु़लडाम गुइलाई छेको-छेको बेसा। 8 गुइ छु़ल मान्थिम बुइ र्वाकी माला ने गुइ इकी त्वाकाङा त्वापलाई ताङताहेरथो़ ल, मा आच्छाङाकाम ल्वा गुइनुङ मेदु़म। 9 गुइ इकीमा छु़लमिम माम्चु़नीनुङ सो़इडी माला गुमीका इकीमा छु़ल हेप्साक्सामी मा मेजो़पा खोत्लेडाम छेको-छेको बेसामी। हेङालोने गुमी थो़र लु़इमिम मा जो़पा बेपा बुमी। 10 गुइ छु़ल बिडिम मिबु र्वाकी माला माम्चु़नीलाई लिमाचो़ र्वाकिमिम दु़म, मा इकीमा न-गोडा उनीमा सिजेम मेदु़म। |
© Wycliffe Bible Translators, Inc. All rights reserved.
Wycliffe Bible Translators, Inc.