१ कोरिन्थी 9 - थुलुङ राईथु़र्मामिमकु साखाम 1 हाम गो वो वाङमिम होम्साका त्वाकु नसीहोमका दोमु मेचापु मा? हाम गो थु़र्मा मेएँ मा? हाम गो इकी ङाचो़ येशू ल्वाउतोमिम मिबु मा? हाम ङाचो़कु खारी बेसाका गो ल्वान्निनिम गानी ङा मेएँ मा? 2 गो वाङमिमकाम लागि थु़र्मा मेएँ लोवो इनीमा लागि ने आच्छाङा थु़र्मा ङा, हेङालोने ङाचो़ येशूडा गो थु़र्मा दु़म्ङोडोमकु छेखोप गानीङा सो़। 3 आमा कोर्थो़लाम जेपामिमलाई गो आरे र्वाङु। 4 हाम गुकु आकी खारीलामका पोमु-डुमु मेल्वाकु मा? 5 हाम वाङमिम थु़र्मामिम नुङ ङाचो़ येशूकु ल्वाकमिम नुङ केफासका होङङा येशूडा थो़रलु़पा त्वाकु नाइमे त्वापनुङ लाम्दिबेन्मु गुकु मेल्वाकु मा? 6 डे हाम गो नुङ बारनाबासका कोङङा आची ख्वाचेप डु़ल्मु लागि खारी बोमु बासी मा? 7 त्वाकाम पेसाका सु़का सिपाहीकु खारी बु़ मा? अङ्गूर ख्लिपाका सु़का अङ्गूर मेपु़ मा? पितु-मेसु़ डु़लु़मा सु़का मेरामकु दु़दु़ मेडुङु़ मा? 8 हाम गो ओराम मु़चु़कु नलाममिम ल्वा कोङङा र्वाङुमिम मा? माम्चु़नीकु डु़म्लाका वो हाम आरेङा मेर्वा मा? 9 मोशाकु डु़म्लाडा आरेसाका र्याक्मा बु, “दाँइ बोनिलो बेनोकु सि मौला मेबेट्नी।” हाम बेनोकाम लागि कोङङा माम्चु़नीका मिम्ताम-सो़र्ताम बोमी मा? 10 हाम गुमीका इकीमा लागिङा आरे र्वाम्डिम मेएँ मा? आच्छाङा ओराम इकीमा लागिङा र्याक्मा सो़, हेङालोने ब्याङसी झोपाका मा-के ल्वापा नका झोङु़, मा दाँइ बेपाका वो मा-के ल्वापा नका ङा दाँइ बु़। 11 गानीगोडा गुकु त्वारो़मकु भ्रल फोत्तोकोम बु माला आकीमा मिरो़मकाम लागि हाम गानीलाम हाम हुम रमु मेनु़ मा? 12 वाङमिम मु़चु़का गानीलामका ख्लो़ला सो़म्सिमु ल्वामी माला हाम गुकु मेर्मिमडाम हापा ल्वामु बासिक्पा मेएँ मा? लावो गुकु ने मेम मेबेकुवा, येशू ख्रीष्टकु दुथाममिम जो़पा-सेला थो़बेन्मु मेभोम्सिनु़ र्वाक्साका गुकु खोत्ले इम्कु। 13 सो़रनेमडा खारी बेपामिमका सो़रनेमलामका पोमु ल्वामी, मा सासेन्खोपडा लाले-पाङके बेपामिमका सासेन्खोपडा ग्वाक्मा ग्वा-ग्वालाममिम दो़दो़वा ल्वामी र्वाक्पा हाम गानी मेचनी? 14 मेम्साकाङा उहेमका जो़पा-सेला थो़बेन्मी, मेलामकाङा मेर्मिम डु़ल्सिमिनु़ र्वाक्साका ङाचो़ येशूका वो र्वाम्डी। 15 लावो गो ल्वामु बासिक्पा ओर्मिम ल्वामिम कोले वो रउतोम मिबु, मा आमा लागि आरेप्मामङा बेङसाङनी र्वाक्साका गो ओर्मिम ल्वा र्याक्तोम मेएँ। ओर्मिम ल्वामिम हाम वो मेरसाका ङाचो़कु लाले पाङके बोमु आमा लागि धक्ची ह्वामु सो़, मेराम धक्ची ह्वामुलाई कोङनिमका भोम्मी माला ने आमा लागि सिमुङा जो़पा दु़म। 16 जो़पा-सेला थो़बेन्मुडा आमा धक्ची डोक्पु बेपा ल्वा हाम वो मिबु। ओराम गो थो़बेन्मुमि ङा बासी। जो़पा-सेला मेथो़बेट्पुमिवा माला ने गोडला वाइतो रोनु़। 17 गो आमा त्वाकु नकाङा जो़पा-सेला थो़बेट्पा खारी बेउवाम माला गो हाम हुम ल्वापा न बेउवा। लावो ओराम गो बोमुङा बासी, हेङालोने माम्चु़नीका ओराम खारी गो बोमु र्वाक्साका आमा ल्वाड्डा ग्वाङ्डिमिम बु। 18 मेम माला गो हाम ल्वाउ? सु़नुङ वो खउलुङ मेरसाका जो़पा-सेला थो़बेन्मु ङा जि ल्वापा ल्वा सो़। मेम्मिमका जो़पा-सेला थो़बेट्पुमिलो गो ल्वामु बासिक्पा हेल्लो वो मेबिउ। 19 गो सु़काम वो डु़ल्चो़ मेएँ, लोवो ख्रीष्टडा हापा मु़चु़मिमलाई थो़र लु़बेन्मु लागि खोत्लेकु डु़ल्चो़ दु़म्ङोडोम बु। 20 यहूदीमिमनुङ खारी बेउतोलो मेर्मिमका ख्रीष्टडा थो़र लु़मिनु र्वाक्साका गो यहूदीमिम होप्मामङा दु़म्ङोरो। गो डु़म्ला होम्साका मेदोपा लोवो डु़म्ला होम्साका दोपामिमलाई थो़र लु़बेन्मुमि लागि डु़म्ला होम्साका दोपा होप्मामङा दु़म्ङोरो। 21 यहूदी डु़म्ला होम्साका मेदोपा वाङसामामिमनुङ खारी बेउतोलो मेर्मिमका ख्रीष्टडा थो़र लु़मिनु़ र्वाक्साका गो यहूदी डु़म्ला होम्साका मेदोपामिम होप्मामङा दु़म्ङोडो। गो र्वामु माल्तोम ल्वा ने माम्चु़नीकु डु़म्लाडाम गो वाङ मेबुङु, लावो ख्रीष्टकु डु़म्ला होम्साका दोङु। 22 याक्के थो़रनुङमा मु़चु़मिमका ख्रीष्टडा थो़र लु़मिनु़ र्वाक्साका याक्के थो़रनुङमा होप्माम दु़म्ङोडो। मेम्साका गो खोत्ले मु़चु़का हेसाका लोवो ख्रीष्टडा त्वारो़म ल्वामिनु़ र्वाक्साका मेर्मिम मु़चु़ होप्माम ङा दु़म्ङोडो। 23 जो़पा-सेलाकु जि-वामिमकाम दो़दो़वा ल्वाउनु़ र्वाक्साका गो ओर्मिम खोत्ले बेउ। 24 ओन्सीडा खोत्ले ओन्पामिम ओन्मी, लावो पुरस्कार ने कोलेका कोङङा ल्वासु़ र्वाक्पा हाम गानी मेचनी? मेम्मिमका पुरस्कार ल्वापा बेसाका गानी ओन्नी। 25 ओन्सीडा ओन्पा मु़चु़ खोत्ले दोसीडा चङचङया दु़म्साका जो़होमका दोपा दु़म्मी। पुयु़लुक्पा मुकुटकाम लागि मेर्मिमका मेम बोमी, लावो गुइ ने हेल्लो लोवो पुयु़ मेलुक्पा मुकुटकाम लागि आरे बिइ। 26 मेम्मिमका गो हाम वो मेडार्पा होम्साका मेडेङा मेओन्ङु। मेडेङा मुठिम ओपा होङङा गो मुठिम मेओपु। 27 आ त्वाका त्वापलाई योपु, मा जो़होमका जु़लु, मेएँ माला ने वाङमिमलाई जो़पा-सेला थो़बेट्पुमिमिम चङडा गो पुरस्कार ल्वामु मेघ्रेट्पा दु़म्ङु। |
© Wycliffe Bible Translators, Inc. All rights reserved.
Wycliffe Bible Translators, Inc.