१ कोरिन्थी 8 - थुलुङ राईङाटालाई ग्वाक्मा पोमु-डुमु 1 ङाटालाई ग्वाक्मा पोमु-डुमुकु दुथाम गो र्वाङु, गुइ खोत्लेका च, गुइ खोत्लेका नेप्ची ल्वास्तिम बु। नेप्चीका गुइ डोक्पु लिसिबेसा, लावो रिखामका जो़पा दु़म्बेसा। 2 उहेम मु़चु़का “गो कोङनिम ल्वा थेट्पु” र्वाक्पा मिम्सी, गुका थेन्मु बासिक्पा ल्वा आथावो मेथेथिङा बुमिम दु़म। 3 लावो कोङनिमका माम्चु़नीलाई रिखाम बु़ माला मेरामलाई माम्चु़नीका छेमी। 4 मेम्मिमका ङाटालाई ग्वाक्मा पोमु-डुमुकु दुथाम र्वाकी माला सु़म्दिसेरडाम ङाटा हाम वो मेएँ, मा कोले माम्चु़नीडाम वाङमिम सु़ वो मेबुमी र्वाक्पा ल्वा गुइ चडिम बु। 5 मेम्मा सुबु नुङ पाह्रीलाम नङ कोङङा बाट्पा नो़पमिम वो बुमी रोओ। “नो़पमिम” नुङ “ङाचो़मिम” आच्छाङा हापाङा बुमी र्वामी, 6 लोवो इकीमा लागि ने कोलेङा माम्चु़नी पाप बुमी। गुमीका खोत्ले प्रङ्मिडी, उनीमा लागि गुइ बुइमिम। इकीमा लागि कोलेङा ङाचो़, येशू ख्रीष्ट सो़, गुमीलामकाङा माम्चु़नीका खोत्ले प्रङ्मिडी, मा गुमीलामकाङा गुइ बुइमिम। 7 मेम्मा वो खोत्लेका ने ओराम मेचमी। ङाटा आच्छाङा र्वाक्साका कोङनिम मु़चु़काम ङाटा सेव साट्पा बादु़खाम दु़म, मा ङाटालाई ग्वाक्मा पोमु-डुमु मेर्मिमका पोमिलो मेराम ने आच्छाङाम नो़पमिमकु सो़रलोले बेसी र्वाक्पा लु़मी। मेम्मा मेर्मिमकाम जो़पा नुङ मेजो़पा ल्वा छेमु मेचापा न बुमिमका मेराम पोमु-डुमुलामका “गो मेसेपा दु़म्ङोडो” र्वाक्पा मिम्डु़। 8 लावो पोमु-डुमुका गुइलाई माम्चु़नीकु ङादोडा लमु घ्रेट्पा मेदु़म्बेसा। मेपि लोवो गुइलाई मेजो़पा मेदु़म, मा पि लोवो हाम वो जो़पा मेदु़म। 9 लावो चङचङया बानी वो, गानी वाङ दु़म्निमका याक्के थो़रनुङमा इनी ङोप्सो़मिमलाई छु़ल मेबेबेडु़मिनु़। 10 याक्के नेप्चीनुङ थो़रलु़पा कोङनिम मु़चु़का गानी थेट्पा-चक्पा मु़चु़का ङाटा सेव साट्पा सो़रनेमगोडा पेन्निम ल्वास्तु़ माला, ङाटालाई ग्वाक्मा पोमु हाम उ सो मेहन मा? 11 मेम्मा याक्के नेप्चीनुङ थो़रलु़पा मु़चु़, उहेमकाम लागि ख्रीष्ट सिम्डी, मेरामलाई इनीमा नेप्चीका पुयु़लुक्तु़म बु। 12 आरेसाका गानी थो़रलु़पा इनी वा-ल्वाककु कोर्थो़लाम छु़ल बोनिमा मेर्मिमकु याक्के नेप्ची नो़बेनिलो, ख्रीष्टकु कोर्थो़लाम गानी छु़ल बोनी। 13 मेम्मिमका गो हाम पेउ मेरामका थो़रलु़पा आमा वा-ल्वाकलाई छु़ल वामबेडु़ माला आथाडा आनो गो हेल्लो वो सो़ मेपेउ, मेम्साका वा-ल्वाकलाई छु़ल वाममेबेट्पु। |
© Wycliffe Bible Translators, Inc. All rights reserved.
Wycliffe Bible Translators, Inc.