१ कोरिन्थी 7 - थुलुङ राईलालीकुन्दा 1 गानी र्याक्साका गोलाई हिला बेन्निम ल्वाकु दुथाम आरे र्वाङु, वोस्चो़का लालीकुन्दा मेबु़मिमङा जो़पा दु़म। 2 लावो हापा नाम्सु़रु़ दु़म्मिमका खोत्ले वोस्चो़काम उनी त्वाकामङा नाइमे दु़म्मु बासी, मा खोत्ले मेसेमकाम उनी त्वाकामङा वोचु़ दु़म्मु बासी। 3 वोचु़का उ नाइमेनुङ बोमु बासिक्पा खोत्ले खारी बु़नु़ मा नाइमेका वो वोचु़नुङ बोमु बासिक्पा खोत्ले खारी बु़नु़। 4 नाइमेकु मिरो़म उ त्वाकाम मेएँ, लावो उ वोचु़काम सो़। मेम्साकाङा वोचु़कु मिरो़म उ त्वाकाम मेएँ, लावो उ नाइमेकाम वो सो़। 5 वोचु़-मोचु़ अम्मुडाम उची त्वापलाई वाङ मेबोचिनु़। वाङ दु़म्निङा लोवो त्वाप-त्वापडा मुलु़ बेसाका सो़म्दी बोमु लागि कति दु़पा थारीका वाङ दु़म्नी। मेम्मा आथावो कोयो बानी, मेएँ माला ने इनी त्वापलाई जो़होमका मेजु़ल्निमिमका शैतानका गानीलाई छु़ल वाम्बेन्मु चाम्नी। 6 ओराम ल्वा गानी बोमुङा बासी र्वाङडोम मेएँ, लावो बोमु चाम्नी र्वाक्साका लु़म्ला बेट्निनिम कोङङा र्वाङु। 7 खोत्ले मु़चु़मिम गो होङङा त्वापङा बुमिनु़ र्वाक्पा न बेउ। लावो खोत्ले मु़चु़का माम्चु़नीलाम त्वा-त्वाहोम राप्लावा ल्वाम्डिम बु, कोलेका को खालकाम कोङमीका वाङखालकाम। 8 लालीकुन्दा मेबेपामिम नुङ अर्दोमेमिमलाई गो र्वाङु, मेर्मिम गो होङङा लालीकुन्दा मेबेसाका बुमी माला मेर्मिमलाई जो़पा दु़म। 9 लावो मेर्मिमका उनीमा त्वाकु न बन्मु मेचाम्मी माला लालीकुन्दा बोमिनु़। हेङालोने वाङमिमनुङ अम-अम द्वाक्तो बुमुडाम ने लालीकुन्दा बोमुङा जो़पा दु़म। 10 लालीकुन्दा बोमु दु़म्पामिमलाई गो आरे बेबेनिनी (गो बेबेनिनिमिम मेएँ, लावो ङाचो़का बेबेनिनिमिम सो़): मोचु़का उ वोचु़ मेडिड्नु़। 11 गुका डिडु़ङा लोवो गु लालीकुन्दा मेबेसाका बुमु बासी मेएँ माला गु उ वोचु़नुङ दु़साका बुनु़। मेम्मा वोचु़का वो उ नाइमेलाई मेडिड्नु़। 12 वाङमिमलाई गो र्वाङु, ओराम ङाचो़का र्वाम्डिम मेएँ, लावो गो र्वाङडोम सो़, कोङनिम वा-ल्वाककाम नाइमे येशूडा थो़रमेलु़पा बु, मा गुका उ वोचु़नुङ बुमु न बु़ माला गुका उ नाइमे मेङेट्नु़। 13 कोङनिम मेसेमकु वोचु़ येशूडा थो़रमेलु़पा बु, मा गुका उ नाइमेनुङ बुमु न बु़ माला मेरामका उ वोचु़ मेङेट्नु़। 14 हेङालोने थो़रमेलु़पा वोचु़ उ नाइमे थो़रलु़पा बुमिमका माम्चु़नीका रमु घ्रेट्पा दु़म, मेम्साका ङा थो़रमेलु़पा नाइमेकाम वो उ वोचु़ थो़रलु़पा बुमिमका माम्चु़नीका रमु घ्रेट्पा दु़म। मेएँ माला ने उचीमा चो़च्चो़मिम मेसेपा दु़म्मिवा, लावो मेर्मिम ने माम्चु़नीका रमु घ्रेट्पाङा बुमी। 15 लावो थो़रमेलु़पाका फ्वासिमु न बु़ माला फ्वासी लोवो फ्वासिनु़। मेराम थारीका थो़रलु़पा मे रिचो़ लोवो वोस्चो़ लोवो बादे-बादे मेदु़म। हेङालोने माम्चु़नीका गुइलाई न-गो भ्रसिक्तो बुमु येसाड्डामिम सो़। 16 थो़रलु़पा नाइमेनी, हाम गानी मेचनी, गानी थो़रडा बुनिमिमका इनीमा वोचु़मिम वो थो़रडा रोमु चाम्मी डे? मेम्साकाङा थो़रलु़पा वोचु़नी हाम गानी मेचनी, गानी थो़रडा बुनिमिमका इनीमा नाइमेमिम वो थो़रडा रोमु चाम्मी डे? माम्चु़नीका गानीलाई येट्निमडा ङा बानिम बानी 17 माम्चु़नीका येट्निमिलो ङादो गानी खोत्लेङा हेप्माम बासीडा बान्नी मा ङाचो़ येशूका गानीलाई हामकाम लागि थु़ट्निमिमिम बु, मेम्साका ङा गानी बानिम बानी। खोत्ले मण्डलीका बोमु बासिक्पा आमा सीसि वो ओराम ङा सो़। 18 हाम कोङ मु़चु़ माम्चु़नीका येन्मु ङादो उ खिरिरि क्रिप्सी दु़स्ताम बाइडा? मेम माला खिरिरि क्रिप्सी मेबेम्मा होप्माम दु़म्मु मेमाल्नु़। हाम कोङ मु़चु़ माम्चु़नीका येन्मु ङादो उ खिरिरि क्रिप्सी मेबेम्मा बाइडा? मेम माला गुका उ खिरिरि क्रिप्सी मेबु़नु़। 19 हेङालोने खिरिरि क्रिप्सी बोमु नुङ मेबोमु हाम वो मेएँ, लावो माम्चु़नीका र्वामिमिम होम्साका बोमुङा डोक्पु सो़। 20 गानी हेप्माम बासीडा बान्निलो माम्चु़नीका येट्निमिम बाइडा, मेरामडाङा गानी खोत्ले बानिम बानी। 21 माम्चु़नीका येट्निमिलो हाम गानी डु़ल्चो़ बान्नी? मिम्ताम-सो़र्ताम मेबेनी, लावो गानी डु़ल्चो़लाम वाङ दु़म्मु चाम्नि माला मेमङा बेनी। 22 हेङालोने माम्चु़नीका ङाचो़ येशूडा येट्मिडिलो उहेम मु़चु़ डु़ल्चो़ बाइडा, मेराम मु़चु़ ङाचो़काम लागि उ दाप होर्सिक्पा दु़स्ताम बु। मेम्साकाङा माम्चु़नीका येट्मिडिलो उहेम मु़चु़ डु़ल्चो़ मेबायावा मेराम ओम्लो ख्रीष्टकु डु़ल्चो़ दु़स्ताम बु। 23 माम्चु़नीका इनीमा थि सोम्डिमा भ्रेन्निमिम बु, मेम्मिमका मु़चु़मिमकु डु़ल्चो़ मेदु़म्नी। 24 वा-ल्वाकनी, गानी खोत्ले माम्चु़नीका येट्निमिलो हेप्माम बासीडा बान्नी, मेसिन्डा माम्चु़नीनुङ बानिम बानी। लालीकुन्दा मेबेपा रिचो़ नुङ अर्दोमेकु दुथाममिम ल्वा 25 लालीकुन्दा मेबेथेङा बाट्पामिमकु दुथाम गानीलाई बेबेन्मु बासिक्पा ङाचो़ येशूका गोलाई र्वाम्डिम ल्वा हाम वो मिबु। ङाचो़कु न-थो़मका माम्चु़नीकु थो़रलु़इमिम मु़चु़ दु़म्ङोडोमका आमा नडाम ल्वा गो गानीलाई र्वाङु। 26 ओम्लोम दु़खा रेप्डिलो गानी हेप्माम बासीडा बुनिमिम बु, मेम्साकाङा बुनिमिम जो़पा दु़म र्वाक्पा गोलाई लु़। 27 हाम गानी लालीकुन्दा बेन्निम बु? मेम माला नाइमेनुङ फ्वाम्सिमु मेमाल्नी। लालीकुन्दा मेबेथेङा बुनी? मेम माला लालीकुन्दा बोमु मेमाल्नी। 28 लावो गानी लालीकुन्दा बोनी माला छु़ल बोनिमिम ने मेदु़म। लालीकुन्दा मेबेथेङा बाट्पा रिचो़का लालीकुन्दा बु़लो छु़ल बु़डु़म मेदु़म। लावो लालीकुन्दा बेपामिमका ओराम मिरो़मडा छो़म दु़खामिम ल्वामु बासी, मा गो गानीलाई ओराम दु़खाडाम गेमु माल्निनी। 29 वा-ल्वाकनी, गो गानीलाई र्वामु मालुमिम ल्वा ओरामङा सो़, ङाचो़ दालाङा योमी। आथाडा आनो नाइमे बाट्पामिमका नाइमे मेबाट्पा होप्मामङा दु़म्साका बुमिनु़। 30 ख्रापामिम मेख्रापा होप्माम, मा गेर्सिद्वाक्पामिम गेर्सिमेद्वाक्पामिम होप्माम दु़म्मिनु़मा बुमिनु़। भ्रेपामिमका उ त्वाप नुङ हाम वो मेबाट्पा होङङा लु़नु़। 31 सु़म्दिसेरडाम सोजाममिम मोक्पामिमका मेर्मिमडा न मेसोक्मिवाम होप्माम दु़म्मिनु़। हेङालोने सु़म्दिसेरकु ओम्लोम ङाली दाम्मा ल। 32 गानी मिम्ताम-सो़र्ताम मेबेसाका बानी र्वाक्पा आमा न बु। लालीकुन्दा मेबेपा मु़चु़का हेसाका ङाचो़ येशूलाई गेर्सीबेट्पा र्वाक्साका ङाचो़कु दुथामङा मिम्ताम-सो़र्ताम बु़। 33 लावो लालीकुन्दा बेपा मु़चु़का ने उ नाइमे हेसाका गेर्सिबेन्मु र्वाक्साका सु़म्दिसेरडाम ल्वाडा मिम्ताम-सो़र्ताम बु़। 34 मेराम मु़चु़कु न नले दु़म। मेम्साकाङा लालीकुन्दा मेबेपा रिचो़का मिरो़म नुङ न-गो निफिडाङा हेसाका सेपा दु़म्मु र्वाक्साका ङाचो़ येशूकु दुथाम मिम्ताम-सो़र्ताम बु़। लावो लालीकुन्दा बेपा मेसेमका ने हेसाका उ त्वाकु वोचु़ गेर्सिबेन्मु र्वाक्साका सु़म्दिसेरडाम ल्वाडा मिम्ताम-सो़र्ताम बु़। 35 गो इनीमा लागि पेर देन्मु माल्तोम मेएँ, गानीलाई जो़पा दु़म्नु़ र्वाक्साका ओराम ल्वा र्वाङुमिम सो़। गानी वाङमिम ल्वाडा मिम्ताम-सो़र्ताम मेबेसाका छो़म न सोक्नीमा ङाचो़कु सो़रलोले बेनिम बानी र्वाक्पा आमा न बु। 36 कोङनिम मु़चु़का उमाडा बिम्मा मेसेमलाई जो़होम बेउतोम मिबु र्वाक्पा मिम्डु़, मा मेराम मेसेमकु लालीकुन्दा बेपा दु लमु खाप्डु़म बु, मा वो मे वोस्चो़का लालीकुन्दा बोमु न बु़ माला लालीकुन्दा बु़नु़। ओरामडा हाम वो छु़ल मेदु़म। मेर्चिपकाम लालीकुन्दा दु़म्मु बासी। 37 लावो उहेम मु़चु़का लालीकुन्दा मेबेउ र्वाक्पा मिम्डु़म बु गु सु़काम वो ल्वा मेथो़साका उ न बडु़मा उमाडा बिम्मा मेसेमनुङ लालीकुन्दा मेबेपा मुलु़ बु़ माला गुका जो़पाङा बु़। 38 आरेसाका उहेम मु़चु़का उमाडा बिम्मा मेसेमनुङ लालीकुन्दा बु़ मेराम मु़चु़का जो़पा बु़, लावो उहेमका गुलाई लालीकुन्दा मेबु़ मेरामका हापा जो़पा बु़। 39 वोचु़कु साम बुमिमसम्म मोचु़का वाङमिमनुङ लालीकुन्दा बोमु मेल्वासु़। लावो उ वोचु़ सिमिम चङडा उ न होप्माम मु़चु़नुङ लालीकुन्दा बोमु चाप्सु़। लावो मेराम मु़चु़ ने ङाचो़ येशूडा थो़रलु़पा दु़म्मु बासी। 40 लावो गुका लालीकुन्दा मेबेसाका बु माला छो़म गेर्सिमु ल्वासु़ र्वाक्पा लु़ङु। आमागोडा वो माम्चु़नी-पेल बुमी र्वाक्पा गो लु़ङु। |
© Wycliffe Bible Translators, Inc. All rights reserved.
Wycliffe Bible Translators, Inc.