१ कोरिन्थी 6 - थुलुङ राईथो़रलु़पामिमगोडाम रिबुसी 1 गानीगोडाम कोलेका कोङमी ल्वाकनुङ रिबुसी किस्तु़म बु माला निया बेला सो़म्सिमु माम्चु़नीकु मु़चु़मिमकाडा मेलक्साका माम्चु़नीडा थो़र मेलु़पा मु़चु़मिमकाडा हेसाका लमु चाप्सु़ मा? 2 माम्चु़नीकु मु़चु़मिमका सु़म्दिसेरकाम निया बोमी र्वाक्पा हाम गानी मेचनी? सु़म्दिसेरकाम निया गानी बोनी माला याक्केतो रिबुसी ल्वा फ्यामु हाम गानी मेचाम्नी? 3 गुइ पाह्रीचो़मिमकाम निया बिइ र्वाक्पा हाम गानी मेचनी? मेम माला ओराम सुबुडा गुइडला दु़म्पाम बाट्पा ल्वाकु निया बोमु हेङा मेचाप्सी मा? 4 आरेप्माम रिबुसीमिम गानीगोडा बु माला मण्डलीका हाम होङङा मेलु़पा पाखाडाम वाङ नियाचो़मिमकाडा गानी हेङा लनिमिम? 5 इनी क्रो़म लु़बेन्मु लागि गो गानीलाई र्वाङु। वा-ल्वाककु रिबुसीडा न-थो़म घ्रो़म्बेन्मु चापा नेप्चीनुङमा मु़चु़ गानीगोडा सु़ वो मेबुनी? 6 लावो मेम मेबेसाका थो़रलु़पा कोले ल्वाक थो़रलु़पा कोङमी ल्वाककु कोर्थो़लाम बक्साका मे थो़रमेलु़पामिमकाडा निया बेला सो़सिप्डा लक्पा? 7 गानीगोडा कोलेका कोङमीकु कोर्थो़लाम रिबुसी बोमुङा गानी सो़ट्निम र्वाक्पा रेम्बु़। मेम मेबेसाका, मेजो़पा दु़म्सी हेङा मेइम्मु? हेङा लु-फेले बेला मेसो़म्सिमु? 8 लावो गानी इनी त्वाकाङा लु-फेले बोनी मा मेजो़पा बोनी, मे वो इनीमा त्वाकु थो़रलु़पा वा-ल्वाकलाई ङा! 9 रु़चो़मिमका माम्चु़नीकु किब्दी मेल्वामी र्वाक्पा हाम गानी मेचनी? नेप्ची मान्थिम मेदु़म्नी। सु़नुङ लोवो अम्बाल्पामिम दु़म्नु़का, ङाटा सेव साट्पामिम, नाम्सु़रु़ बेपामिम, छो़लो़सापमिम, वोस्चो़का वोस्चो़नुङ अम्पामिम, 10 खुचु़वामिम, रारी बेपामिम, डु़सेवामिम डक्साका जेपामिम वाङमिमलाई रोट्पामिमका माम्चु़नीकु किब्दी मेल्वामी। 11 गानीगोडाम कोङनिम वो आरेप्मामङा बान्नी। लावो माम्चु़नीका गानीलाई सो़ल्निमिमा छु़ललामका सेपा दु़म्बेट्निमिम बु, मा ङाचो़ येशू ख्रीष्टकु नङडा इकी माम्चु़नीकु पेललाम उनीमा ङादोडा गानीलाई जो़पा दु़बेट्निमिम बु। मिरो़मका माम्चु़नीकु नङ कोक्नी 12 गानीगोडाम कोङनिमका आरे र्वानी, “गोलाई बेबेद्वाक्पा ल्वा हाम लोवो बोमु चापु।” लावो खोत्ले ल्वाका जो़पा मेबेसा। “गोलाई बेबेद्वाक्पा ल्वा हाम लोवो बोमु चापु।” लावो गो उहेम ल्वाकाम वो डु़ल्चो़ मेदु़म्ङु। 13 गानी आरे वो र्वाक्नी, “पोमु-डुमु ख्वाचेपकाम लागि, मा ख्वाचेप पोमु-डुमुकाम लागि।” ओराम आच्छाङा, लावो माम्चु़नीका निफिङा पुयु़लुबेन्मी। मिरो़म नाम्सु़रु़ बोमु लागि मेएँ, लावो ङाचो़काम लागि सो़, मा ङाचो़ मिरो़मकाम लागि सो़। 14 माम्चु़नीका उनी यु़मका ङाचो़ येशूलाई सिमुलामका फम्डी, मा गुइलाई वो उनी यु़मका फक्सामी। 15 इनीमा मिरो़म ख्रीष्टकु मिरो़मगोडाम अंगमिम र्वाक्पा हाम गानी मेचनी? हाम गो ख्रीष्टकु मिरो़मडाम अंगमिमलाई छो़लो़माकु मिरो़मडाम अंग दु़म्बेन्मु? मेम ने मेदु़म्नु़। 16 छो़लो़मानुङ अम्पा मु़चु़ मिरो़मडा मेरामनुङ कोले दु़म्ची र्वाक्पा ल्वा हाम गानी मेचनी? हेङालोने माम्चु़नीकु सिजेमडा र्याक्मा, “मेर्चिप निफिङा कोले दु़म्ची” 17 लावो उहेम मु़चु़ ङाचो़नुङ कोले दु़म, मेराम मु़चु़ गुमीनुङ पेलडा कोलेङा दु़म। 18 नाम्सु़रु़ मेबेनी। मु़चु़का वाङमिम हेप्माम छु़ल बु़ लोवो मेराम मिरो़मकु पाखालाममिम दु़म, लावो नाम्सु़रु़ बेपा मु़चु़का उ त्वाकु मिरो़मकाम कोर्थो़लाम छु़ल बु़। 19 इनी मिरो़म माम्चु़नी पेलकु सो़रनेम सो़, मेराम पेल गानीगोडा बुमी, मेराम माम्चु़नीलाम ल्वान्निम र्वाक्पा हाम गानी मेचनी? गानी इनी त्वाप ने इनी त्वाकामङा मेएँ। 20 गानीलाई माम्चु़नीका थि सोक्साका भ्रेन्निमिम सो़। मेम्मिमका गानी इनी मिरो़मकाङा माम्चु़नीलाई डोक्पु बेनी। |
© Wycliffe Bible Translators, Inc. All rights reserved.
Wycliffe Bible Translators, Inc.