१ कोरिन्थी 4 - थुलुङ राईथु़र्मा मु़चु़मिम ख्रीष्टकु डु़ल्चो़ 1 गुकु ख्रीष्टकु डु़ल्चो़ नुङ माम्चु़नीकु दुथाम थक्मा आच्छाङाकाम ल्वा सो़मु खुन्चु़म ल्वापा मु़चु़ र्वाक्साका मु़चु़मिमका गुकुलाई मिम्मु बासी। 2 मेम्मा आरेसाका खुन्चु़म ग्वाक्मा मु़चु़ थो़र लु़इमिम दु़म्मु बासी। 3 गानी लोवो वाङमिम मु़चु़का लोवो आमा लागि निया बोनिमिम ने आमा लागि हाम वो मेएँ। गो आ त्वाकाङा वो त्वाकु निया मेबेउ। 4 गो हाम वो ख्लो़त्तोम मिबु होङङा लु़ङु, लावो गो आच्छाङा मुमा बेन्ला सो़सिङडोम मिबु र्वामु मालुमिम ने मेएँ। आमा निया बेपा ने ङाचो़ बुमी। 5 मेम्मिमका ङाचो़ येशू योमु ङादो हाम वो निया मेबेनी। गुमीका ङा तुकुम्चिमडा थक्मा ल्वा ओलडा रेन्मी, मा मु़चु़मिमकु न नुङ गो वो रेम्बोमी। मेम्लो मु़चु़मिमका माम्चु़नीलाम त्वा त्वाहोम डोक्पु बेला सो़म्सिमी। 6 वा-ल्वाकनी, गो गानीलाई “जो़होमका बुमु बासी” र्वाक्साका र्याक्मा ल्वा थेसीथेन्बेन्मु लागि आमा नुङ अपोल्लोसकु दुथाममिम ल्वा गो सो़उतोम बु। आरेसाका कोले कोङमीलाम बासिक्साका कोङमीलाई छेमछेम दुमु जो़पा मेएँ। 7 सु़का गानीलाई वाङमिम मु़चु़डाम डोक्पु दु़म्बेट्नी? गानीनुङ हाम बु मेराम गानीलाई माम्चु़नीका ग्वाक्निमिम मेएँ मा? माम्चु़नीका ग्वाक्निम माला हेङा गानी डोक्पु लिन्सिनी? 8 गानी खोत्लेका छो़म लिन्ल्याट्निम बु ए! गानी खाप्चीनुङमा दु़म्निम बु ए! गुकु मान्थिङा गानी हप दु़म्निम बु ए! हाम गानी आच्छाङा हप दु़म्निवाम माला गुकु गानीनुङ साखाम मेथो़कुवा मा? 9 क्वाल्बाडा घ्ल्वापा मु़चु़मिमका सो़पामा सिमु देन्दे ल्वापा चु़म्मामिमलाई खोत्लेडाम चङडा जु़ल्मिमा लाम्दिबेन्मी। मे चु़म्मामिमलाई होम्साकाङा माम्चु़नीका गुकु थु़र्मामिमलाई वो खोत्लेडाम चङडा जु़ल्तिकिम बु। गुकु खोत्ले सु़म्दिसेर, पाह्रीचो़ नुङ मु़चु़मिमकु ङादोडा रङमा दु़म्तोकोम बु, र्वाक्पा गोलाई लु़। 10 गुकु ने ख्रीष्टकाम लागि नेप्ची मान्थिम, लावो गानी ने ख्रीष्टनुङ नेप्चीनुङमा बुनी! गुकु ने मेचापा बुकु, लावो गानी ने यु़मनुङमा बुनी! गानी ने खोत्लेका डोक्पु बोनिमी, लावो गुकुलाई ने डोक्पु मेबोकिमी! 11 ओम्लो वो गुकु क्रु़म-कोरा सिपा बुकु, आकी ये-सेम मिबु। गुकु याल्ला सो़सिन्कु, नेम-किम मान्थिम बुकु। 12 आकी पोमु-डुमुकाम लागि आकी त्वाकु ल्वाका ब्राम्दु़ल्वा बोकु। मु़चु़मिमका वाइतो बेन्किमिलो गुकु जि-वा ग्वाकु। मु़चु़मिमका आकी थो़मतेर्मिलो इम्सिन्कु। 13 मु़चु़मिमका आकीमा मेजो़पा नङ फोन्मिलो जो़होमका जेकु। ओम्लोसम्म वो गुकु सु़म्दिसेरडाम घ्राम्लु़पा तु़ नुङ सुबुडाम फुर्कु दु़म्तोकोम बु। 14 गानीलाई इनी क्रो़म लु़बेन्मु र्वाक्साका गो ओराम र्याक्तो बेउमिम मेएँ, लावो आमा द्वादीबुङ चो़च्चो़लाई होम्साका लु़म्ला बेन्मु लागि सो़। 15 ख्रीष्टडा गानीलाई सीपा मु़चु़मिम ङार्मुङा मेझापा बुमी, लावो इनीमा पाप ने सेर्पा मेबुमी। गानीलाई जो़पा-सेला थो़बेसाका येशू ख्रीष्टडा गो इनीमा पाप दु़म्ङोडोम बु। 16 मेम्मिमका गानी आमा बेसिबेनी र्वाक्साका गो गानीलाई छो़म र्वाङु। 17 ओरामकाम लागि ङा गो तिमोथीलाई इनीमाडा थु़र्तोङा लेट्पु। गु ङाचो़ येशूकु थो़र लु़इमिम आमा द्वादीबुङ तारापाचो़ सो़। गो खोत्लेथो़ मा खोत्ले मण्डलीडा सीत्तोमिम होम्साकाङा ख्रीष्ट येशूडा आमा त्वारो़मडा गो हेसाका बुङुमिम बु, मेराम गुका गानीनुङ सो़यु़। 18 गो इनीमाडा मेरोङु र्वाक्पा मिम्साका गानीगोडाम कोङनिम डोक्पु लिन्सिनिमिम बु। 19 लावो माम्चु़नीका न बेम्डी माला गो इनीमाडा दालाङा रोङु, मा मे डोक्पु लिसिक्पा मु़चु़मिमका जेम्डिम ल्वा कोङङा मेएँ मेर्मिमकु यु़म हाम रेछा मेराम रेपु। 20 माम्चु़नीकु किब्दी जेसीडा मेएँ, यु़मडा दु़म। 21 गानी हाम द्वानी? गो गानीलाई याल्डा डु़लु़म्चो़ रेन्मु डे गो याक्के दु़म्साका रिखाम रेन्मु? |
© Wycliffe Bible Translators, Inc. All rights reserved.
Wycliffe Bible Translators, Inc.