१ कोरिन्थी 3 - थुलुङ राईमण्डली फ्वासिम्डिम 1 वा-ल्वाकनी, गानीनुङ जेङडोलो माम्चु़नी-पेलनुङमा मु़चु़मिमनुङ जेङडोम होम्साका जेमु मेचापुवा, लावो सु़म्दिसेरडाम मु़चु़मिम, ख्रीष्टडा मालो गक्पा चो़च्चो़नुङ होम्साका जेङडो। 2 गो गानीलाई दु़दु़ ग्वानिनी, डोमु मेझापा पोमु मेग्वानिनिवा, हेङालोने मेराम पोमु चापा मेबानिवा, आथावो गानी चाप्निम मिबु। 3 गानी आथावो ओ सु़म्दिसेरडाम मु़चु़ होप्मामङा बुनी। गानी नाचु़र बेबोनी मा छोक्चो बेबोनी माला हाम गानी सु़म्दिसेरडाम मु़चु़मिम होप्माम मेदु़म्निवा मा? 4 हेङालोने कोलेका “गो पावलकाम” मा कोङमीका “गो ने अपोल्लसकाम” र्वानी माला हाम गानी सु़म्दिसेरडाम मु़चु़ होप्माम मेदु़म्निवा मा? 5 अपोल्लोस सु़ मा? मा पावल सु़ मा? गुचुकु ने माम्चु़नीकु डु़ल्चो़ कोङङा, उहेमलामका गानी थो़र लु़नी। ङाचो़का बेबेच्चिकिमिम आची खारी गुचुकु बेच्चोकोम सो़। 6 गो भ्रल ख्लिउतो, अपोल्लोसका कु फिक्तु़, लावो माम्चु़नीकाङा बर्बेट्मिडी। 7 ख्लिपा मु़चु़ हाम वो मेएँ, कु फिक्पा मु़चु़ वो हाम वो मेएँ। लावो बर्बेट्पा माम्चु़नी डोक्पु सो़। 8 ख्लिपा नुङ कु फिक्पा निफिकाम खारी ने कोले ङा सो़। मेर्चिपका उची खारीकाम पुरस्कार ल्वाची। 9 हेङालोने गुचुकु निफिङा कोयोकोयो माम्चु़नीकु खारी बेपा सो़। गानी ने माम्चु़नीकु ब्याङसी, मा माम्चु़नीकु नेम सो़। 10 माम्चु़नीका गोलाई दिदाम ग्वाङडिमिमका नेम बनेबेसी थेट्पा मु़चु़ होम्साका फार गत्तो मा कोङनिमका मेरामडला नेम बनेबु़। लावो मेरामडला बनेबेत्तो लक्पाका हेसाका बनेबोमु बासिक्पा मेराम ल्वाडा चङचङया बुमु बासी। 11 हेङालोने येशू ख्रीष्टङा माम्चु़नीका गट्मिडिम नेमकु फार सो़। वाङमिम सु़का वो फार गन्मु मेचाप्सु़। 12 कोङनिम मु़चु़का ओराम फारडला सो़ना, मत्तो, हापा थिकाम लुङ, सङ, लु़सु़ लोवो परालका लोवो नेम बनेबोमी माला, 13 मेराम खारी निया दु़म्मिमनेम मुलामका जो़होमका रेम्बेसी। मेम्मा खोत्ले मु़चु़का हेप्माम खारी बेम्डिम बु मेराम मुका छाम्डु़। 14 मेराम नेमकु फारडला बनेबेपा मु़चु़कु खारी मुगोडा फिकिलो फोका मेदु़प्सावा माला मेराम मु़चु़का पुरस्कार ल्वासु़। 15 मुका मेरामकु खारी घ्रु़डा माला मेराम मु़चु़कु खोत्ले खारी पुयु़लुकु़, लावो गु उ त्वाप ने मुलामका स्वाङडाम होम्साकाङा नु़पा दु़म। 16 गानी इनी त्वाप माम्चु़नीकु सो़रनेम सो़, मा माम्चु़नीकु पेल गानीगोडा बुमी र्वाक्पा हाम गानी मेचनी? 17 कोङनिमका माम्चु़नीकु सो़रनेम पुयु़लुकु़ माला माम्चु़नीका वो मेरामलाई पुयु़लुबेन्मी। हेङालोने माम्चु़नीकु सो़रनेम सेपा दु़म मा मेराम सो़रनेम गानीङा सो़। 18 सु़का वो उ त्वापलाई ताङताहेरथो़ मेलनु़। गानीगोडाम कोङनिमका उ त्वापलाई ओराम सु़म्दिसेरडाम नेप्चीनुङमा मिम्सी माला गु नेप्ची मान्थिम दु़म्नु़, मेम्साका कोङङा आच्छाङाकाम नेप्चीनुङमा दु़म। 19 हेङालोने ओराम सु़म्दिसेरकु नेप्ची माम्चु़नीकु ङादोडा नेप्ची मान्थिम ल्वा सो़। माम्चु़नीकु सिजेमका वो र्वा, “माम्चु़नीका मे नेप्चीनुङमा मु़चु़मिमकु बाछेन्दा लिसीडा चु़म्मी।” 20 मेम्मा आथावो माम्चु़नीकु सिजेमका र्वा, “नेप्चीनुङमा मु़चु़मिमकु न हाम ना हामकाम र्वाक्पा ङाचो़का चमी।” 21 मेम्मिमका मु़चु़का बोमु चाप्सु़मिम खारीडा उहेमका वो उ नो़ मेल्वाक्थाट्नु़। हेङालोने खोत्ले ल्वा इनीमाङा सो़। 22 पावल लोवो अपोल्लोस लोवो केफास, मा सु़म्दिसेर लोवो त्वारो़म लोवो सिमु लोवो ओम्लो थारी लोवो दिफुम थारी लोवो खोत्ले इनीमाङा सो़। 23 गानी ख्रीष्टकाम, मेम्मा ख्रीष्ट ने माम्चु़नीकाम सो़। |
© Wycliffe Bible Translators, Inc. All rights reserved.
Wycliffe Bible Translators, Inc.