१ कोरिन्थी 15 - थुलुङ राईख्रीष्ट सिमुलाम बम्गेम्डिम ल्वा 1 वा-ल्वाकनी, गो गानीलाई थो़बेट्निनिम जो़पा-सेला मिम्बेन्मु आमा न बु, उहेम गानी रन्नी मा मेरामडाङा बुनिम बुनी। 2 गो थो़बेट्निनिम ओराम जो़पा-सेलाडा थो़र बोनिमा मेडिसाका मेरामडा दु़म्निम बुनी माला ओरामका गानीलाई सेल्नी, मेएँ माला ने गानी थो़र बेन्निम ने हाम ना हामकाम दु़म। 3 हेङालोने गो हाम ल्वाउतो मेराम छो़म डोक्पु ल्वा गानीलाई ग्वानिनिम बु: मेराम ने माम्चु़नीकु सिजेमका र्वामिम होम्साका इकीमा छु़लकाम लागि ख्रीष्ट सिम्डी, 4 मा गुमीलाई क्लु़म्मिडी, मा माम्चु़नीकु सिजेम होम्साका सुलेमनेम माम्चु़नीका गुमीलाई सिमुलाम फम्डी, 5 मा गुमी केफासकाडा, मा को-न (१२) थु़र्मामिमकाडा रेम्बेम्सिम्डी। 6 मेकोतिमा गुमी कोखेपकाङा ङो सङडाम वो हापा उनी सीसिपामिमकाडा रेम्बेम्सिम्डी। मेर्मिमगोडाम हापा मु़चु़मिम ओम्लो वो बुमी। लावो याङ-याङ ने सिमुदु़म्मडिम बु। 7 मेम्मा याकूब नुङ खोत्ले थु़र्मामिमकाडा गुमी रेम्बेम्सिम्डी। 8 खोत्लेडाम चङडा गो गक्पा थारी मेदु़थिङा गङडोम होप्माम मु़चु़नुङ वो गुमी रेम्बेसिम्डी। 9 थु़र्मामिमगोडाम खोत्लेडाम याक्के गोङा सो़। थु़र्मा र्वाला सो़म्सिमु मेघ्रेन्ङी। हेङालोने गो माम्चु़नीकु मण्डलीकु थो़मतेर्साक्तोम बाइडा। 10 लावो गो हाम बुङु, मेराम माम्चु़नीकु दिदामका दु़म्ङोडोम बु, मा गोडलाम उनीमा दिदाम हाम ना हामकाम मेदु़म्सावा। गो ने वाङमिम खोत्ले थु़र्मामिमडाम वो हापा मेझापातो खारीमिम बेउतो। लावो गो बेउतोम मेएँ, गोनुङ बाट्पा माम्चु़नीकु दिदामका। 11 मेम्मिमका गो गानीलाई जो़पा-सेला थो़बेट्निनी लोवो वाङमिम थु़र्मामिमका थो़बेट्निनी लोवो कोलेङा ल्वा गुकु थो़बेन्कु, मेराम गानी थो़रलु़न्निम बु। सिमुलाम बग्गेसी 12 ख्रीष्ट सिमुलाम बम्गेम्डी र्वाक्साका गुकु सो़कु, मा हेसाका गानीगोडाम कोङनिमका सिपा मु़चु़ मेबगे र्वा? 13 सिपा मु़चु़मिम बम्गेमिमिम मेदु़म माला ख्रीष्ट वो सिमुलाम बम्गेम्डिम मेदु़म। 14 ख्रीष्ट सिमुलाम बम्गेम्डिम मेएँ माला गुकु दो़त्तोकोम ल्वा नुङ इनीमा थो़र वो हाम ना हामकाम दु़म। 15 मेराम ल्वाडाम वो हापा गुइ माम्चु़नीकु दुथाम लिमा ल्वा सो़पा मु़चु़ दु़म्सी, हेङालोने माम्चु़नीका ख्रीष्टलाई सिमुलाम फम्डी र्वाक्साका गुइ सो़इडिम बु। लावो सिपा मु़चु़मिम सिमुलाम मेबम्गेमी माला ने गुमीका ख्रीष्टलाई सिमुलाम मेफक्मिवा। 16 हेङालोने सिपा मु़चु़ मेबम्गेमी माला ख्रीष्ट वो सिमुलाम मेबम्गेट्मिवा। 17 ख्रीष्ट सिमुलाम मेबम्गेट्मिवा माला इनी थो़र हाम ना हामकाम बु, मा गानी आथावो इनी छु़लकु साखाम गोडा बुनी। 18 मेम्मा ख्रीष्टडा थो़रलु़साका सिपा मु़चु़मिम वो पुयु़लुम्डी। 19 ख्रीष्टडा गुइ हाम हुम ल्वापा न बिइमिम ओराम सु़म्दिसेरडा बुइमिमसम्मकाम लागि कोङङा माला वाङमिम मु़चु़मिमडाम वो हापा नाम्नाम्चो़ गुइ दु़म्सी। 20 लावो आच्छाङा ख्रीष्टलाई माम्चु़नीका सिमुलाम फम्खेट्मिडी। सिपामिम वो सिमुलाम बम्गेमी र्वाक्पा ल्वा रेम्बोमु लागि ङादो सिट्पा मा होप्मामङा गुमी ने खोत्लेडाम ङादो सिमुलाम बम्गेम्डी। 21 हेसाका कोले मु़चु़लामका सु़म्दिसेरडा सिमुलाम रोक्ता, मेम्साका सिमुलाम बग्गेसी वो कोङमी मु़चु़लामका चो़म्सिड्डा। 22 हेङालोने आदमनुङ हेमकेम बाट्पा खोत्ले मु़चु़मिम सिमी, मेम्साकाङा ख्रीष्टनुङ हेमकेम बाट्पा खोत्ले मु़चु़का लाले त्वारो़म ल्वामी। 23 लावो सिमुलाम बग्गेसी आरेसाका पेन्तिका दु़म: ख्रीष्ट ने ङादो सिट्पा मा होङङा माम्चु़नीका ख्रीष्टलाई खोत्लेडाम ङादो सिमुलाम फम्डी, मेम्मा ख्रीष्ट योमिलो ख्रीष्टनुङ हेमकेम बाट्पा खोत्लेलाई माम्चु़नीका सिमुलाम फमी। 24 मेम्मा हुक्पा थारी रो। मेकोतिलो ख्रीष्टका खोत्ले किब्दी थो़पा साखाम, खोत्ले साखाम मा खोत्ले यु़म पुयु़लुमिमा किब्दी माम्चु़नी पापकु ल्वाडा ग्वामी। 25 हेङालोने ख्रीष्टका खोत्ले स्वाक्चिमोलाई उनी फेमखेल गोयु़ मेबेथु़मसम्म उनी त्वाकाङा साखाम थो़मु बासी। 26 ख्रीष्टका खोत्लेडाम चङडा पुयु़लुबेन्मिमिम स्वाक्चिमो ने सिमुलाम सो़। 27 माम्चु़नीकु सिजेमका र्वा, “माम्चु़नीका खोत्ले ख्रीष्टकु फेमखेल गोयु़ जु़ल्मिडिम बु।” ओराम र्वाक्मा ने माम्चु़नी उनी त्वापङा ख्रीष्टकु साखामगोडा दु़म्मी र्वाक्मा ने मेएँ, हेङालोने खोत्ले ल्वा ख्रीष्टकु साखामगोडा जु़ल्साक्पा ने माम्चु़नी उनी त्वाप ङा सो़। 28 माम्चु़नीका खोत्ले खारी बोमु दु़म्मिमिम चङडा ख्रीष्टकु साखामगोडा खोत्ले जु़ल्पा माम्चु़नीकु साखामगोडा तारापाचो़का वो उ त्वापलाई जु़लु़, मेम्मा आरेसाका माम्चु़नीका खोत्लेथो़म खोत्लेडला किब्दी थो़मी। 29 सिमुलाम मु़चु़मिम मेबम्गेमी माला सिपा मु़चु़मिमकाम लागि कु-रु़दु़म रम्माका हाम जो़पा दु़म मा? सिपा मु़चु़मिम मेबमी माला हेङा मु़चु़मिमका मेर्मिमकाम लागि कु-रु़दु़म रमी मा? 30 गुकु हेङा आकी त्वाप थारी-थारीकाङा ङिम्लु़सीडा दु़म्कुम बुकु? 31 वा-ल्वाकनी, इकी ङाचो़ येशू ख्रीष्टका गानीडा बेम्डिम ल्वाडा आमा न भ्रसिड्डामका र्वामु चापु, गो हेल्लो लोवो सिमुङा बासिलोवो सिमु चापु। 32 सिपा मु़चु़ सिमुलाम मेबगे माला सो़प्दीडाम हादीबारामिमनुङ होङङा एफिसस शहरडाम मु़चु़मिमनुङ क्वाल्बा बेउतोमका गोलाई हाम जो़पा दु़स्ता मा? सिपा मु़चु़ सिमुलाम मेब माला ने, “गुइ पिइ-डुङी, हेङालोने दिका ने गुइ सिइ।” र्वाक्मा होङङा बिइलो नु़। 33 मु़चु़मिमकु आरेप्माम ल्वाका गानीलाई ताङताहेरथो़ मेलनिमिनु़: “मेजो़पा मु़चु़मिमनुङ लाम्दिसीका जो़पा बादीखाम फाल्सी।” 34 न छ्याक्नी मा छु़ल बोमु डिट्नी। गो इनी क्रो़मलु़बेन्मु लागि र्वाङु, गानीगोडा याङका माम्चु़नी छेट्मिडिमङा मिबु। सिमुलाम बग्गेट्पा मिरो़म 35 लावो कोङनिमका आरेसाका हिला बोमु चाम्मी, “सिपा मु़चु़मिम हेसाका बम्गेमी मा मेर्मिमकाम उनी मिरो़म हेप्माम दु़म?” 36 हाम, थेसिमेथेट्पा! गानी हाम ख्लिनी मेराम सिमा कोङङा ल्या। 37 गानी हाम ख्लिनी मेराम दिफु दु़म्पा बोट मेएँ, जेप्सेर लोवो वाङमिम मा ङा लोवो भ्रल कोङङा ख्लिनी। 38 लावो माम्चु़नीका मुलु़ बेम्डिम होम्साका मेरामलाई लाले मिरो़म ग्वामी। खोत्ले खालकाम भ्रललामका त्वा-त्वाहोम बोट ल्या। 39 मेम्साकाङा वाङ-वाङकाम रो़म दु़म, मिनी मिरो़म वाङ, हादीबारामिमकु रो़म कोङमी ङा, सिकेवा-माङकेवामिमकु रो़म कोङमी ङा, मा ङोमिमकु रो़म कोङमी वाङ ङा दु़म। 40 मेम्मा मिरो़म वो पाह्रीलाम नुङ सुबुडाम दु़म। पाह्रीलाम मिरो़मकु जो़प्सी वाङ ङा बु, मा सुबुडाम मिरो़मकु जो़प्सी कोङमीङा बु। 41 नेप्सुङकु जो़प्सी वाङ, ख्लो़मुकु जो़प्सी नुङ सोरलुङकु जो़प्सी कोङमीङा दु़म। मेम्मा कोले सोरलुङकु जो़प्सी कोङमी सोरलुङडाम उ जो़प्सीडा वाङङा दु़म। 42 सिपा मु़चु़मिमकु सिमुलाम बग्गेसी वो मेप्मामङा। गुइ सिइलो सुबुडाम इकी मिरो़म क्वायु़ ख्लिसी, लावो मेराम हेल्लो लोवो नु़मु लागि सिमुलाम बगे। 43 मिरो़म हाम होङङा वो मेलु़साका क्लु़म्सी, यु़म झ्वासिक्साका बगे। सो मान्थिम क्लु़म्सी, सोनुङमा दु़म्साका बगे। 44 सुबुडाम मिरो़म क्लु़म्सी, माम्चु़नी-पेललाममिम मिरो़म बगे। सुबुडाम मिरो़म दु़म माला माम्चु़नी-पेलका थो़पा मिरो़म वो दु़म। 45 मेम्मिमका माम्चु़नी सिजेमडा र्याक्मा बु, “खोत्लेडाम ङादोम मु़चु़ आदम उ सामनुङमा दु़स्ता।” लावो चङडाम आदम त्वारो़म ग्वाक्पा पेल सो़। 46 ङादोम ने सुबुडाम मिरो़म मा चङडाम माम्चु़नी-पेलामिम मिरो़म। 47 ङादोम मु़चु़ आदम सुबुडाम क्वाकाम बाइडा, चङडाम मु़चु़ ख्रीष्ट, पाह्रीलामका योम्डी। 48 सुबुडाम मु़चु़मिम क्वालामका बनेबेम्मा मेराम मु़चु़ होप्मामङा बुमी, पाह्रीकाम मु़चु़मिम पाह्रीलाम योक्पा मु़चु़ होप्माम दु़म्मी। 49 ओम्लो गुइ क्वालाम बनेदु़म्पा मिरो़म ल्वास्तिम बु, मेम्साकाङा दिफु गुइ पाह्रीलाम मु़चु़ होप्माम लाले मिरो़म ल्वासी। 50 वा-ल्वाक्नी, गो गानीलाई र्वाङु, सो़ नुङ सिसिकु मिरो़मका माम्चु़नीकु किब्दीकाम दो़दो़वा मेल्वासु़। मेम्साकाङा पुयु़लुक्पा मिरो़मका हेल्लो वो पुयु़ मेलुक्पा मिरो़मकु दो़दो़वा मेल्वासु़। 51 थो़नी, गो कोले थक्मा ल्वा सो़उ, गुइ खोत्ले ने मेसिइ, लावो गुइ इकी मिरो़म वाङ दु़म्मा ख्लोसिडी। 52 घरिकोङकाङा, मिक्सीकु चिक्रिमकाङा, चङडाम थारीकु भुमकु लो़लामडा गुइ मिरो़मडा वाङ दु़म्सीमा ख्लोसिडी। हेङालोने भुम जे, मा सिपा मु़चु़मिम हेल्लो वो मेसिपा बेसाका बमी। गुइ नु़पामिम ने लाले मिरो़म ख्लोसिडी। 53 हेङालोने इकीमा मिरो़म सिल्या मा झिम, मा ओराम हेल्लो लोवो दु़म्पाम बाट्पा मा मेझिपा मिरो़मडा ख्लोम्सिमु बासी। 54 इकीमा झिपा मिरो़म हेल्लो वो मेसिपा मिरो़मडा ख्लोसी, मेकोतिलो माम्चु़नीकु सिजेमडा र्याक्मा ओराम ल्वा रोथी, “सिमुलाम ने क्वाल्बाडा सो़ड्डाम बु! 55 ए सिमुलाम, गाना बान्ते घ्ल्वान्ना? ए सिमुलाम, केपा इमा यु़म बा मा?” 56 सिमुलामका यु़म छु़ललाम ल्वासु़ मा छु़लका यु़म डु़म्लालाम ल्वासु़। 57 लावो माम्चु़नीलाई आलासो़ ग्वाकी, गुमीका गुइलाई इकी ङाचो़ येशू ख्रीष्टलामका घ्ल्वासी ग्वाक्सामी। 58 मेम्मिमका आमा द्वादीबुङ वा-ल्वाकनी, थो़रलु़इमिम दु़म्निम बानी मा यु़मनुङमा दु़म्नी। हेल्लो लोवो ङाचो़कु खारी छो़म बेनिम बानी। हेङालोने गानी ङाचो़काम लागि ब्राम्दु़ल्वा बोनिमिम हाम ना हाम मेदु़म र्वाक्पा गानी चनी। |
© Wycliffe Bible Translators, Inc. All rights reserved.
Wycliffe Bible Translators, Inc.