१ कोरिन्थी 14 - थुलुङ राईमाम्चु़नीलाममिम जेसी नुङ सामामिमकु ल्वा जेसी 1 रिखामकु लाम्दी खाट्नी मा माम्चु़नी पेलकु राप्लावा ल्वापा छो़म न बेनी। मेरामडाम वो हापा माम्चु़नीलाम जेपा राप्लावा ल्वामु छो़म न सोक्नी। 2 थेसिमेथेडिमिम वाङ सामा ल्वाडा जेपाका मु़चु़मिमनुङ मेएँ माम्चु़नीनुङ जे। गुका जेमिम ल्वा सु़का वो थेसिमेथेडु़। थक्मा ल्वामिम गुका माम्चु़नी-पेललाम जे। 3 लावो माम्चु़नीलाम जेपा मु़चु़मिमका सु़ लोवो मु़चु़मिमनुङ जेमी। गुका मेर्मिमलाई यु़मनुङ बर्बेन्मु, सो हन्बेन्सामु, मा न बन्सामु जेमी। 4 वाङ सामामिमकु ल्वाडा जेपाका उ त्वापलाईङा यु़मनुङमा बु़। लावो माम्चु़नीलाम जेपा मु़चु़का ने मण्डलीलाई यु़मनुङमा बु़। 5 गानी खोत्लेका मे वाङ सामा ल्वाडा जेनी र्वाक्पा न बेउ, लावो मेरामडाम वो माम्चु़नीलाम जेनिमिम न बेउ। मण्डली यु़मनुङमा दु़म्तो लमुकाम लागि वाङ सामा ल्वाडा जेम्मा ल्वाकु दुथाम सो़मु चापा मु़चु़ सु़ वो मेबुमी माला वाङ सामा ल्वाडा जेमुडाम ने माम्चु़नीलाममिम जेसीङा जो़पा सो़। 6 वा-ल्वाकनी, इनीमाडा गो वाङ सामामिमकु ल्वा जेत्तो रोङु लावो माम्चु़नीका रेम्बेट्ङिडिमिम ल्वा, नेप्चीनुङमा ल्वा, माम्चु़नीलाममिम जेसी, सीसिकु सिजेम मेरेट्पु माला गानीलाई हाम जो़पा दु़म मा? 7 लिउसाम नुङ कामसोर होप्माम साम मान्थिम योङलेमकु लो़लाम जो़होमका मेलुकावा माला हाम जेत्तोङा लेडु़ र्वाक्साका सु़का छेमु चाप्सु़ मा? 8 भुम जो़होमका मेजेसावा माला क्वाल्बा बोमु लागि सु़ झो़म्सिमिम? 9 गानीनुङ वो आरेप्माङा दु़म। मु़चु़मिमका थेसिमेथेन्मिमिम वाङ ल्वाडा गानी जेनी माला गानी हाम र्वाक्तोङा लेनी र्वाक्साका सु़का थेसिथेडु़ मा? गानी जेनिमिम ने हाम ना हामकाम दु़म। 10 सु़म्दिसेरडा आच्छाङा हापा खालकाम जेसीमिम ल्वा बुमी, लावो उहेम वो हाम ना हामकाम मिबु। 11 कोङनिमका जेमिमिम ल्वा थेसिमेथेट्पुवा माला उमा लागि गो वाङ नेब्दीलामका रोक्पा दु़म्ङु मा गु आमा लागि वाङ नेब्दीलामका रोक्पा दु़म। 12 मेप्मामङा गानी वो माम्चु़नी-पेलकु राप्लावामिम ल्वामु छो़म न बेन्निमका मण्डली यु़मनुङमा दु़म्तो लक्पा राप्लावामिम माल्नी। 13 मेम्मिमका मे वाङमी ल्वा जेपा मु़चु़का मेराम ल्वाकु दुथाम सो़मु चापा यु़म ल्वामु सो़म्दी बु़नु़। 14 हेङालोने गो वाङ सामा ल्वालाम सो़म्दी बेउलो आमा न-गोका सो़म्दी बु़, लावो आमा नका ने हाम वो थेसिथेड्डु़म मेदु़म। 15 मेम माला गो हाम बोमु? गो आमा न-गोका सो़म्दी बेउ मा थेसीथेट्पा आमा नका वो सो़म्दी बेउ। आमा न-गोका काम्सो बेउ मा आमा नका वो काम्सो बेउ। 16 इनी न-गोका माम्चु़नीकु नङ कोनिलो गानी जो़होमका आलासो़ र्वानी लोवो गानी र्वाक्तोङा बोनिमिम ल्वा वाङमिमका थेसिमेथेन्मी माला मेर्मिमका हेसाका “आमेन” र्वामी? 17 गानी ने माम्चु़नीलाई आलासो़ जो़होमका ग्वानी, लावो मेराम ल्वाका वाङमिम मु़चु़लाई यु़मनुङमा मेदु़म्बेडु़। 18 गो माम्चु़नीलाई आलासो़ र्वाङु, हेङालोने सामामिमकु ल्वाडा गानीडाम गो हापा जेङु। 19 लावो मण्डलीडा सामामिमकु ल्वाडा को सङसङ ल्वा जेमुडाम ने वाङमिमलाई सीमु थेसिथेडिमिम ङोले कोङङा ल्वा जेमु न बेउ। 20 वा-ल्वाकनी, चो़च्चो़ होङङा मिम्मु डिट्नी। मेजो़पा ल्वाडा न मेछेपा चो़च्चो़ होप्माम दु़म्नी, लावो इनी मिम्सीडा ने न छेपा ङाचो़ होप्माम दु़म्नी। 21 माम्चु़नीकु सिजेमडा आरेसाका र्याक्मा बु: “हेल्लो वो मेथो़म्मा वाङ सामा ल्वा जेपा मु़चु़मिमलाम नुङ वाङमिम नेब्दीलाम रोक्पा वाङ सामा मु़चु़कु सिलामका ओर्मिम मु़चु़नुङ गो जेङु, मेम्मा वो मेर्मिमका आमा ल्वा मेथो़मी” मिप्रङमाका र्वामी। 22 मेम्मिमका थेसिमेथेडिम वाङ सामा ल्वाडाम जेसी ने थो़रलु़पामिमकाम लागि मेएँ, थो़रमेलु़पामिमकाम छेखोप सो़। लावो माम्चु़नीलाम जेसी ने थो़र मेलु़पामिमकाम लागि मेएँ थो़रलु़पामिमकाम लागि सो़। 23 मण्डलीडा खोत्ले खोम्सिमिमा खोत्लेका वाङमी ल्वाडा जेम्डी, मा थेसिमेथेट्पा मु़चु़ नुङ थो़र मेलु़पा मु़चु़ मेसिन्डा रोम्डी माला हाम मेर्मिमका गानीलाई न मान्थिम मेर्वामी? 24 लावो खोत्लेका माम्चु़नीलाम जेमिमिम बुमिलो कोङनिम थो़र मेलु़पा मु़चु़ लोवो होप्माम ल्वा थेसिमेथेट्पा हाम वो थेसिमेथेट्पा मु़चु़ लोवो मेगोडा रोक्ता माला खोत्लेलामका उ छु़लकु दुथाम चबेला सो़सी मा खोत्ले मु़चु़मिमलामका छाम्ला सो़सी। 25 मेरामकु नगोडाम थसिक्पा ल्वामिम पाखा लुमी मा गुका खुम्बु बेसाका माम्चु़नीकु सो़रलोले बु़ मा र्वा, “माम्चु़नी आच्छाङा गानीगोडा बुमी।” सो़रलोले जो़होमका बेसी 26 वा-ल्वाकनी, गो र्वामु माल्तोम ल्वा ओरामङा सो़। सो़रलोले बोमु गानी कोदेप खोम्सिनिलो कोलेका काम्सो बु़, कोङमीका सिजेम सीडु़मी, कोङमीका माम्चु़नीका रेम्बोमिमिम ल्वा सो़यु़, कोङमीका थेसिमेथेडिमिम वाङमी ल्वालाम जे मा कोङमीका जेम्मा ल्वाकु दुथाम सो़यु़। ओर्मिम खोत्ले ल्वाका मण्डलीलाई यु़मनुङमा दु़म्बेन्मु बासी। 27 वाङसामा ल्वाडा जेपामिम जेमी माला नलेका लोवो सुलेका लोवो पेन्तिका जेमिनु़। मेम्मा जेम्मा ल्वाकु दुथाम कोङनिमका सो़यु़नु़। 28 लावो मेप्माम जेम्माकु दुथाम सो़पा सु़ वो मेबुमी माला मेराम वाङ सामा ल्वाडा जेपा मु़चु़ मण्डलीडा लिबा बुनु़, मा गु त्वापनुङ मा माम्चु़नीनुङ जेनु़। 29 माम्चु़नीलाम जेपामिम नले, सुलेका कोङङा जेमिनु़, मा वाङमिमका ने मेर्मिमका जेमिमिम ल्वा जो़होमका छाम्मिनु़। 30 लावो मेसिन्डा बाट्पामिम गोडा कोलेकाडा माम्चु़नीका रेम्बोमिमिम ल्वा रोक्ता माला जेत्तोङा बेपा मु़चु़ मेजेनु़। 31 मेम्साका कोले कोले बेसाका गानी खोत्लेका माम्चु़नीलाम जेमु चाम्नी, मा आरेसाका खोत्ले मु़चु़मिमका सीसिमु चाम्मी मा उनी सो हन्बेला सो़सिमु चाम्मी। 32 माम्चु़नीलाम जेपामिमकु राप्लावा माम्चु़नीलाम जेपामिमकाम त्वाकु ल्वाडा दु़म्मिमका मेराम राप्लावा जो़होमका थो़मु बासी। 33 हेङालोने सो़रलोले बेसीडा ल्वा मेघ्रो़म्साका हाम बेबे द्वा मेरामङा बोमिमिम माम्चु़नीका न मेबोमी, लावो खोत्ले ल्वाडा न घ्रो़म्बेसाका तु़रु़ रेन्थिमिमा बोमिमिम ल्वाडाङा माम्चु़नीका न बोमी। माम्चु़नीकु मु़चु़मिमकु खोत्ले मण्डलीडा होङङा, 34 मेसेममिम मण्डलीडाम घ्रो़म्दीडा लिबा बुमिनु़। मेर्मिमका जेमु मेल्वामी, लावो डु़म्लाका र्वामिम होम्साका मेर्मिम साखाम गोडा दु़म्मिनु़। 35 कोङनिम ल्वाकु दुथाम मेसेममिमका हिलाबोमु न बोमी माला नेमडा उनी त्वाकु वोचु़नुङ हिलाबोमिनु़। हेङालोने मेसेममिमका मण्डलीडा जेमु ने क्रो़मलु़पा ल्वा सो़। 36 हाम माम्चु़नीकु सिजेम गानीलाम चो़म्सिड्डाम डे? हाम मेराम इनीमाडा कोङङा रोक्ताम? 37 कोङनिम मु़चु़का उ त्वापलाई माम्चु़नीलाम जेपा लोवो माम्चु़नी पेललाममिम राप्लावा ल्वापा मु़चु़ मिम्सी माला गो र्याक्तोम ल्वा ङाचो़ येशूका र्वाम्डिम र्वाक्साका रङु़नु़। 38 मेराम मु़चु़का ओराम ल्वा मेथो़सु़ माला उमा ल्वा वो मेथो़नी! 39 मेम्मिमका वा-ल्वाकनी, माम्चु़नीलाम जेमु छो़म न बेनी, मा थेसिमेथेडिमिम वाङमी ल्वाडा जेमुडाम मेभोप्नी। 40 लावो खोत्ले ल्वा जो़होमका नुङ घ्रो़म्होमका बोमु बासी। |
© Wycliffe Bible Translators, Inc. All rights reserved.
Wycliffe Bible Translators, Inc.