१ कोरिन्थी 13 - थुलुङ राईरिखाम 1 गो मु़चु़मिमकु हापा सामाकाम ल्वा नुङ पाह्रीचो़मिमकु ल्वा जेङु, लावो आगोनो रिखाम मिबु माला गो ने सेका-सेका येपा पिङमा नुङ घ्रो कोङङा दु़म्ङु। 2 गोनुङ माम्चु़नीलाम जेपा राप्लावा बु, खोत्ले थक्मा ल्वा नुङ नेप्ची थेसिथेन्मु चापु, मा पोप्चङ हेम्मु चापा थो़र बु लावो आगोनो रिखाम मिबु माला गो हाम वो मेएँ। 3 गो खोत्ले आ खाप्ची उनी हाम वो मेबाट्पामिमलाई दो़उसाक्पुमी, मा आमा मिरो़म चामु ग्वाक्पु, लावो आगोनो रिखाम मिबु माला गो हाम वो मेल्वाउ। 4 रिखाम इम्मु चापा नुङ न-थो़मनुङमा दु़म। रिखामका नाचु़र मेबु़, डोक्पु मेलिसी, नो़ मेल्वाक्थाडु़। 5 रिखाम बाक्छो़र्मा मेदु़म, त्वाकाम कोङङा जो़पा बेपा मेदु़म। रिखामका छोक्चो मेबु़ मा मेजो़पा ल्वा नडा मेकुर्थाडु़। 6 रिखाम मेजो़पा ल्वाडा मेगेर्सी, लावो आछाङाकाम ल्वाडा गेर्सी। 7 रिखामका खोत्ले ल्वा इम्डु़, खोत्ले ल्वाडा थो़र लु़, हेल्लो लोवो जो़पा ल्वा दु़म र्वाक्पा लु़, खोत्ले ल्वाडा इम्सिसाका बुमु चापा दु़म। 8 रिखाम हेल्लो वो मेदाम, लावो माम्चु़नीलाम जेसीमिम दाम, ल्वामिम दाम, नेप्ची दाम। 9 गुइ किचो़ कोङङा थेसिथेड्डिम बु मा किचो़ कोङङा माम्चु़नीलाम जेस्तिम बु। 10 लावो खोत्ले थेसिथेट्पा आच्छाङाकाम ल्वा रोलो किचो़म ओराम थेसिथेसी ल्वा दाममा ल। 11 चो़च्चो़ बाङडोलो चो़च्चो़ होप्माङा जेङ्थाल्ङोडो, चो़च्चो़ होप्माङा मिम्थाल्तो, चो़च्चो़ होप्माङा नडा र्वाङ्थाल्ङोडो। लावो ओम्लो गो स्वाला दु़म्ङोडो मा चो़च्चो़ होप्माम दु़म्सी ङेत्तो। 12 ओम्लो गुइ ऐनाडा ब्लाम-ब्लामया ल्वासिमिम होप्माम ल्वासी, लावो मेम्लो गुइ छ्याङलो-छ्याङलो ल्वासी। लावो ओम्लो गो कि-कि कोङङा थेसिथेट्पु, माम्चु़नीका गोलाई छेङिमिमिम होम्साका मेम्लो गो जो़होमका थेसिथेट्पु। 13 थो़र, हाम-हुम ल्वापा न, नुङ रिखाम ओर्मिम सुले हेल्लो लोवो दु़म्मिम बुमी। लावो ओर्मिमगोडा खोत्लेडाम डोक्पु ने रिखाम सो़। |
© Wycliffe Bible Translators, Inc. All rights reserved.
Wycliffe Bible Translators, Inc.