१ कोरिन्थी 12 - थुलुङ राईमाम्चु़नी पेललाममिम राप्लावामिम 1 वा-ल्वाकनी, माम्चु़नी पेललाममिम राप्लावामिमकु दुथाम गानी मेचक्साका बानी र्वाक्पा आमा न मिबु। 2 गानी चनिमङा बु, गानी येशूडा थो़रमेलु़थेङा बान्निलो जेमु मेचापा ङाटामिमथो़ लनिमा थामबाल्निम बाइडा। 3 मेम्मिमका गानी आरेप्माम ल्वा चक्नी र्वाक्पा आमा न बु, मेम्मा माम्चु़नीकु पेललामका जेपा सु़का वो “येशूडला वाइतो रोनु़” मेर्वा। माम्चु़नी पेललामका कोङङा, “येशू ङा ङाचो़ सो़” र्वामु चाप्सु़। 4 माम्चु़नी पेललाममिम राप्लावामिम हापा खालकाम बुमी, लावो राप्लावा ग्वाक्पा माम्चु़नी पेल कोलेङा बुमी। 5 लाले-पाङके बेसीमिम हापा खालकाम बुमी, लावो गुइ कोलेङा ङाचो़कु लाले पाङके बिइ। 6 खारीमिम हापा खालकाम बुमी, लावो गुइ खोत्लेडा कोले माम्चु़नीकाङा खारी बोमी। 7 मण्डलीडा कोलेका कोङमीलाई ख्लो़मु लागि गुइ खोत्लेलाई माम्चु़नी पेलकु राप्लावा ग्वाक्साड्डामिम बु। 8 कोङनिमलाई माम्चु़नी-पेललाम नेप्चीकु ल्वा जेपा, कोङनिमलाई मेरामङा पेललामका नकु ल्वा जेपा, 9 कोङनिमलाई मेराम पेललामकाङा थो़रलु़पा, मा कोङनिमलाई मेराम पेललामका नो़पा मु़चु़ सबेट्पा राप्लावा ग्वाम्डिम बु। 10 पेलका कोङ मु़चु़लाई यु़मखारीमिम बेपा यु़म ग्वाकु़, मा कोङनिमलाई माम्चु़नीलाम जेपा ल्वा, कोङनिमलाई पेललाम रोक्पा राप्लावा छेमु चापा, कोङनिमलाई वाङ-वाङ ल्वाडा जेमु चापा, कोङनिमलाई वाङ-वाङ ल्वाडा जेम्डिम ल्वाकु दुथाम सो़मु चापा राप्लावा ग्वाक्सामी। 11 ओर्मिम खोत्ले गुमी कोलेङा माम्चु़नी पेलकु खारी सो़। गुमीका खोत्लेलाई त्वाकु न बोमिमिम होम्साका राप्लावा ग्वामी। कोले मिरो़मडा हापा अंगमिम 12 मु़चु़कु मिरो़म गोडा हापा अंग बुमी, लोवो मे खोत्ले दु़म्साका कोलेङा मिरो़म बनेदु़म। ख्रीष्ट वो मेप्मामङा सो़। 13 गुइ यहूदी लोवो ग्रीक लोवो, डु़ल्चो़ लोवो त्वाकु साखाम गोडा बाट्पा लोवो गुइ कोलेङा माम्चु़नी पेललामका कोले मिरो़मडा कु-रु़दु़म रङ्डिम बु। मेम्मा गुइ खोत्लेका कोलेङा माम्चु़नी-पेल ल्वास्तिम बु। 14 मु़चु़कु मिरो़म कोलेङा भागलामका कोङङा मेएँ, हापा भागलामका बनेदु़स्ताम बु। 15 खेलका “गो ल्वा मेएँ, मेम्मिमका गो मिरो़मगोडाम अंग मेएँ” र्वाक्ता माला हाम मेराम मिरो़मगोडाम अंग मेएँ मा? 16 मा नोफ्लाका “गो मिक्सी मेएँ, मेम्मिमका गो मिरो़मगोडाम भाग मेएँ” र्वाक्ता माला हाम मेराम मिरो़मगोडाम अंग मेएँ मा? 17 खोत्ले मिरो़म मिक्सी दु़म्सावाम माला हामका थो़मु? खोत्ले मिरो़म नोफ्ला दु़म्सावाम माला हामका मुर नेम्मु? 18 लावो माम्चु़नीका उनी न होम्साका मिरो़मडा खोत्ले भाग घ्रो़म्बेसाका जु़ल्मिडिम बु। 19 मेर्मिम खोत्ले कोलेङा अंग दु़म्सावाम माला मिरो़म हामकाम दु़म मा? 20 अंगमिम हापा बुमी लोवो मिरो़म ने कोलेङा। 21 मिक्सीका ल्वालाई “गाना गोलाई मेबासी” र्वामु मेचाप्सु़, मा बुइका वो खेललाई “गाना गोलाई मेबासी” र्वामु मेचाप्सु़। 22 मेम ने मेएँ, मिरो़मडा बाट्पा खोत्लेडाम मेचापा ल्वासिमिम अंगङा मेदु़मथु़म मेनु़पा दु़म। 23 मिरो़मडा बाट्पा याक्के मिम्डिमिम अंग गुइ जो़होमका जु़ली। रेम्बेसी मेनु़पा अंगलाई गुइ जो़होमका बोसाका जु़लिमिम बु। 24 रेम्बेसी नु़पा अंगमिम जो़होम बोमु मेबासी। लोवो माम्चु़नीका मिरो़मकु अंगमिमलाई जो़होमका घ्रो़म्बेट्मिडिमा जु़ल्मिडिम बु, मे याक्के मिम्मा अंगमिमङा वाङमिम अंगडाम डोक्पु मिम्सिम्डिम बु। 25 मेम्साका इकी मिरो़मडाम अंगमिमकु गो फ मेदु़म्नु़, लावो कोले अंगका कोङमीलाई कोहोप्मामङा मिम्मिनु़। 26 कोले अंग नो़डा माला खोत्ले अंग नो़मी, कोले अंग डोक्पु बेला सो़सिड्डा माला खोत्लेङा भ्रम्सिमी। 27 गानी ख्रीष्टकु मिरो़म, मा गानी खोत्ले ने मेराम मिरो़मडाम भाग सो़। 28 माम्चु़नीका मण्डलीडा आरेसाका जु़ल्मिडिम बु, ङादोमडा थु़र्मामिम, मेरामकु चङडा माम्चु़नीलाम जेपामिम, मेकोतिमा सीपा मु़चु़मिम। मेम्मा हेल्लो वो मेल्वाम्मा खारी बेपामिम, मा नो़पामिमलाई सबेट्पा राप्लावा ल्वापामिम, वाङमिमलाई ख्लो़पामिम, मण्डली रेपा बेपा मु़चु़मिम, वाङ सामा ल्वा जेमु राप्लावा ल्वापामिम। 29 हाम खोत्ले थु़र्मा मु़चु़मिम? हाम खोत्ले माम्चु़नीलाम जेपामिम? हाम खोत्ले सीपा मु़चु़मिम? हाम खोत्ले यु़मखारीमिम बेपामिम? 30 हाम खोत्लेनुङ नो़पा मु़चु़ सबेट्पा राप्लावा बु? हाम खोत्लेका वाङ सामा ल्वामिम जेमी? हाम खोत्लेका वाङ वाङ ल्वामिमकु दुथाम सो़मु चाम्मी? 31 लावो खोत्लेडाम जो़पा राप्लावा ल्वापा छो़म न बेनी। मेम्मा गो गानीनुङ ओरामडाम वो हापा जो़पा लाम्दी सो़उ। |
© Wycliffe Bible Translators, Inc. All rights reserved.
Wycliffe Bible Translators, Inc.