१ कोरिन्थी 11 - थुलुङ राईसो़रलोले बोमु थारीका बुइ ख्रेप्सी 1 आमा बेसी बेनी, हेसाका गो वो ख्रीष्टकु बेसी बेउ। 2 खोत्ले ल्वाडा गानी गोलाई मिम्ङिनी, मा गो गानीलाई ग्वानिनिम सीसि झेन्थानिमिमका, गो गानीलाई कोनिनी। 3 लावो गानी ओराम ल्वा चन्जो़ल्नी र्वाक्पा आमा न बु, खोत्ले मु़चु़मिमकु उनी बुइ ख्रीष्ट सो़। मेसेमकु उ बुइ उ वोचु़, मा येशू ख्रीष्टकु उनी बुइ माम्चु़नी। 4 वोस्चो़का सो़म्दी बु़लो लोवो माम्चु़नीलाम जेलो बुइ ख्रेप्डु़ माला गुका उमा त्वाकु बुइ ख्रीष्टलाई क्रो़म लु़बेडु़ मा 5 मेसेमका सो़म्दी बु़लो लोवो माम्चु़नीलाम जेलो बुइ मेख्रेप्डु़ माला गुका उमा बुइ वोचु़लाई क्रो़म लु़बेडु़ मा गु ने उ सेम खुर्रु़म मेसेम होप्मामङा दु़म। 6 कोङनिम मेसेमका उ बुइ मेख्रेप्डु़ माला उ सेम क्रिप्नु़। लावो उ सेम क्रिप्डु़ लोवो खुरु़लो उ नो़-कल ल माला गुका बुइ ख्रेप्नु़। 7 वोस्चो़का उ बुइ मेख्रेप्नु़ हेङालोने गु माम्चु़नीकु ङाली सो़ मा उमाडा माम्चु़नीकु यु़म झ्वाक्सी रेम्बेसी। लावो मेसेमडा ने वोस्चो़कु यु़म झ्वाक्सी रेम्बेसी। 8 हेङालोने वोस्चो़ मेसेमलामका दु़स्ताम मेएँ, लावो मेसेम वोस्चो़लामका दु़स्ताम सो़। 9 मेम्साका मेसेमकाम लागि वोस्चो़ प्रङ्स्ताम मेएँ, लावो वोस्चो़काम लागि मेसेम प्रङ्स्ताम सो़। 10 मेम्मिमका पाह्रीचो़मिमका रेम्थामिमिमका उमा वोचु़कु साखामगोडा बुङु र्वाक्पा रेम्बोमु मेसेमका उमा बुइ ख्रेमु बासी। 11 लोवो ङाचो़कु मु़चु़मिमगोडा मेसेम वोस्चो़ मेदु़म्थु़म मेनु़, मा वोस्चो़ मेसेम मेदु़म्थु़म मेनु़। 12 हेङालोने मेसेम वोस्चो़लामका दु़स्ता, मेम्साकाङा वोस्चो़ वो मेसेमलामका ग। लावो खोत्ले माम्चु़नीलामका दु़म। 13 गानी इनी त्वाकाङा मिम्सिट्नी, बुइ मेख्रेप्साका माम्चु़नीडा सो़म्दी बोमु मेसेमलाई घ्रेडु़ मा? 14 वोस्चो़का धु़पा सेम डु़ल्लु़ माला उ नो़-कल ल र्वाक्पा हाम छ्याङलो-छ्याङलो मिबु मा? 15 लावो मेसेमकाम धु़पा सेम बु माला मेराम उ जो़प्सी सो़। हेङालोने धु़पा सेम उ बुइ ख्रेमु लागि गुलाई ग्वाक्मा सो़। 16 कोङनिमका ओराम ल्वाकु दुथाम रिबुसी किन्मु न बोमी माला गुइनुङ ओरामडाम वाङमिम बेसीलाम मिबु, मा माम्चु़नीकु मण्डलीमिमडा वो मिबु। ङाचो़कु ग्रुला 17 आथा ने गो र्वाक्तोङा बेउमिम ल्वाडा गानीलाई मेकोनिनी। हेङालोने गानी मण्डलीडा घ्रो़म्निलो जो़पा खारी मेएँ, मेजो़पा खारी बोनी। 18 गो र्वामुङा बासिलो, गानी मण्डलीडा कोदेप खोम्सिनिलो गानीगोडा गो-फ दु़म ए र्वाक्पा गो थो़उ। कोङनिम ल्वा आच्छाङा वो दु़म्मु चाप्सु़। 19 गानीगोडाम आच्छाङाकाम मु़चु़ छेम्सिमु गानीगोडा गो-फ दु़म्मुङा बासी डे! 20 गानी कोदेप दु़म्साका पोनी-डुनिमिम ने आच्छाङा ङाचो़कु ग्रुला मेएँ। 21 हेङालोने ग्रुला पोनिलो सु़लाई वो मेलसाका गानी इनी त्वाका रेनिमिम त्वा-त्वाहोम पोमुथोक पोनी, मेम्मा मेबाट्पामिम ने मान्जाङा दु़म्मी, मा याङ डु़का सेडु़मी। 22 पोमु-डुमुकाम लागि हाम त्वा-त्वाहोम इनी नेम मिबु? डे माम्चु़नीकु मण्डलीलाई हाम होङङा वो मेमिम्नी मा उनी हाम वो मेबाट्पामिमलाई क्रो़म लु़बेनिमिम? गो गानीलाई हाम र्वामु? हाम गानी आरे बोनिलो जो़पा बेन्नी र्वामु? गो हेल्लो वो मेम मेर्वाङु। 23 हेङालोने ङाचो़लाम गो हाम ल्वाउतो मेराम गो गानीलाई ग्वाक्निनिम बु। ङाचो़ येशू चु़म्ला सो़म्सिम्डिम सिन्था गुमीका सो़बेम झेट्मिडी, 24 मा माम्चु़नीलाई आलासो़ ग्वाम्डी। मेम्मा गुमीका मे सो़बेम फ्वाक्चो़ल बेम्डी मा, “ओराम इनीमा लागि ग्वाक्मा आमा मिरो़म सो़। गोलाई मिम्मु आरे बेनी।” 25 मेम्साकाङा पेम्डिमा गुमीका कान्चु़रे झेट्मिडी, मा र्वाम्डी, “ओराम कान्चु़रे आमा सिसिडाम लाले सो़रख्रेप्मा सो़। गानी हाम्सी ओराम डुनी, गोलाई मिम्मु आरे बेनी।” 26 आरेसाका गानी उहेम उहेम थारीका सो़बेम पोनी, मा कान्चु़रेलाम डुनी गुमी मेयोक्थु़मसम्म ङाचो़ सिम्डिमकु दुथाम सो़निमिम दु़म। 27 मेम्मिमका उहेमका हाम होङङा वो मेलु़साका ओराम सो़बेम पु़, ओराम कान्चु़रेलाम डुङु़, मेराम मु़चु़का ङाचो़कु मिरो़म नुङ सिसिकु कोर्थो़लाम छु़ल बु़डु़मका मुमा बेन्ला सो़सी। 28 मेम्मिमका सो़बेम पोमु नुङ कान्चु़रेलाम डुमु ङादो गानी खोत्लेका त्वाकु न-गो छाम्नी। 29 हेङालोने उहेमका ङाचो़कु मिरो़म मेछेसाका पु़ मा डुङु़, मेरामका पु़डु़म-डुङडु़मका उ त्वापडला देन्दे रेडु़। 30 मेम्मिमका गानीगोडाम हापा मु़चु़मिम सो मान्थिम नुङ नो़पा बुनी, मा हाङको ने सिमु दु़म्मिडिम बु। 31 लावो गुइ इकी त्वाका त्वापलाईङा छाम्डिम बु माला गुइ देन्दे मेल्वासी। 32 सु़म्दिसेरडाम मु़चु़मिमनुङ मुमा बेन्ला मेसो़सिडिनु़ र्वाक्साका गुइलाई ङाचो़का इकीमा निया बोमी मा देन्दे ग्वाक्सामी। 33 मेम्मिमका आमा वा-ल्वाकनी, येशूकु ग्रुला पोमु कोदेप खोम्सिनिलो कोलेका कोङमीलाई लन्बेबेनी। 34 कोङनिम मु़चु़ क्रु़म सिपा बु माला गुका नेमडाङा पु़नु़, मेम्साका गानी कोदेप घ्रो़म्निलो गानीडला देन्दे मेरोनु़। वाङमिम ल्वाकु दुथाम गो रोङुमा सीनिनी। |
© Wycliffe Bible Translators, Inc. All rights reserved.
Wycliffe Bible Translators, Inc.