१ कोरिन्थी 10 - थुलुङ राईइस्राएलडाम सु़म्दिमोलोम ल्वालामका चङचङया बुमु सीन्सिट्नी 1 वा-ल्वाकनी, मोशाकु चङचङ लाम्दिपा इकी ङाउ-खुउमिमलाई हाम दु़स्ता र्वाक्पा गो गानीलाई मिम्बेन्मु आमा न बु। मे खोत्ले ङाउ-खुउमिम खासेकु बोसी-थार्सीगोयु़ हेवो मेदु़म्साका लालाम दिरिदिन झोसाका होनो होम्बु लम्डी। 2 आरेसाका मेर्मिम खोत्लेका मोशाकु चङचङ लाम्दिसाका खासे नुङ दिरिदिनडा कु-रु़दु़म रम्डी। 3 मेर्मिम खोत्लेका माम्चु़नीका ग्वाम्डिम त्वारो़मकु सो़बेम पेम्डी, 4 मा खोत्लेका माम्चु़नीका ग्वाम्डिम त्वारो़मकु कु डुम्डी, हेङालोने मेर्मिमनुङ कोयो-कोयो लक्पा पाह्रीलाममिम भ्र्वालामका पुट्पा कु मेर्मिमका डुम्डी। मेराम भ्र्वा ने ख्रीष्ट बाम्डी। 5 लावो मेर्मिमगोडाम हापा मु़चु़नुङ माम्चु़नी मेगेर्सिप्मिवा मा मेर्मिम र्याङगो-र्याङगोडा सिम्डी। 6 मेर्मिमकाम होङङा मेजो़पा न मेबिइनु़ र्वाक्साका गुइलाई चङचङया बाबेन्मु लागि आरेप्माम ल्वाका रेम्बेम्मा बु। 7 मेर्मिमगोडाम कोङनिमका बेम्डिम होङङा गानी ङाटा सेव मेसाट्नी। माम्चु़नीकु सिजेमडा वो आरेसाका र्याक्मा बु, “मु़चु़मिमका गन्मिडिमा ग्रुला पेम्डी, डुम्डी मा मेर्मिम छो़म्डा बम्डी।” 8 मेर्मिमगोडाम याङका बेम्डिम होङङा गुइ नाम्सु़रु़ बेसिमिनु़, मेर्मिमका नाम्सु़रु़ बेम्डिमा कोलेमका न सङसङ सु धु़मसङ (२३,०००) मु़चु़ सिम्डी। 9 मेर्मिम गोडा याङका बेम्डिम होङङा गुइ ङाचो़कु न छाम्सी मेनु़। मेर्मिमका ङाचो़कु न छाम्मिडिमा मेर्मिमलाई ब्लोका सेड्डु़मिम बाइडा। 10 मेर्मिमगोडाम याङका बेम्डिम होङङा गुइ सु़म्बुर्मा किसिमेनु़। मेम बेम्डिमका ङा सेट्पा पाह्रीचो़का मेर्मिमलाई सेड्डु़मी। 11 मेर्मिम मु़चु़डला हा-हाम दु़स्ताम मेर्मिम खोत्ले चङचङया बाबेट्पा ल्वामिम सो़। मेर्मिम ल्वालामका गुइलाई चङचङया बाबेन्मु लागि र्याक्मा बाइडा, हेङालोने गुइ सु़म्दिसेरकु हुक्पा थारीडा रोम्थिमु खाप्डिम बु, 12 गानी जो़होमका येम्सिक्पा बुङु र्वाक्पा मिम्नी माला चङचङया बानी, मेएँ माला ने तामु वो चाम्नी। 13 मु़चु़मिमडला दु़म्पा न छाम्सीडाम वाङमिम न छाम्सीडा गानी दु़म्निम मिबु। माम्चु़नी थो़रलु़इमिम बुमी, गुमीका गानी इम्मु चाम्निमिमडाम हापा न छाम्सी रोमेबेन्मी। गानी इम्मु चापा दु़म्नी र्वाक्साका गानीलाई न छाम्सीलामका लुक्पा लाम्दी वो रेम्बेनिमी। ङाटाडा सासेट्मा ग्रुला नुङ ङाचो़कु ग्रुला 14 मेम्मिमका आमा द्वादीबुङ वा-ल्वाकनी, ङाटा सेव सान्मुडाम वाङ बानी। 15 गानी नेप्चीनुङमा मु़चु़ बुनी र्वाक्पा मिम्साका गो हाम र्वाङु, मेराम ल्वा गानी इनी त्वाकाङा मिम्नी। 16 ङाचो़ येशूकु ग्रुला पेखोपडा कान्चु़रे रसाका गुइ माम्चु़नीलाई आलासो़ ग्वाकी। हाम गुइ कान्चु़रेलाम डुङिलो ख्रीष्टकु सीसिडा दो़दो़वा डार्स्तिम मेएँ मा? मेम्मा गुइ सो़बेम चक्साका पिइरिलो हाम गुइ ख्रीष्टकु मिरो़मकु दो़दो़वा डार्स्तिम मेएँ मा? 17 गुइ सेर्पा लोवो खोत्लेका कोलेङा सो़बेम दो़स्तीमा पिइडिमका गुइ खोत्ले कोलेङा मिरो़म र्वाक्पा रेम्बु़। 18 इस्राएलडाम मु़चु़मिमलाई रेप्नी, सासेट्मा पोमुथोक पेपामिम हाम सासेन्खोपडाम माम्चु़नीकु लाले-पाङकेडा दो़दो़वा ल्वापा मेदु़म्मिवा मा? 19 गो हाम र्वाक्तोङा बेउमिम? ङाटालाई ग्वाक्मा पोमुथोकमिमङा हाम डोक्पु ल्वा मा? लोवो ङाटा ङा हाम डोक्पु ल्वा? 20 मेम ने मेएँ, गो र्वाङु, ङाटा सेव साट्पामिमका सासेन्मिमिम ने माम्चु़नीलाई मेएँ, मुनाङ-कुर्चाङलाई ग्वामिमिम सो़। मेम्मिमका गानी मुनाङनुङ हेमकेम मेबेनी र्वाक्पा आमा न बु। 21 गानी ङाचो़कु कान्चु़रे नुङ मुनाङकु कान्चु़रे निफिलामका डुमु मेचाम्नी। गानी ङाचो़कु पेखोप नुङ मुनाङकु पेखोप निफिलामका पोमु मेचाम्नी। 22 हाम गुइ ङाचो़कु नो़ मेनु़बेन्मु? हाम गुइ गुमीडाम यु़मचो़ बुइ मा? माम्चु़नी डोक्पु दु़म्बेन्मु दोनी 23 गानी आरे र्वानी, “गुकुलाई बेबेद्वाक्पा ल्वा हाम लोवो बोमु नु़।” लावो खोत्ले ल्वाका जो़पा मेबेसा। “गुकुलाई बेबेद्वाक्पा ल्वा हाम लोवो बोमु चाम्कु।” लावो खोत्ले ल्वाका जो़पा लाम्दीडा मेक्रिसा। 24 सु़का वो उ त्वाप कोङङा जो़पा दु़म्पा मेएँ, लावो वाङमिमकाम लागि जो़पा दु़म्नु़ र्वाक्पा नकाम दु़म्नु़। 25 सो़ भ्रेन्खोपडा भ्रेट्मा उहेम सो़ लोवो ओराम सासेट्मा डे मेएँ र्वाक्साका हिलाहिसी मेबेसाका पेनी। 26 हेङालोने माम्चु़नीकु सिजेमका र्वा “सुबु नुङ मेगोडा बाट्पा खोत्ले मिप्रङमाकामङा सो़।” 27 थो़रमेलु़पा कोङनिमका गानीलाई ग्रुला पेप्डा येट्नी माला इनी ङादोडा हाम गन्सानी मेराम पेनी। त्वाकु नेप्चीकाम लागि हाम हिलाहिसी मेबेसाका पेनी। 28 लावो कोङनिम मु़चु़का गानीलाई “ओराम पोमु-डुमु ने ङाटाडला ग्वाक्मा” र्वाक्ता माला मेपेनी। मेराम मु़चु़का उमा नगोडा पेसी मेनु़ र्वाक्पा मिम्डु़मका उमा नेप्चीकाम लागि मेपेनी। 29 गो इनीमा नेप्चीकाम लागि मेएँ लावो मेम र्वाक्पा कोङनिम मु़चु़काम लागि र्वाङडोम सो़। गानीगोडाम कोङनिमका आरे र्वानी डे हेङा वाङमिम मु़चु़कु नेप्चीगोडाम ल्वाका आमा दाप होर्सिक्पा ल्वाडा भोम्मी? 30 गो माम्चु़नीलाई आलासो़ ग्वाक्साका पेत्तोङा बेउ माला, आलासो़ ग्वाक्साका पेम्मा पोमुथोककाम लागि वाङमिमका हेङा गोलाई मुमा बेन्ङिमी? 31 मेम्मिमका गानी पोनी डुनी हाम बोनी लोवो माम्चु़नी डोक्पु दु़म्मिनु़। 32 सु़लाई वो छु़लडा वाममेबेट्नी, यहूदी दु़म्नु़का, ग्रीक दु़म्नु़का माम्चु़नीकु मण्डली दु़म्नु़। 33 हेसाका लोवो गो बेउमिम खारीडा खोत्ले मु़चु़लाई गेर्सिबेन्मुलाई छो़म ब्राम्दु़ल्वा बेउ, आ त्वाप जो़पा दु़म्ङुनु़ र्वाक्पा न गो मेबेउ, लावो वाङमिम खोत्ले मु़चु़मिमकाम लागि वो जो़पा दु़म्नु़, मा मेर्मिम खोत्ले सेल्सिमिनु़ र्वाक्पा आमा न बु। |
© Wycliffe Bible Translators, Inc. All rights reserved.
Wycliffe Bible Translators, Inc.