रोमियों 8 - राना थारु नयाँ नियम

पबित्र आत्मासे पान बारो जीबन

¹ जहे कारणसे अब जो ख्रीष्ट येशूमे हएं, उनके उपर दण्डको आज्ञा नैयाँ।

² काहेकी पबित्र आत्माको नियम कानुन जो ख्रीष्ट येशू घेनसे आत हए तुमके जीबन देबैगो और तुमके पाप और मृत्युसे मुक्त करैगो।

³ काहेकी जो काम मोशाको नियम कानुन हमर पापमय शरीरके कारण दुर्बल हुइके नाए करपाइ, बोके परमेश्वर करी, अर्थात् बा अपनो लौंणाके मनैकी शरीरमे पठाइ, और बा हमर पापके ताहीं बलिदान होनके ताहीं ख्रीष्टके शरीरमे पापको दण्ड दइ।

⁴ जहेमारे पापमय स्वभाबके अनुसार नाए बल्कि पबित्र आत्माके अनुसार चलन बारेनके ताहीं नियम कानुनको माँग पुरा भओ हए।

⁵ जो आदमी अपने पापमय इच्छनके अपनएके काबु करन देतहए, बे बेहीं चीजके बारे सोँच सकत हएं, जो उनको शरीर चाँहत हए, पर जो पबित्र आत्माके अनुसार चल्त हएं बे आत्माके खुसी बनान बारो बात सोँचत हएं।

⁶ जब हम अपन मनके पापी स्वभाबके अधिनमे करत हएं, तओ बो हमके मृत्यु घेन लैजात हए। पर जब हम अपन मनके पबित्र आत्माक अधिनमे करत हएं तओ हमके जीबन और शान्ति मिलत हए।

⁷ काहेकी पापमय स्वभाबके द्वारा अधिनमे होनो परमेश्वरसे दुस्मनाइ कर्नो हए, काहेकी बो नियम कानुन पालन नाए करे होतहए और पालन फिर नाए करत हए।

⁸ और जो पापमय स्वभाबके अधिनमे हएं, बे परमेश्वरके खुसी नाए करपए हएं।

⁹ पर जबकी परमेश्वरको आत्मा तुममे बास करत हए, तओ तुम पापमय स्वभाबके अधिनमे नाए होबैगे, पर पबित्र आत्माके अधिनमे होबैगे। अगर कोइमे ख्रीष्टको आत्मा नाए हए तओ बो ख्रीष्टको होए नाए सकत हए।

¹⁰ अगर ख्रीष्ट तुममे हए कहेसे आत्मा तुमके जीबन देबैगो, काहेकी तुमर शरीर पापके कारणसे मरेसे फिर तुम परमेश्वरसे धर्मी ठहिरैगे।

¹¹ अगर तुममे परमेश्वरको आत्मा बास करत हए, जौन ख्रीष्ट येशूके मरो भओ मैसे जिन्दा करी कहेसे, बा जौन ख्रीष्ट येशूके मरो भओ मैसे जिन्दा करी, बा तुमर नाशवान शरीरके फिर जिन्दा करैगो जो आत्मा तुमरमे बास करत हए।

पबित्र आत्माके मध्यमसे ख्रीष्टके हक बारे

¹² जहेमारे हे ददाभइयओ, आज्ञापालन करनके हमर कर्तब्य हए, पर हमर पापमय स्वभाब नाए चाँहत हए, कि हम अइसे करएं।

¹³ काहेकी अगर तुम अपने पापमय स्वभाबके अनुसार जिबैगे तओ आत्मिक रुपसे मरैगे, अगर पबित्र आत्माकी शक्तिसे पापमय स्वभाबके काम बन्द करदेत हओ जो तुमर पापमय स्वभाब चाँहत हए, तओ तुम जिन्दा रहाबैगे।

¹⁴ काहेकी परमेश्वरको आत्मासे दिखाओ भओ डगरमे चलन बारे परमेश्वरएके लौंणालौंणीया हएं।

¹⁵ काहेकी तुमके कमैयाको आत्मा नाए मिलो हए जो फिरसे परमेश्वरसे डराएजाए, पर जब परमेश्वर तुमके अपने सन्तानके रुपमे स्वीकार करलै तओ तुमएं परमेश्वरको आत्मा मिलो गओ। जोसे हम, “हे दौवा” कहिके बुलात हएं।

¹⁶ पबित्र आत्मा अपनए हमर आत्मासे गवाही देतहए, कि हम परमेश्वरके सन्तान हएं।

¹⁷ हम बाके लौंणालौंणीया हएं कहेसे हक बारे फिर हएं, परमेश्वरके हक बारे और ख्रीष्टके साझा हक बारे। अगर हम अभए येशूके कता दुख सहामंगे तओ बाकी महिमामे फिर सहभागी होमंगे।

कष्ट पच्छु पान बारो सुख-सम्मान

¹⁸ मए निश्चित हओं, कि जो महिमा परमेश्वरसे हमके पिच्छु मिलैगो, बो महिमा दुख और कष्टसे बहुत बडी हए जो हम अभए सहिरहेहएं।

¹⁹ सृष्टि बडो आसरा भरी दृष्टिसे परमेश्वरको सन्तान प्रकट होनको प्रतिक्षा कररहो हए।

²⁰ काहेकी जो कुछ फिर परमेश्वर बनाइ बा अपनो मोल खोएदइ, जाकेमारे नाएकी, बे अपनए अइसे चाँहत रहएं। पर जाकेमारे, कि परमेश्वर अइसो करी। तहुँफिर आसरा हए।

²¹ सृष्टि बो दिनके असियाए रहो हए जब जा, मृत्यु और बिनाशसे छुटके परमेश्वरके सन्ताननके साथ महिमामय स्वतन्त्रतामे सामिल हुइजएहए।

²² काहेकी हम जानत हएं, कि जबसे आदम पाप करी, तबसे लैके अबतक सबए परमेश्वरद्वारा करोगओ सृष्टि एक बैयर कता पिडा सहे रही हए, जैसेकी बो बच्चाके जनम देन बाली हए।

²³ और जा सृष्टि इकल्लो नाए, पर हम फिर, जौनमे होनबालो महिमाके पहिलीयएसे स्वाद चाखानके रुपमे पबित्र आत्माको निबास हए, हम पबित्र आत्माके हमर ताहीं परमेश्वरको प्रतिज्ञाकी निसानीके रुपमे पाए हएं। पर हम अभौफिर बो समयको आसरा कर रहे हएं जब हमके अपने बच्चा बनानके ताहीं परमेश्वर उठाएलेबैगो और हमर शरीरके सब दुष्टतासे छुटकारा करैगो।

²⁴ अब जब हमएं परमेश्वर बचाइ हए, तओ हमर ठिन जा आसरा हए। पर जब तुम कुछ पानके आसरा कर रहेहओ जो तुमर ठिन पहिलीएसे हएं, तओ बो आसरा नाए हए। कोइ फिर बो चीजके पानके आसरा नाए करत हए जो बोके ठिन पहिलीयएसे हए।

²⁵ पर हमके कुछ अइसो पानको आसरा हए जो हमर ठिन अभए तक नैयाँ, जहेमारे हम धर्यसे तबतक आसरा करत हएं जब तक हम बोके प्राप्त नाए करलेमएं।

²⁶ जौनन्के ठिन बुद्धि नाए हए, पबित्र आत्मा हमके मदत करत हए काहेकी हम प्राथना करनके ताहीं ठिक चीज नाए जान्त हएं। पर पबित्र आत्मा अपनए सब्दसे सिकन बारो गहिरो सुस्केरामे हमर ताहीं प्राथना करदेत हए।

²⁷ परमेश्वर, जो आदमीनको हृदय जानन बारो हए, बा पबित्र आत्माको बिचार फिर जानत हए, काहेकी बा पबित्र आदमीनके ताहीं परमेश्वरके इच्छाके अनुसार पुकारा करत हए।

बिजेतनसे और बहुत

²⁸ और हम जानत हएं, कि जो आदमी परमेश्वरसे प्रेम करत हए, परमेश्वर उनके ताहीं सब चिजनके एक अच्छी अन्तमे लात हए; अर्थात् बिनके ताहीं जौनन्के बो चुनी हए।

²⁹ काहेकी जौनन्के बा पहिलीएसे चुनलै हए, बिनके पहिलीयएसे बाको लौंणा कता होन फैसला करीहए, ताकी बाको लौंणा बहुत बिश्वासी ददाभइयन मैसे बडो हुइपामएं।

³⁰ फिर जौनन्के बा पहिलीएसे छानी, उनके बुलाइ फिर हए, और जौनन्के बुलाइ, उनके धर्मी घोषित फिर करी और जौन धर्मी घोषित करेगए, उनके अपनो महिमामे सहभागी फिर करबाइ।

परमेश्वरको कभी नाश नाए होन बारो प्रेम

³¹ जे सब बातमे ध्यान करके हम जा निचोडमे पुगन सिकत हएं, अगर परमेश्वर हमर घेन हए कहेसे कोइ फिर हमर उपर जीत हासिल नाए कर्पएहए।

³² परमेश्वर अपने लौंणाके अपने ताहीं फिर नाए धरी, पर बाके हमर ताहीं अपने दुस्मनन्के सौँपदइ। बा हमएं बे सब चीजमे फिर अनुग्रह करैगो जो बा हमसे प्रतिज्ञा करी रहए।

³³ कोइ फिर हमर उपर परमेश्वरके अग्गु दोष नाए लगाए पएहए काहेकी बा बहे हए जो हमएं धर्मी घोसित करत हए।

³⁴ कोइ फिर हमके दण्ड नाए दइ पएहए काहेकी जा येशू ख्रीष्ट हए, जो हमर ताहीं मरीगओ और मरो भओसे फिरसे जिन्दा बनाओ गओ रहए। अभए बा परमेश्वरके दहिना हात घेन रहिके राज्य कररहो हए, और जो हमर घेनसे हमर ताहीं फिर बिन्ती करत हए।

³⁵ कोइ फिर हमके ख्रीष्टको प्रेमसे अलग नाए कर्पएहए। का संकटसे और दुखसे, और खेदोसे, और अनिकालसे, नंगतासे, और फिर खतरासे और तरवारसे? जे चीज मैसे एकफिर हमके ख्रीष्टको प्रेमसे अलग नाए कर्पएहए।

³⁶ जैसे पबित्र-शास्त्रमे लिखो हए, “तेरे ताहीं, हमके हर समय मृत्युको खतरा राहात हए, हम काटन तयार करोभओ भेंणा कता गिनेगए हएं।”

³⁷ पर जे सब खराब बातके उपर बाके द्वारा पुरा रुपसे जीत हम्रीए हए, जो हमसे प्रेम करत हए।

³⁸ काहेकी मए निश्चित हओं, कि कोइ फिर बात हमएं ख्रीष्टको प्रेमसे हमके अलग नाए कर्पएहए। नए मृत्यु, नए जीबन, नए स्वर्गदूत, नए भुत, नए हमर आजको डर, नए कलको चिन्ता, नए नरकको शक्ति; कोइ फिर हमके ख्रीष्टको प्रेमसे अलग नाए कर्पएहए।

³⁹ नए बादरमे भए शक्ति, नए पृथ्वीके तरे भए शक्ति, नए सृष्टिको कोइ फिर शक्ति हमके परमेश्वरको प्रेमसे अलग कर्पएहए, जो हमर प्रभु येशू ख्रीष्टमे प्रकट करोगओ हए।