रोमियों 5 - राना थारु नयाँ नियमशान्ति और आनन्द 1 जहेमारे हम बिश्वाससे परमेश्वरके अग्गु धर्मी ठहिरे हएं और प्रभु येशू ख्रीष्ट हमर ताहीं करोभओ काम द्वारा परमेश्वरके सँग हमर मेलमिलाप भओ हए। 2 हमर बिश्वास करनके कारण, ख्रीष्ट हमके जा अनुग्रहमे लाइ हए, जहाँ हम अभए खडा हएं। और हम निश्चय और आनन्दके साथ परमेश्वरको महिमामे सहभागी होनके आसरामे हएं। 3 इतकए इकल्लो नाए हए, पर जब हम परेसानीमे होत हएं तहुँफिर आनन्दित होत हएं। काहेकी हमके पातहए, कि हम समस्यामे होत पेती, हम सहनसील होन सिखत हएं। 4 परमेश्वर हमके स्वीकार करत हए, काहेकी हम धिरज करन सिखे हएं और बा हमके स्वीकार करत हए जहेमारे हमएं आसरा हए। 5 हम जा आसरामे दुखि नाए होमंगे, काहेकी परमेश्वर पबित्र आत्मा दइ हए और पबित्र आत्मा हमर हृदयमे परमेश्वरको प्रेम भरदइ हए। 6 काहेकी जब हम निर्बल रहएं, तओ ख्रीष्ट ठिक समयमे दुष्ट आदमीनके ताहीं मरो। 7 एक धर्मी आदमीके ताहीं मरन मुस्किल हए। सायद हुइ सकत हए, कि कोइ नेहात्तओकमे कोइ अच्छो आदमीनके ताहीं मरनके तयार हुइजए हए। 8 पर परमेश्वर हमर उपर अपनो प्रेमको भलाइ जा रितिसे प्रकट करत हए, कि जब हम पापीए रहएं, तभीए ख्रीष्ट हमर ताहीं मरो। 9 काहेकी ख्रीष्ट हमर ताहीं बलिदान भओ और हमर पापके ताहीं अपनो खुन बहाइ और हम परमेश्वरके साथ धर्मी घोसित करेगए हएं। बा नेहात्तओ परमेश्वरको क्रोधसे बचाबैगो। 10 काहेकी जब हम परमेश्वरके दुश्मन रहएं तओ बाको लौंणाको मृत्युके द्वारा बा हमरे सँग मेलमिलाप करी, जहेमारे हम नेहात्तओ जा जान सकत हएं, कि अब जबकी हमर बाके सँग मेलमिलाप हए, तओ बा हमके बचाबैगो। काहेकी ख्रीष्ट जिन्दा हए। 11 इतकए इकल्लो नाए, पर अब त प्रभु येशू ख्रीष्टद्वारा परमेश्वरसे हमर मेलमिलाप हुइगओ हए; जहेमारे हम परमेश्वरमे आनन्दित हएं। आदमसे मृत्यु, ख्रीष्टसे जीबन 12 जहेमारे एक आदमीके द्वारा पाप संसारमे आओ अर्थात् आदमके द्वारा। बो पहिलो आदमी रहए जोके परमेश्वर सृष्टि करी, और आदमको पापके कारण बोको मृत्यु भओ और अइसियए सब आदमीमे मृत्यु आओ काहेकी आदममे, सब आदमी पाप करीं। 13 मोशाको नियम कानुन दओजानसे पहिले फिर आदमी पाप करीं, पर जाके पापके रुपमे नाए गिनोगओ काहेकी अबतक तोडेजानके ताहीं कोइ नियम कानुन नाए रहए। 14 आदमसे लैके मोशातक सब आदमी पाप करीं और बे सब मरिगए, जबकी बे आदमी कता नियम कानुन तोडके पाप करीं, और फिर आदमको पाप सब आदमीनके प्रभाबित करी। ठिक उइसीयए ख्रीष्ट करी जो पिच्छु आओ, बा फिर सब आदमीनके प्रभाबित करी। 15 पर आदमको पाप बो बरदान कता नाए हए जो परमेश्वर हमके अपने अनुग्रहसे देतहए। काहेकी एक आदमीको पाप बहुत आदमीनके ताहीं मृत्यु लैके आओ। पर परमेश्वरको अनुग्रह और धार्मिकताको बरदान जो बा हमके दइ हए, बोको मोल बहुत हए और बहुत आदमी जाके अनुभब करी हएं। और येशू ख्रीष्ट एक आदमीके रुपमे अपनो अनुग्रहसे जो करी, बा जाके सम्भब करी। 16 परमेश्वर जो बरदान हमके दइ हए बो आदमके पापके कता नाए हए। काहेकी एकए इकल्लो पाप दण्ड लाइ। पर चहुँ हम बहुत पाप करे होएं, तहुँफिर परमेश्वर हमके एक अइसो बरदान दइ जौन हमके, बाकी नजरमे धर्मी बनाए दइ। 17 एक आदमीको अपराधके कारण सब आदमीमे मृत्यु आओ, तओ जो आदमी अनुग्रह और धार्मिकताको बरदान बहुत जद्धा पातहएं, बे एक आदमीके अर्थात् येशू ख्रीष्टके द्वारा नेहात्तओ कभी फिर नाश नाए होन बारो जीबन पामंगे और येशू ख्रीष्टके सँग राज्य करंगे काहेकी बे बामे बिश्वास करत हएं। 18 जहेमारे जैसी एक अपराध सब आदमीनके ताहीं दण्डको कारण भओ, उइसीयए एक धार्मिकताको कामसे सब आदमी परमेश्वरके अग्गु धर्मी घोसित हुइके जीबन पान बारे भए। 19 काहेकी जैसी एक आदमीके अनाज्ञाकारितासे बेढम जनै पापी ठहिरे, उइसीयए करके एक आदमीको आज्ञा माननसे बहुत आदमी धर्मी घोसित होमंगे। 20 मोशाको नियम कानुन जाकेमारे दओगओ ताकी सब आदमी देख पामएं, कि बे कितने पापी रहएं। पर जब आदमीनको पाप बढो, तओ परमेश्वरको अनुग्रह औ जद्धा बढिगओ। 21 जैसेकी सब आदमी पाप करीं और बे सब मरिगए, उइसीयए हमर प्रभु येशू ख्रीष्टद्वारा परमेश्वरको अनुग्रह उनके धर्मी घोषित करैगो और उनके कभी फिर नाश नाए होन बारो जीबन देबैगो। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation