रोमियों 12 - राना थारु नयाँ नियम

परमेश्वरके जिन्दा बलिदान

¹ तभीमारे ए मेरे ददाभइयओ, हमर ताहीं परमेश्वरको बडो कृपाके कारण मए तुमसे बिन्ती करत हओं, कि तुमर आत्मिक उपासनाके रुममे अपने जीबनके पबित्र और परमेश्वरको मनको बलिदान चढाओ; जहे तुमर परमेश्वरको सेवा करनके सच्चो तरिका हए।

² और जा संसारके आदमीन कता मतबनओ; पर अपनो मनके पुरा परिबर्तनके द्वारा तुमर चालचलन फिर बदलओ, जोसे तुम परमेश्वरको असल, ग्रहणयोग्य और सिद्ध इच्छा का हए बो तुम पता लगान सिकओ।

³ मोके दओगओ अनुग्रहसे तुम मैसे सबके मए बिन्ती करत हओं, जौनके अपनएके जैसो सम्झन्के हए बोसे जद्धा बडो मतसमझओ; पर परमेश्वर तुमके जित्का बिश्वास दइहए बहे कता अपनएके सम्झओ।

⁴ काहेकी जैसे हमर शरीरमे बहुतसे अंग हएं, पर सब अंगके फरक-फरक काम होत हए।

⁵ उइसीयए, हम फिर जो ख्रीष्टमे बिश्वासी हएं, हम सबए ख्रीष्टके शरीरके अंग हएं, और हम सबए एकदुस्रेसे जुडे भए हएं।

⁶ और जबकी बो अनुग्रहके अनुसार जो परमेश्वर हमके दइहए, हमके फरक-फरक बरदान मिलो हए। तओ जौनके भबिष्यबाणीको बरदान मिलो हए, बोके बेहीं बातनके मस्कन चाहो जो बिश्वास करत हए, कि परमेश्वर बोके बताइ हए।

⁷ अगर दुस्रेन्के मदत करनको बरदान मिलो हए तओ दुस्रेन्के मदत करनमे लगोराहाए, अगर कोइके शिक्षा देनको बरदान मिलो हए तओ शिक्षा देन बारो काममे लगोराहाए।

⁸ जोके उत्सहा देनको बरदान मिलो हए तओ बो उत्सहा देनमे लगोरहाए; कोइके दान देनको बरदान मिलो हए कहेसे खुल्ला मनसे दान देबए, जोके अगुवापनको बरदान मिलो हए कहेसे अगुवाई करनमे गम्भीरतासे लागोरहाए। और जोके दया दिखानको बरदान मिलो हए कहेसे खुसीसे करनमे लागो रहाबए।

प्रेमके सम्बन्धमे

⁹ दुस्रेन्से प्रेम करनको दिखावा नाए करन पणत हए, खराब बातके घृणा करओ; जो अच्छो हए, बोके लगातार करतए रहाओ।

¹⁰ एकए परिवारके सदस्यके रुपमे एकदुस्रेसे प्रेम करओ; अपनेसे जद्धा औरेनके आदर करओ।

¹¹ कडी मेहेनत करओ और अल्छी मतबनओ, पुरे दिलसे परमेश्वरको सेवा करओ।

¹² तुमर ठिन जो आसरा हए बोमे तुमके खुसी होन चाहो, दुखमे धैर्य करओ, और लगातार प्राथना करतए रहाओ।

¹³ प्रभु येशू ख्रीष्टके पबित्र आदमीनके जो कुछ जरुरत हए बोमे उनके मदत करओ, घरमे आएभए पहुनन्को सेवा सत्कार करनमे लागे रहाओ।

¹⁴ और तुमके सतान बारेनके सराप नाए, बल्कि आशिर्बाद देओ।

¹⁵ आनन्द करन बारेनके सँग आनन्द करओ। रोन बारेनके सँग रोबओ।

¹⁶ एक-दुसरेन्को उत्नुए ध्यान देओ जित्ना तुम अपनएके ध्यान करत हओ, घमण्ड मत् करओ, पर नम्र बारेनके सँगत करओ और अपनी नजरमे जनैया मतहोबओ।

¹⁷ कोइके खराबीको बदला खराब मत् करओ। जौन बात सब आदमीनको नजरमे ठिक हए, बिनमे ध्यान देओ।

¹⁸ हुइ सिकत हए कहेसे सबके सँग शान्तिमे मिल्के बैठओ।

¹⁹ हे मेरे प्यारे ददाभइयओ, कभी फिर कोइसे बदला मत् लियओ पर तुमर ताहीं बदला लेनको मौका परमेश्वरके देओ, काहेकी पबित्र-शास्त्रमे प्रभु कहात हए, “बदला लेनको काम मिर हए, महीँ बदला लेमंगो।”

²⁰ पर तुम पबित्र-शास्त्रमे लिखो अनुसार करओ जोमे लिखो हए, “अगर तुमर दुस्मन भुखो हए तओ बोके खानु खाबओ। अगर प्यासो हए, तओ पानी पिइबाओ। काहेकी अइसियए कर्नेसे तुम बोके लज्जित करदेबैगे”

²¹ खराबीसे मत् जितओ पर खराबीके भलाइसे जितओ।