रोमियों 11 - राना थारु नयाँ नियम

इस्राएल देशमे परमेश्वरको दया

¹ जहेमारे मए जा पुँछत हओं, “का परमेश्वर अपने आदमीनके त्याग दइ?” नाए! बिरकुलए नाए! महुँ त अब्राहामको बंशमे जन्मो भओ बेन्यामीन घरानाको इस्राएल देशमे रहान बारो हओं।

² परमेश्वर अपने बो आदमीके नाए त्यागी, जोके बा पहिलीएसे चुनलै रहए। तुम जानत हओ, कि पबित्र-शास्त्र एलिया अगमबक्ताके बारेमे का लिखी रहए, कि एलिया इस्राएल देशके आदमीनके बारेमे परमेश्वरसे गुनासो करी।

³ बो कही, “हे प्रभु, बे तेरे अगमबक्तनके मारीं, और तेरी बेदीन्के नष्ट करदइ हएं; और मए केबल एकए आदमी हओं जो अभौफिर तेरे आज्ञापालन करत हओं और हे प्रभु बे मोके फिर मार डारनके चाँहत हएं।”

⁴ पर परमेश्वर एलियासे कही, “मए अपने ताहीं सात हजार आदमीनके धरे हओं जौन झुठे बाल देवताके अग्गु बोको आराधना करन घुँटो नाए टेकी हएं।”

⁵ जहे रितिसे जा समय फिर, परमेश्वरके कृपाके कारण, जे यहूदीनको एक छोटोसो हिस्सा हए जोके परमेश्वर अपने सच्चे आदमीनके रुपमे अनुग्रहसे चुनी हए।

⁶ परमेश्वर उनको भले कामसे नाए बल्कि उनके अनुग्रहसे चुनीं, अगर कामके द्वारा हए तओ अनुग्रह नाए रहितो।

⁷ तब्ही जा बहे हए जो भओ हए: तहुँफिर इस्राएल देशमे रहान बारे परमेश्वरमे सही होनके कोसिस करीं, पर बे सफल नाएभए, पर जौन आदमीनके परमेश्वर चुनी बे बाके सँग धर्मी घोषित भए। और बाँकी इस्राएलीन्के जिद्दी बनाओ दओगओ और परमेश्वरकी बात सुनन्से इन्कार करदइं।

⁸ जैसे यशैया अगमबक्ताके द्वारा पबित्र-शास्त्रमे कहात हए, “परमेश्वर उनके आजके दिनतक सुस्त मन दइ हए। और अइसो आँखी दइहए, कि बे देख नाए पामएं और अइसो कान दइहए कि, बे नाए सुनपामएं।”

⁹ और राजा दाऊद कहात हए, “जारमे पणो भओ चिरैयाँ या गड्डामे पणो बर्धा कता, बे भोजमे भएबेरा अचानक फसएं, ताकी बे ठिक सजाय पामएं।

¹⁰ उनकी आँखी अन्धरा हुइजाएं ताकी बे देख नाए पामएं, और बे सदामान उनको समस्यामे रहिरहामएं।”

कल्मी करोभओ हँगा

¹¹ तओ मए पुँछत हओं, का इस्राएली आदमीनके ठोकर लगनके कारण सदामानके ताहीं हराइगए हएं? नाए! बिरकुलए नाए! पर उनको अपराधके कारण गैर-यहूदीनके उद्धार मिलो, ताकी इस्राएल देशके आदमीनके जलन होबए।

¹² अगर उनको अपराध संसारके आदमीनको अनाज्ञाकरिता गैर-यहूदीनके ताहीं बडो आशिर्बादको कारण बनत हए, कहेसे बे पुरा रुपमे सामिल होन झन कित्नी अर्थपूर्ण बात हुइहए!

¹³ मए तुम गैर-यहूदीनसे जा बात कहिरहो हओं। मए गैर-यहूदीनके ताहीं चुनो भओ चेला भओके कारण मए मिर सेवाकाइमे गर्ब करत हओं।

¹⁴ ताकी कुछ रितिसे मए मरे अपने यहूदी जातिनसे जलन कर्बाएके उन मैसे कोइ एकको उद्धार करपाओं।

¹⁵ काहेकी जबकी इस्राएलके आदमीनके त्यागदेनो संसारके आदमीनको मेलमिलापको कारण भओ, तओ जब बे ख्रीष्टके मसिहाके रुपमे ग्रहण करंगे तओ जा एक मरे भए आदमी कता होइगो जो फिरसे जिन्दा हुइगओ हए।

¹⁶ अगर मणो भओ चुनको पहिलो भाग परमेश्वरके देनसे पबित्र हुइजात हए तओ पुरो मणो भओ चुन फिर पबित्र हुइजात हए। और जब जर पबित्र हए तओ हँगा फिर पबित्र होतहए।

¹⁷ इस्राएलके आदमी एक अच्छे जैतूनके पेणके हँगा कता हएं और पुर्खा अब्राहाम, इसहाक और याकूब बे पेणके जर कता हएं। अगर कोइ हँगा काटेगए और तुम एक जंगली जैतून हुइके फिर असल जैतूनमे कलमी भए हओ कहेसे जंगली जैतूनको हँगा असल जैतूनको रुखामे कलमी हुइके बो रुखासे फाइदा पाओकता, तुम यहूदी आदमीनसे फाइदा पातहओ।

¹⁸ बे कटेभए हँगनके बारेमे घमण्ड मत् करओ। और अगर तुम घमण्ड करैगे तओ जानलेओ, कि तुम जरके नाए बल्कि जर तुमके थामेहए।

¹⁹ तुम सायद कहे सकत हओ, “परमेश्वर यहूदीनके बेहीं हँगा कता अस्वीकार करदइ जो एक पेणसे काटदओ गओ जातहए ताकी बा अन्यजातिनके स्वीकार करपाबए, जो बेहीं हँगा कता हएं जौनन्के कल्मी करोगओ हए।”

²⁰ जा सत्य हए, बे त अबिश्वासीके कारण काटेगए, पर तुम बिश्वाससे बने रहात हओ जहेमारे घमण्डी मतहोबओ, पर डर मानओ।

²¹ काहेकी अगर परमेश्वर स्वभाबिक हँगनके दया नाए करी कहेसे तुमके फिर दया नाए करैगो।

²² जहेमारे परमेश्वरको दयालुता और कठोरताके देखके बिचार करओ! पतन भए बारेन्के उपर कडा ब्यबहार करओ, पर बाको दयामे रहे कहेसे तुमके परमेश्वरको दया दिखाओ जाबैगो, नत तुम फिर काटे जाबैगे।

²³ और अगर बे दुस्रे हँगा जो कटेगए हएं बे फिर बिश्वास करन सुरु करदेहएं कहेसे उनके दुबारा पेणमे कलमी करोजाबैगो, काहेकी परमेश्वर बिनके फिरसे कलमी करन सिकैगो।

²⁴ कोइ जंगली हँगाके कोइ अच्छो पेणको हिस्सा बनन स्वाभाबिक नाए हए। और तुम जो इस्राएल देशके आदमी नैयाँ, एक जंगली जैतूनको पेणसे कटो हँगा कता हए और एक अच्छो जैतूनको पेणमे कलमी करेगए। लेकिन बाँकी बे इस्राएल देशके आदमी बहे हँगा कता हएं जो अच्छे पेणसे बडो रहए, नेहात्तओ उनके फिरसे अपने पेणसे मिलाओ जाए सकत हए।

सबए इस्राएल देशके आदमीनको उद्धार

²⁵ हे बिश्वासी ददाभइया, मए नाए चाँहत हओं, कि तुम गैर-यहूदी अपने बारेमे बहुत घमण्ड करओ। जहेमारे इस्राएल देशके आदमीनके सँग का भओ हए बो रहस्य मए बतामंगो। जा सत्य हए, कि इस्राएल देशके बहुतसे आदमी बिश्वास करनके तयार नाए हएं, पर जब परमेश्वरके पिछा करन बारे गैर-यहूदी आदमीनकी संख्या पुरा हुइजएहए, तओ इस्राएल देशके आदमी बिश्वास करंगे और परमेश्वरके ठिन लौटके आए जामंगे।

²⁶ बहे तरिकासे पुरए इस्राएल देशके आदमी उद्धार पामंगे; जैसे पबित्र-शास्त्रमे लिखो हए, “मुक्तिदाता यरूशलेम सहरसे आबैगो, और बा याकूबको बंशसे अधर्म हटाबैगो।

²⁷ और उनके सँग मिर जहे नयाँ करार हुइहए, जब मए उनको पाप क्षमा करंगो।”

²⁸ यहूदी परमेश्वरके दुस्मन हएं, काहेकी बे अच्छो समाचारमे बिश्वास नाए करन चाँहत हएं, और जाके ताहीं तुमर फाइदा हुइगओ हए। पर परमेश्वर उनके प्रेम करत हए काहेकी बा उनके अपने ताहीं चुन्लै हए। जहे बातके बे उनको पुर्खासे बाचा करी रहए।

²⁹ काहेकी परमेश्वर अपनो दओ भओ बरदान फिर्ता नाए लेतहए और बुलाएभएनके कभी पिच्छु नाए छोडत हए।

³⁰ काहेकी पहिले तुम अन्यजाति आदमी परमेश्वरको आज्ञापालन नाएकरे रहओ पर अभए इस्राएल देशके आदमी आज्ञापालन नाए करोके कारण इकल्लो परमेश्वरको दया तुम पाएहओ।

³¹ उइसीयए बे फिर अब आज्ञा नाए मानीं, कि तुमर उपर जो दया होत हए जासे उनके उपर फिर दया होबए।

³² काहेकी परमेश्वर सब आदमीनके अनाज्ञाकारी होनके देतहए, ताकी बा सबए आदमीनके उपर अपनो दया दिखाए पाबए।

परमेश्वरको स्तुति और आदर

³³ आहा! परमेश्वरको धन, बुद्धि और ज्ञान नेहात्तओ महान हए! कोइ फिर बाको निर्णयको ब्याख्या नाए करपात हए; कोइ फिर बाको डगरके नाए समझ पातहए!

³⁴ “काहेकी प्रभुको मनके कौन जानत हए? और बाको सल्लाहकार कौन भओ हए?

³⁵ और, कौन बक कोइ उपहार दइ हए और परमेश्वर बाके फिर्ता देबए?”

³⁶ काहेकी सब कुछ परमेश्वरसे आत हए। बा सब कुछ बनाइ हए, और सब कुछ बहेके हएं। बा हमेसाके ताहीं सम्मान प्राप्त करनके चाहो। आमेन।