प्रकाश 22 - राना थारु नयाँ नियमजीबनकी नदिया 1 तओपिच्छु स्वर्गदूत मोके एक नदिया दिखाइ जोमे जीबनको पानी रहए। पानी सफा सिसा कता चम्कत रहए। जा पानी परमेश्वर और थुमाको सिंहासनसे बहात रहए। 2 नदिया बो सहरको डगरके बीचए-बीचसे बहात रहए, और पानीको दुनौ किनारेमे जीबन देन बारो पेण देखो जाए सकत रहए। बे पेणनमे बाह्र मेलके फरा फरत रहएं, और हर महिनामे बाह्र मेलके अलग-अलग फरा फरत रहएं। और इनको पत्ता अइसो दबाइ हए, जौन पृथ्वीके जाति-जातिके आदमीनके ठिक करदेत रहए। 3 परमेश्वरके सरापमे भओ कोइ फिर आदमी या चीज बो सहरमे नाए होमंगे। परमेश्वर और थुमाको सिंहासन सहरमे हुइहए, और बाके दास बाको आराधना करंगे। 4 बे परमेश्वरके आमने-सामने देखंगे, और बाको नाउँ बिनके माथेमे हुइहए। 5 हुवाँ फिरसे कभी रात नाए हुइहए, और जो आदमी हुवाँ रहात हएं, बिनको डगर उजियारो करनके ताहीं दियाको कोइ जरुरत नाए हुइहए। नए बिनके उजियारो देनके ताहीं सूर्यको जरुरत हुइहए, काहेकी परमेश्वरए आदमीनके उजियारो देतहए। और जे आदमी जो हुवाँ बैठत हएं सदामानके ताहीं राज्य करंगे। 6 जाके पिच्छु स्वर्गदूत मोसे कही: “पहिले बताइ भइ बात सब सच्चे हएं और नेहात्तओ होबैगो। प्रभु परमेश्वर जौन अपनो आत्मा सबए अगमबक्तनके दइ। परमेश्वरए हए, जौन अपनो स्वर्गदूतके आदेश दइ, कि बा अपन सेवकनके जा दिखानके ताहीं हियाँ पठाइ, जो जल्दीयए होन बारो हए।” येशू जल्दीयए आएरहो हए 7 “देखओ, मए जल्दीए आएरहो हओं। जा किताबमे लिखो भओ अगमबाणीको बचन पालन करन बारे धन्यके हएं।” 8 मए यूहन्ना हओं, जौन जे सब बातनके देखो और सुनो। जब मए जे बात सुनो और देखो, तओ मोके जे बात दिखान बारो स्वर्गदूतको पाँवमे आराधना करनके ताहीं घोप्टा पणो। 9 पर स्वर्गदूत मोसे कही, “देख, मिर आराधना मत् कर। काहेकी मए त तोही कता एक सेवक और बिश्वासी ददाभइया और अगमबक्ता और जा किताबमे भओ बचन पालन करन बारे सबए बिश्वासी भइया कता हओं। परमेश्वर इकल्लो एक हए, जोके तोए आराधना करनके हए।” 10 तओ बो फिरसे मोसे अइसे कही, “जा किताबको भबिष्यबाणीके सन्देशनके मत् लुकाबए। काहेकी जे बात पुरा होनको समय ढिँगै आइगओ हए। 11 जोकोइ फिर घिनौनो काम करत हए, उन्हएं उनको घिनौनो कामनके करनदेओ। अइसियए जोकोइ फिर अच्छो और पबित्र काम करत हए, उन्हएं उनको अच्छो और पबित्र कामनके करनदेओ।” येशू ख्रीष्ट मण्डलीके ताहीं गवाही 12 तओ प्रभु येशू कही, “देख, मए जल्दीए आमंगो। आदमीको करोभओ काम अनुसार इनाम या दण्ड देनके ताहीं मए आएरहो हओं। 13 महीँ हओं जौन सब चिजनको सुरुवात करो, और महीँ हओं जो सब चीजके खतम करंगो, पहिलो और अन्तिम, सुरु और अन्त महीँ हओं। 14 अपनो लत्ता धोएके, सफा करके धरन बारे धन्यके हएं। काहेकी बिनके बहे सहरको फाटकसे घुसन अधिकार दओ जाबैगो। और उन्हएं बो पेणको फरा फिर खानके अधिकार दओ जाबैगो जो जीबन देतहए। 15 पर गलत काम करन बारे, मन्तुर करन बारे, व्यभिचार करन बारे, हत्या करन बारे, मूर्ति पुजन बारे और ठगन बारे कभी फिर बो सहरमे नाए घुसपामंगे। 16 मए येशू, अपनो स्वर्गदूतनके तुमर ठिन मण्डलीके ताहीं जा गवाही देन पठाओ हओं, जो परमेश्वरको आदमीनको समुहसे हएं। मए दाऊद राजाको जर हओं। मए बहे हओं, जौनके सुबेरेको तारा अर्थात् सबसे जद्धा चम्कन बारो तारा कहोजात हए।” 17 पबित्र आत्मा और थुमाको दुलहीन येशूसे कही, “तुमके जरुर करके आन पणैगो।” हर एकजनै, जो जा बात सुन्तहएं बोके फिर कहान पणैगो, “आबओ।” जो फिर प्यासो हए, बो आबए और बहे पानी पिबए जो सेँतएमे जीबन देतहए। चेतावनी 18 मए यूहन्ना हओं, मए तुम सबके जा चेतावनी दइ रहो हओं। जौन सुनीहएं, कि जा अगमबाणीको किताबमे का लिखो हए: अगर कोइ जा पुस्तकमे कुछु थपी कहेसे परमेश्वर बोको दण्ड थप्देबैगो। जौन दण्डके बारेमे जा पुस्तकमे बताओ गओ हए। 19 अगर कोइ अइसो आदमी हए, जो जा पुस्तकमे भबिष्यबाणी करीभइ बात मैसे कुछ हटाइ कहेसे, तओ परमेश्वर फिर बो पेणसे फरा खानको अधिकारके हटाए देहए जो जीबन देतहए। और बोको पबित्र सहरमे रहानको अधिकार फिर हटाए देबैगो, जोके बारेमे जा किताबमे बताओ गओ हए। 20 येशू जे सब बचनको गवाही देतहए, और बा कहात हए, “नेहात्तओ, मए जल्दीए आएरहो हओं।” मए यूहन्ना जबाफ दओ “आमेन! हे प्रभु येशू आबओ।” 21 मए प्राथना करत हओं, कि हमर प्रभु येशू ख्रीष्ट पबित्र आदमीनके अनुग्रह करतए रहाबए। आमेन। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation