प्रकाश 20 - राना थारु नयाँ नियमएक हजार बर्ष 1 तओपिछु गहिरो कुण्डाको कुन्जी और एक बडो सँकार हातमे लओभओ एक स्वर्गदूत स्वर्गसे उतरके आओ मए देखो। 2-3 और बो बहे बडो अजिंगरके पक्णी जो बहे रहए जौनके बहुत समय अग्गु एक साँपके रुपमे देखा पणो रहए, जौनके शैतान फिर कहोजात हए। बो बोके सँकारसे बाँधी और गहिरो कुण्डामे फेँकदइ। तओपिच्छु बो बोके बन्द करदइ और ढोकामे मोहर लगाए दइ ताकी एक हजार बर्ष पुरा होनतक बोके ठिन जाति-जातिके आदमीनके धोखा देन बारो कोइ तरिका नाए होबए। जब बो पुरा होबैगो, तओ बोके फिरसे कैदसे कुछ समयके ताहीं इकल्लो छुटाओ जाबैगो। 4 और फिरसे मए कुछ सिंहासन देखो, जोमे बैठन बारेनको मुण कटो गओ रहए, काहेकी बे येशूको सन्देश और परमेश्वरको बचनके परचार करी रहएं। जे राक्षस या बोको मूर्तिको आराधना नाए करी रहएं, और जे अपनो माथोमे और हातनमे राक्षसको छाप नाए लगाए रहएं। बे फिरसे जिन्दा भए रहएं और सिंहासनमे बैठे रहएं। परमेश्वर बिनके राज्य करनके अधिकार दइ, और बे ख्रीष्ट सँग एक हजार बर्षतक राज्य करीं। 5-6 जे आदमी जिन्दा भएन मैसे पहिले रहएं, और जे खास रुपसे धन्य और पबित्र हएं। दुस्रो मृत्युको बिनके उपर कोइ शक्ति नाए हए। बे परमेश्वर और ख्रीष्टको पुजारी होमंगे और बिनके सँग बे एक हजार बर्षतक राज्य करंगे। जा एक हजार बर्षसे पहिले कोइ औ मरे भए आदमीनके जिन्दा नाए करोगओ रहए। शैतानको अन्तिम बिनाश 7 एक हजार बर्ष खतम हुइके शैतान बोको कैद मैसे छुटाओ जाबैगो। 8 और बो जाति-जातिके आदमीनके धोखा देनके ताहीं बाहिर आबैगो जो सबए संसारमे फैलेहएं। जे देशनके गोग और मागोग कहोजात हए। शैतान बे सबके एक ठाउँमे इकट्ठा करैगो जहाँ बे लणंगे। हुवाँ समुन्दरको रेता कता इतनो जद्धा होमंगे, कि कोइ फिर बिनके गिन नाए पामंगे। 9 बे पृथ्वीके हर ठिहा गए और बे बो सहरके घेरलइं, जौन परमेश्वरसे प्रेम करत हए, जहाँ बाके आदमी रहात हएं। पर परमेश्वरके घेनसे, स्वर्ग मैसे आगी बाहिर आइ और पुरी सेनाके भसम करदइ। 10 तओ बे शैतानके, जौन जे सब आदमीनके धोखा दइ रहए, बोके बो ठिहा फेँकदइं जहाँ गन्धक और आगी पज्रत हए। बो बहे ठिहामे होबैगो, जहाँ बे पहिलीएसे राक्षस और झुठो अगमबक्तनके फेँकी रहएं। आगी बे सबके रातदिन रोज तड्पाबैगो। मरे भए आदमीनको न्याय 11 फिर मए एक सेतो सिंहासन देखो जोमे परमेश्वर बैठो रहए। पर जहाँ परमेश्वर बैठो रहए हुवाँपर बादर और पृथ्वी सब हराइगए, और कोइ फिर उनके फिरसे दुस्राएके नाए देखीं। 12-13 और मरे भए आदमीनके सिंहासनके अग्गु ठाणे देखो, अथवा बे, जो साधारण और महत्त्वपूर्ण रहएं। बे, जो समुन्दरमे डुबके मरे रहएं, और पाताल फिर चिहानमे भए सबए मरे भए आदमी, और बे सब जो मरे भए आदमीनके ठिहामे रहएं, बे सब बो सिंहासनके अग्गु ठाणे। बो जीबनको किताब खुलोगओ जोमे बे आदमीनको नाउँ लिखो रहए, जोके सँग कभी फिर अन्त नाए होन बारो जीबन रहए। बो जीबनको किताब फिरसे खुलोगओ जोमे आदमी जो-जो काम करी रहएं बो लिखो रहए। और हर आदमी जो करी रहएं, बोके अनुसार उनको न्याय करोगओ, जो बो किताबमे लिखो रहए। 14-15 बे सबए आदमी, जोको नाउँ जीबनको किताबमे लिखो नाए रहए, बिनके आगी और गन्धकमे फेँको गओ। जाके पिच्छु अब मृत्यु नैयाँ, अब मृतकनको कोइ ठाउँ फिर नैयाँ, काहेकी बे सब आदमी जौनको नाउँ जीबनको किताबमे लिखो नाए रहए, उनके आगी और गन्धकमे फेँको गओ, जहेके दुस्री मृत्यु कहोजात हए, जोकी आगीको कुण्डामे मिलन बारो दण्ड हए। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation