प्रकाश 14 - राना थारु नयाँ नियम

थुमा और एक लाख चवालीस हजार जनै

¹ तओपिच्छु मए एक औ चीज देखो, मए सियोन पहाडको चुटियामे थुमाके ठाणो देखो। बाके सँगमे एक लाख चवालीस हजार आदमी रहएं, बिनको माथोमे थुमाको और बाको दौवाको नाउँ लिखो रहए।

² और मए स्वर्गसे कोइ पानीको झरना कता बडो अबाज या गर्जनको बडो अबाज कता सोनो। जा बीणा बजान बारो अपनो बिणा बजाएके निक्रन बारो सुर कता लगत रहए।

³ एक लाख चवालीस हजार आदमी सिंहासनके अग्गु, चार जिन्दा प्राणी और धर्मगुरुनके अग्गु बे एक नयाँ गीत गानडटे रहएं जो गीत बेहीं इकल्ले सिखपात रहएं। बेहीं हएं जौनके परमेश्वर पृथ्वीमे रहान बारे आदमीनके बीचसे छुणाइ रहए।

⁴ बिनको जीबन पबित्र हए। बे बेहीं लोग कता हएं जौन कभी फिर व्यभिचार नाए करी हएं, जौन कभी फिर आराधना नाए करी हएं, बे थुमाको इकल्लो आराधना करत हएं। जहाँ थुमा जातहए, हुवाँ बेहुँ जात हएं, बे आदमी बेहीं हएं जौननके पृथ्वीके सबए आदमीनके बीचसे छुटावगओ हए। आदमी अपनो फसलको पहिलो फल परमेश्वरके चढाओकता, बे परमेश्वर और थुमाके पहिलो भेँटीके रुपमे चढाएगए हएं।

⁵ बे कभी फिर नाए ठगी हएं, बे निर्दोष हएं।

तीन स्वर्गदूत

⁶ और मए दुस्रो स्वर्गदूतके बादर उपर उणनडटो फिर देखो। बो स्वर्गदूत अच्छो समाचार लाइ जो कब्ही नाए बदलत हए। बो स्वर्गदूत संसारमे भए आदमीनके, हर जाति, कुल, भाषा, और राष्ट्रके आदमीनके परचार करी।

⁷ बो जोडसे चिल्लाएके कहीं, “परमेश्वरको डर मानओ और बाके आदर देबओ, काहेकी अब बाके आदमीनको न्याय करनको समय हए। बाको आराधना करओ काहेकी बा बादर, पृथ्वी, समुन्दर और पानीको मुल बनाइ।”

⁸ हुवाँ एक औ स्वर्गदूत रहए, जो पहिलो स्वर्गदूतके अइसे कहात पिच्छु लग्गओ, “अब जा नाश हुइगओ हए। बेबिलोनको सहर बहुत नाश हुइगओ। बो सब आदमीनके अपनो दारुसे दरोहा बनाइ, जा कहानको मतलब जा हए, कि बो सब मानब जातिके बहुत खराब ब्यबहार करन सिखाइ। काहेकी बो बिनके मूर्तिपुजा करन सिखाइ।”

⁹ तओ फिर तिस्रो स्वर्गदूत और दुई स्वर्गदूतनके पिच्छु लागो। जा बडो अबाजसे अइसे कहात बिनके पिच्छु आओ, “जो कोइ फिर आदमी बो राक्षसको या बोको मूर्तिके आराधना करैगो और जौनको माथोमे या बोको हातमे छाप लागो हए,

¹⁰ बिनके परमेश्वर बहुत दण्ड देबैगो। जा अइसो हए जैसेकी, परमेश्वर बेहीं आदमीनके बहुत करुवान बारो चीज पिबानके देबैगो जोमे कोइ मिसावट नाए होबैगो, परमेश्वर बे आदमीनके पबित्र स्वर्गदूत और थुमाके अग्गु आगी और गन्धकमे कष्ट देबैगो।

¹¹ आगीसे निक्रन बारो धुवाँ जौन बिनके दुख देबैगो बो हमेसा बादर घेन उणतए रहाबैगो। रातदिन बिनके सताओ जएहए, काहेकी बे राक्षसको और बोको मूर्तिको आराधना करीं और बे बो राक्षसको नाउँको छाप लैं।”

¹² तभीमारे जा जरुरी हए, कि परमेश्वरके पबित्र आदमीके जीबनमे आन बारे सबएके दुख सहान पणतए हए। बे परमेश्वरको आज्ञापालन करत हएं। और बिनके येशूमे बिश्वास करन नाए छोडन हए।

¹³ फिरसे मए स्वर्गसे कोइके मस्कत सुनो, और बा मोसे कही: “जे बातनके हियाँ लिख। अबसे, अइसे आदमी धन्यके हएं, जो परमेश्वरमे बिश्वास करके मरत हएं।” तओ पबित्र आत्मा पक्का करी और कही, “जा सत्य हए। बे धन्यके हएं, काहेकी बे अपनो कठिन परिश्रमसे अराम करंगे और बिनको करोभओ कामसे उनके इनाम दओ जाबैगो।”

पृथ्वीको बाली काटनको समय

¹⁴ तओ मए सेतो बादर देखो, और आदमीको लौंणा कता एक जनैके बो बादर उपर बैठो देखो। और बाको मुणमे सोनोको मुकुट रहए और बाको हातमे एक पैनो हँसिया रहए।

¹⁵ ठिक बहे बेरा एक औ स्वर्गदूत स्वर्गमे भओ मन्दिर मैसे बाहिर आओ। और बा बादरमे बैठो आदमीसे जोडसे अबाज निकारके कही, “पृथ्वीमे बाली काटनको समय तयार हए, तभीमारे हँसिया लैले, और बाली काट।”

¹⁶ जहेमारे बादरमे बैठो आदमी अपनो हसियासे काटन सुरु करी और बो पुरा पृथ्वीमे बाली कटनी करी।

¹⁷ तओ स्वर्गमे भओ मन्दिर मैसे एक औरो स्वर्गदूत बाहिर आओ। बोके सँग फिर एक पैनो हँसिया रहए।

¹⁸ ठिक बहे बेरा औरो स्वर्गदूत मन्दिरसे बाहिर आओ, जौन बेदीमे धुप पजारन बारो काम करत रहए। बो जोडसे, पैनो हँसिया भओ स्वर्गदूतसे कही, “पृथ्वीमे भए अंगुरको झोँथा पुरए पक्गए हएं, बोके अपनो हँसियासे काट।”

^19-20 तओ स्वर्गदूत पृथ्वीमे भओ अंगुरको झोँथा अपनो हँसियासे काटके जमा करी। अंगुरके एक ठाउँमे जमा करोगओ, ताकी बिनके पेरपाबए। जाको मतलब जा हए, कि परमेश्वर कडा सजाय देबैगो। अंगुर सहरके बाहिर परेगए रहएं। हुवँए, जहाँ अंगुरके पेरेगए रहएं हुवाँसे जो खुन निक्रो, बो एक इत्नो गहिरो धार कता बहो, कि घोडाको लगाम तक पुग्गओ, और तीन सओ किलोमिटर तक फैलीगओ।