प्रकाश 1 - राना थारु नयाँ नियम

भूमिका

¹ परमेश्वर येशू ख्रीष्टके बे गुप्त बात बताइ जो बहुत जल्दी होन बारे हएं, ताकी बा उन्हएं अपनो सेवकनके अग्गु प्रकट करपाबए। बा अपनो स्वर्गदूतके बो सन्देश सँग बाको दास यूहन्ना ठिन पठाइ।

² यूहन्ना अपन देखो भओ सब चीज लिखी अर्थात् जा परमेश्वरसे आओ भओ सन्देश हए और येशू ख्रीष्टको कहो भओ सब बात हए।

³ परमेश्वर हर बो आदमीके आशिष देबैगो जौन जा अगमबाणीके दुस्रेनके पढके सुनात हए, और बा हर बो आदमीके आशिष देबैगो जौन जाके सुनत हए और जाके पालन करत हए। काहेकी जे चीज जल्दीय होमंगे।

नमस्कार और प्रसंसाको गीत

⁴ जा चिट्ठी यूहन्नाके घेनसे एशिया परदेशमे भए सात मण्डलीनके लिखरहो हओं: मए प्राथना करत हओं, कि तुमके परमेश्वरके घेनसे अनुग्रह और शान्ति प्राप्त होबए; बा बहे परमेश्वर हए जो समयकी सुरुवातसे लैके अबतक और हमेसएके ताहीं नाए बद्लत हए। और बे सात आत्मा हएं, जो परमेश्वरको सिंहासनके अग्गु हएं,

⁵ और येशू ख्रीष्टके घेनसे जौनको बचनमे भरोसा करोजाए सकत हए। बहे हए जो मरनके बाद फिरसे जिन्दा हुइगओ हए और बो जा संसारके सब राजनको सासक हए। बा हमसे प्रेम करत हए और बा हमके बचात हए, बाको खुन हमके हमर पापसे बचात हए।

⁶ बा हमके अइसो आदमी बनाए दइ हए, जौनको परमेश्वर उनको राजा हए और बा हमएं अपनो दौवा परमेश्वरके ताहीं पुजारी बनाए दइ हए। बाके आदर और अधिकार हर दिन और हर समय मिलतए रहाबए। आमेन।

⁷ सुनओ, बा बादरके सँग आन बारो हए, हर एक आदमी बाके देखंगे, हियाँतककी जब येशू क्रूसमे चढाओगओ रहए तओ बाके पसुरीमे भाला मारी रहए, बो फिर देखैगो। और जब बे बाके देखंगे तओ पृथ्वीके सब आदमी उँची अबाजमे रोमंगे। अइसियए होबए। आमेन।

⁸ प्रभु परमेश्वर कहात हए, “महीँ हओं जौन सब चिजनको सुरुवात करो, और महीँ हओं जो सब चीजके खतम करंगो। मए बहे हओं, जो समयकी सुरुवातसे लैके अबतक और हमेसएके ताहीं नाए बद्लत हओं, मए सर्बशक्तिमान परमेश्वर हओं।”

ख्रीष्टको दर्शन

⁹ मए यूहन्ना, तुमर सँगी बिश्वासी हओं, और येशूसे मिर एकता भओके कारण मए तुमर सँग परमेश्वरको राज्यमे, सरे दुखमे और उनके सहानकी शक्तिमे सहभागी हओं, मोके पत्मोस टापूमे पठाओ गओ रहए, काहेकी मए परमेश्वरके बचनके और येशू द्वारा प्रकट करोगओ सच्चाईके परचार करत रहओं।

¹⁰ बिश्वासीनके ताहीं आराधनाके दिनमे परमेश्वरको आत्मा मिर उपर आओ और मए तुरहीको अबाज कता एक उँची अबाज अपने पच्छुसे आत सुनो।

¹¹ “तए जो कुछ देखत हए, बोके एक खलरीको चिट्ठीमे लिख्, और जाके सात मण्डलीनके पठा, जो जे सहरमे हएं: एफिसस सहर, स्मुर्ना सहर, पर्गामम सहर, थिआटीरा सहर, सार्डिस सहर, फिलाडेल्फिया सहर, और लाउडिकिया सहर।”

¹² मए जा देखनके ताहीं पच्छु घुमो, कि कौन मोसे बात कररहो हए, और मए सोनेकी बनी भइ सात दिया देखो;

¹³ और बे दियनके बीचमे एक आदमीको लौंणा कता कोइ दिखानडटो रहए। बा लम्बो लत्ता लगाए रहए जो बक टांगतक पुगत रहए। बा अपनो शरीरको छातीके आसपिस सोनेकी बेल्ट लगाए रहए।

¹⁴ बाको मुणको बार, रुवा या हिउँ कता बहुत सेतो रहए। बाकी आँखी आगीको ज्वाला कता रहए।

¹⁵ बाको पाउँ आगीको भट्टीमे निख्रो भओ फूलके बर्तन कता रहएं, और जब बा मस्कत रहए बाको अबाज बडो झरनासे आन बारो अबाज कता सुनाइ देत रहए।

¹⁶ बाको दाहिना हात, सात तारनके पक्णे रहए, और बाको मुँहुँसे दुनौ घेन पैनो धार बारो तरबार निक्रो रहए। बाको अनुहार दुपहारको उजियारो कता रहए जैसे सूर्य चम्कत हए।

¹⁷ जब मए बाके देखो, तओ तुरन्तए मए बाके पाँओँमे पणिगओ। मए एक मरो भओ आदमी कता हुइगओ। पर बा अपनो दहिना हात अइसे कहिके मिर उपर धरी, “मत डराए, महीँ हओं, जौन सब चिजनको सुरुवात करो। और महीँ हओं, जो सब चिजनके खतम करंगो।”

¹⁸ मए जीबनको स्रोत हओं। मए एकचोटी मरिगओ रहओं, पर अब जिन्दा हुइगओ हओं और मए सदादिनके ताहीं जिन्दा रहामंगो। और मेरे सँग बेहीं पातालके कुन्जी हएं, जो मोके बो ठाँउके खोलनको शक्ति देत हएं जहाँ मरे भए आदमी हएं। और उनके फिरसे जिन्दा करनकी शक्ति देतहए।

¹⁹ जो तए देखत हए बहे लिख, अर्थात् दुनौ चीज, जो अभए हुइ रहो हए और जो पिच्छु होमंगी।

²⁰ अब मए बतामंगो, कि मेरे दाहिना हातके सात ताराको अर्थ का हए, और सोनोके सात दियाको अर्थ का हए, जोकी पहिले कोइके पता नाए रहए। जाको अर्थ जा हए: सात दिया सात मण्डली हएं, और बे सात तारा सात मण्डलीक स्वर्गदूत हएं।