फिलिप्पी 1 - राना थारु नयाँ नियम

अभिबादन

¹ मए पावल, तिमोथीके सँगमे, ख्रीष्ट येशूके दासके रुपमे जा चिट्ठी फिलिप्पी सहरके मण्डलीके रेखदेख करन बारे अगुवा और मण्डलीके सेवक सहित सब परमेश्वरके आदमीनके ताहीं लिखनडटो हओं, जो ख्रीष्ट येशूसे सम्बन्धित हएं।

² हम प्राथना करत हएं, कि हमर दौवा परमेश्वर और प्रभु येशू ख्रीष्ट तुमके अनुग्रह और शान्ति देबए।

धन्यबाद और मण्डलीके ताहीं प्राथना

³ सुरुक दिनसे तुम येशू ख्रीष्टके बारेमे जा अच्छो समाचारमे बिश्वास करे, जाके फैलानमे तुम मेरे सँग सहयोगी हओ। जाकेमारे मए जब फिर तुमर बारेमे सोँचत हओं, तओ मए परमेश्वरके धन्यबाद देत हओं, और मए आनन्दसे तुम सबके ताहीं परमेश्वरसे मदतके ताहीं प्राथना करत हओं।

⁴ और परमेश्वरके सँग अपनो सब प्राथनामे तुम सबके ताहीं रोजए परमेश्वरसे मदतके ताहीं बिन्ती करत हओं।

⁵ काहेकी तुम पहिले दिनसे जा अच्छो समाचारमे बिश्वास करे और आजतक येशू ख्रीष्टके बारेमे अच्छो समाचार फैलानमे मिर मदत करेहओ।

⁶ मोके जा बातको भरोसा हए, कि परमेश्वर तुममे कुछ अच्छो काम करन सुरु करीहए, और परमेश्वर बो दिनमे पुरा करैगो, जब येशू ख्रीष्ट लौटके आबैगो।

⁷ जा ठिक हए, कि मए तुम सबके ताहीं अइसियए सोँचओं, काहेकी मए तुमसे बहुत प्रेम करत हओं, जबकी मए एक कैदी हओं, या अच्छो समाचारको सच्चाईको रक्षा और साबित कररहो हओं, तुम सब मेरे सँग परमेश्वरको अनुग्रहमे सहभागी होबओ।

⁸ जामे परमेश्वर मिर साक्षी हए, कि मए येशू ख्रीष्टके गहिरो प्रेम करके तुम सबके देखनको प्यासो हओं।

⁹ और मए जा प्राथना करत हओं, कि ज्ञान और बिबेकसँग तुम एक-दुस्रे प्रति तुमर प्रेम बढतए जाए।

¹⁰ ताकी तुम सबसे ठिक चीजके छानपाबओ, और उनके स्वीकार करके ख्रीष्टके लौटके आनतक शुद्ध और निर्दोष होतए रहाबओ।

¹¹ और येशू ख्रीष्टके द्वारा तुममे धर्मी काम दिखाइ पणए, जोसे परमेश्वरको महिमा और स्तुति होत रहाबए।

अच्छो समाचार परचार भओके कारण पावलको आनन्द

¹² हे मेरे बिश्वासी ददाभइयओ, मए चाँहत हओं, कि तुम जा जान लेबओ, कि मोए जो भोगो हओं, बो बहुतसे आदमीनके ताहीं अच्छो समाचारमे बिश्वास करनको कारण बनो हए।

¹³ हियाँतककी रोमको महाराजाको दरबारके सबए सिपाही और सबए आदमीनमे जा प्रकट हुइगओ हए, कि मए जेलमे हओं, काहेकी मए ख्रीष्टको एक सेवक हओं।

¹⁴ और मए जेलमे भओके कारण बहुतसे बिश्वासी ददाभइया प्रभुमे बल पाइगए हएं, और बे बिना डरके परमेश्वरको अच्छो समाचार सुनान बारे भए हएं।

¹⁵ कुछ आदमी त डाह और दुस्रेके सँग लडाइ करके ख्रीष्टके बारेमे अच्छो समाचारके परचार करत रहएं। और कोइ आदमी ख्रीष्टके बारेमे अच्छो समाचारको परचार करनके अच्छो मनसे मेरी मदत करत रहएं।

¹⁶ बे आदमी जो अच्छो मनसे परचार करत रहएं, बे अइसे प्रेमके ताहीं करत हएं। काहेकी बे जानत हएं, कि ख्रीष्टके बारेमे अच्छो समाचारके रक्षा करनके मारे, मोके जेलमे डारदओगओ हए।

¹⁷ पर बे आदमी जो डाह करत हएं, बे स्वार्थी अभिलाषासे ख्रीष्टके बारेमे परचार करत हएं, कि बे हियाँ जेलमे मिर समस्या बढानके बिचारसे अइसो करत हएं।

¹⁸ तओ का भओ? जाके बारेमे मए त खुसी हओं, चहुँ अच्छो मनसे होए, चहुँ खराब मनसे, जैसे होएसे फिर ख्रीष्टके बारेमे अच्छो समाचार परचार होत हए।

¹⁹ काहेकी मए जानत हओं, कि तुमर प्राथनाके द्वारा, और येशू ख्रीष्टसे पठाओ भओ पबित्र आत्माके मदतसे मए जेल मैसे मुक्त होमंगो।

ख्रीष्टके ताहीं जिइनो

²⁰ मिर मनको इच्छा और आसरा जा हए, कि मए लज्जित नाए होमओं बल्कि मोएमे ख्रीष्टके बारेमे मस्कनके सहास होबए, जैसेकी मए बितो भओ समयमे कहो रहओं, चहुँ मए जिन्दा रहाओं या मरजामओं मए अपनो पुरो जीबनसे ख्रीष्टके आदर करत रहामंगो।

²¹ काहेकी अगर मए जिन्दा रहामंगो तओ जा ख्रीष्टके ताहीं होबैगो, और जब मए मरजामंगो तओ मेरे ताहीं अच्छो हुइहए, काहेकी तओ मए ख्रीष्टके सँग रहामंगो।

²² पर अगर शरीरमे जिन्दा हामंगो कहेसे मए ख्रीष्टके ताहीं अच्छो काम करपामंगो। मए नाए जानत हओं, कि जामैसे कौनछो अच्छो हए।

²³ काहेकी मोके जे दुई मैसे कौनछो छानन पणैगो बो मए नाए जानतहओं। मन त लगत हए, कि मरके ख्रीष्टके ठिन जाओं काहेकी जा बहुत अच्छो हए।

²⁴ पर शरीरमे रहनो तुमर मदतके ताहीं मिर जरुरत हए।

²⁵ और जहेमारे, कि मोके जाको भरोसा हए। मए जानत हओं, कि मए जिन्दा रहामंगो, और तुम सबके सँग रहिके मए तुमर बिश्वासमे मजबुत होनके और बोमे खुसी होनके ताहीं मदत करंगो।

²⁶ ताकी जब मए फिरसे तुमरसँग होमंगो, तओ तुम मेरे कारण येशू ख्रीष्टके बारेमे औ जद्धा घमण्ड करपाबैगे।

कोसिस करतए रहानो और ख्रीष्टके ताहीं दुख उठानो

²⁷ खास बात जहेहए, कि ख्रीष्टको अच्छो समाचारके सुहान बारो चल-चलन होबए। जहेमारे, मए तुमके देखओं या नाए देखओं, तुमर बारेमे जा सुनन पामओं, कि तुम एकए उदेश्यमे स्थिर हओ, और एकए सँग लडनके ताहीं बहे बिश्वासके ताहीं लडत हओ, जो अच्छो समाचारसे आत हए।

²⁸ और तुम अपनो बिरोधीनसे नाए डरात हओ। तुमर सहास उनके ताहीं बिनाशको चिन्हा हए, पर तुमर ताहीं उद्धारको चिन्हा हए, और जा परमेश्वरके घेनसे हए।

²⁹ काहेकी परमेश्वर तुमके सिरफ ख्रीष्टमे बिश्वास करनके इकल्लो नाए, बल्कि दु:ख सहनके फिर अनुग्रह दइ हए, काहेकी तुम बामे बिश्वास करत हओ।

³⁰ और तुमके उइसीयए कष्ट करनके हए, जैसे तुम मोके कष्ट करत देखे हओ। जब मए तुमर सँग फिलिप्पी सहरमे रहओं। और जौन कष्ट तुम अभए सुनरहे हओ, बो मए हबए फिर जेलमे सहिरहो हओं।